𑐐𑐖𑐾𑐣𑑂𑐡𑑂𑐬 𑐛𑐵𑐎𑐸𑐬-𑐔𑐵𑐬𑐶𑐚𑐵 𑐄𑐟𑑂𑐟𑐬 𑐁𑐢𑐸𑐣𑐶𑐎 𑐣𑐵𑐚𑐎: 𑐳𑐿𑐩𑐸𑐀𑐮 𑐧𑐿𑐎𑐾𑐚𑐎 𑐦𑑂𑐬𑐾𑑄𑐔 𑐣𑐵𑐚𑐎 “𑐰𑐾𑐚𑐶𑑄𑐐 𑐦𑐶𑐬 𑐐𑑀𑐜𑑀”, 𑐴𑐿𑐬𑑀𑐮𑑂𑐜 𑐥𑐶𑑄𑐚𑐬𑐎 𑐀𑑄𑐐𑑂𑐬𑐾𑐖𑐷 𑐣𑐵𑐚𑐎 “𑐡 𑐧𑐬𑑂𑐠𑐜𑐾 𑐥𑐵𑐬𑑂𑐚𑐷”, 𑐧𑐵𑐡𑐮 𑐳𑐬𑐎𑐵𑐬𑐎 𑐧𑐵𑑄𑐐𑑂𑐮𑐵 𑐣𑐵𑐚𑐎 “𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟” 𑐁 𑐄𑐡𑐫 𑐣𑐵𑐬𑐵𑐫𑐞 𑐳𑐶𑑄𑐴 ‘𑐣𑐔𑐶𑐎𑐾𑐟𑐵’𑐎 𑐩𑐿𑐠𑐶𑐮𑐷 𑐣𑐵𑐚𑐎 “𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱”
[𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱 𑑒𑑐𑑐𑑘 𑐃. 𑐩𑐾 𑐕𑐥𑐮 𑐁 𑐳𑐵𑐴𑐶𑐟𑑂𑐫 𑐀𑐎𑐵𑐡𑐾𑐩𑐷 𑐥𑐸𑐬𑐳𑑂𑐎𑐵𑐬 𑐮𑐾𑐮 𑐊𑐎𑐬 𑐔𑐫𑐣 𑑒𑑐𑑑𑑐, 𑑒𑑐𑑑𑑑 𑐧𑐵 𑑒𑑐𑑑𑑒 𑐩𑐾 𑐣𑐿 𑐨𑑇 𑐳𑐎𑐮𑐿𑑋 𑐁𑐧 𑐃 𑐥𑑀𑐠𑐷 𑐩𑐿𑐠𑐶𑐮𑐷 𑐳𑐵𑐴𑐶𑐟𑑂𑐫 𑐮𑐾𑐮 𑐳𑐵𑐴𑐶𑐟𑑂𑐫 𑐀𑐎𑐵𑐡𑐾𑐩𑐷 𑐥𑐸𑐬𑐳𑑂𑐎𑐵𑐬 𑐮𑐾𑐮 𑐄𑐥𑐮𑐧𑑂𑐢 𑐣𑐿 𑐬𑐴𑐟𑑋 𑐋 𑐟𑐬𑐴𑐎 𑐁𑐣𑑀 𑐄𑐡𑐵𑐴𑐬𑐞 𑐬𑐴𑐮 𑐀𑐕𑐶𑑋 𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱 𑐎 𑐩𑐿𑐠𑐶𑐮𑐷 𑐳𑐵𑐴𑐶𑐟𑑂𑐫 𑐁 𑐰𑐶𑐱𑑂𑐰 𑐳𑐵𑐴𑐶𑐟𑑂𑐫 𑐩𑐢𑑂𑐫 𑐳𑑂𑐠𑐵𑐣 𑐣𑐷𑐔𑐵𑑃𑐎 𑐁𑐮𑐾𑐏𑐩𑐾 𑐣𑐶𑐬𑐹𑐥𑐶𑐟 𑐎𑐊𑐮 𑐖𑐵 𑐬𑐴𑐮 𑐀𑐕𑐶𑑋 𑐃 𑐱𑐺𑑄𑐏𑐮𑐵 𑐁𑐐𑐵𑑃 𑐳𑐾𑐴𑑀 𑐖𑐵𑐬𑐷 𑐬𑐴𑐟𑑋]𑐔𑐵𑐬𑐶𑐚𑐵 𑐄𑐟𑑂𑐟𑐬 𑐁𑐢𑐸𑐣𑐶𑐎 𑐣𑐵𑐚𑐎: 𑐳𑐿𑐩𑐸𑐀𑐮 𑐧𑐿𑐎𑐾𑐚𑐎 𑐦𑑂𑐬𑐾𑑄𑐔 𑐣𑐵𑐚𑐎 “𑐰𑐾𑐚𑐶𑑄𑐐 𑐦𑐶𑐬 𑐐𑑀𑐜𑑀”, 𑐴𑐿𑐬𑑀𑐮𑑂𑐜 𑐥𑐶𑑄𑐚𑐬𑐎 𑐀𑑄𑐐𑑂𑐬𑐾𑐖𑐷 𑐣𑐵𑐚𑐎 “𑐡 𑐧𑐬𑑂𑐠𑐜𑐾 𑐥𑐵𑐬𑑂𑐚𑐷”, 𑐧𑐵𑐡𑐮 𑐳𑐬𑐎𑐵𑐬𑐎 𑐧𑐵𑑄𑐐𑑂𑐮𑐵 𑐣𑐵𑐚𑐎 “𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟” 𑐁 𑐄𑐡𑐫 𑐣𑐵𑐬𑐵𑐫𑐞 𑐳𑐶𑑄𑐴 ‘𑐣𑐔𑐶𑐎𑐾𑐟𑐵’𑐎 𑐩𑐿𑐠𑐶𑐮𑐷 𑐣𑐵𑐚𑐎 “𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱”
.......................................
"𑐰𑐾𑐚𑐶𑑄𑐐 𑐦𑐶𑐬 𑐐𑑀𑐜𑑀” 𑐡𑐹 𑐀𑑄𑐎𑐷𑐫 𑐚𑑂𑐬𑐾𑐖𑐷-𑐎𑐶𑐩𑐾𑐜𑐷 𑐀𑐕𑐶𑑋 𑐳𑐿𑐩𑐸𑐀𑐮 𑐧𑐿𑐎𑐾𑐚 𑐡𑑂𑐰𑐵𑐬𑐵 𑐃 1952 𑐃. 𑐩𑐾 𑐦𑑂𑐬𑐾𑑄𑐔 𑐨𑐵𑐲𑐵𑐩𑐾 𑐮𑐶𑐏𑐮 𑐐𑐾𑐮 𑐁 𑐊𑐎𑐬 𑐥𑐴𑐶𑐮 𑐥𑑂𑐬𑐡𑐬𑑂𑐱𑐣 𑐥𑐾𑐬𑐶𑐳𑐩𑐾 1953 𑐃. 𑐩𑐾 𑐨𑐾𑐮𑑋 𑐊𑐎𑐬 𑐀𑑄𑐐𑑂𑐬𑐾𑐖𑐷 𑐳𑑄𑐳𑑂𑐎𑐬𑐞𑐎 𑐥𑑂𑐬𑐡𑐬𑑂𑐱𑐣 𑐮𑑄𑐡𑐣𑐩𑐾 1955 𑐃. 𑐩𑐾 𑐨𑐾𑐮 𑐁 𑐀𑑄𑐐𑑂𑐬𑐾𑐖𑐷 𑐳𑑄𑐳𑑂𑐎𑐬𑐞 1956 𑐃. 𑐩𑐾 𑐥𑑂𑐬𑐎𑐵𑐱𑐶𑐟 𑐨𑐾𑐮𑑋
𑐴𑐿𑐬𑑀𑐮𑑂𑐜 𑐥𑐶𑑄𑐚𑐬𑐎 𑐀𑑄𑐐𑑂𑐬𑐾𑐖𑐷 𑐣𑐵𑐚𑐎 “𑐡 𑐧𑐬𑑂𑐠𑐜𑐾 𑐥𑐵𑐬𑑂𑐚𑐷” 𑐎𑐿𑐩𑑂𑐧𑑂𑐬𑐶𑐖𑐩𑐾 1958 𑐃. 𑐩𑐾 𑐩𑑄𑐔𑐶𑐟 𑐨𑐾𑐮 𑐁 1960 𑐃. 𑐩𑐾 𑐥𑑂𑐬𑐎𑐵𑐱𑐶𑐟 𑐨𑐾𑐮𑑋
𑐧𑐵𑐡𑐮 𑐳𑐬𑐎𑐵𑐬𑐎 𑐧𑐵𑑄𑐐𑑂𑐮𑐵 𑐣𑐵𑐚𑐎 “𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟” 1962 𑐃. 𑐩𑐾 𑐮𑐶𑐏𑐮 𑐐𑐾𑐮 𑐁 𑐃 1965 𑐃. 𑐩𑐾 𑐎𑐮𑐎𑐟𑑂𑐟𑐵𑐩𑐾 𑐩𑑄𑐔𑐶𑐟 𑐨𑐾𑐮𑑋
𑐄𑐡𑐫 𑐣𑐵𑐬𑐵𑐫𑐞 𑐳𑐶𑑄𑐴 ‘𑐣𑐔𑐶𑐎𑐾𑐟𑐵’𑐎 “𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱” 2008 𑐃. 𑐩𑐾 𑐃-𑐥𑑂𑐬𑐎𑐵𑐱𑐶𑐟 𑐁 𑐦𑐾𑐬 𑐌𑐴𑐷 𑐧𑐬𑑂𑐏 𑐥𑑂𑐬𑐎𑐵𑐱𑐶𑐟 𑐨𑐾𑐮𑑋 19 𑐦𑐬𑐧𑐬𑐷 2011 𑐎𑐾𑑃 𑐎𑐸𑐞𑐵𑐮𑐎 𑐣𑐶𑐬𑑂𑐡𑐾𑐱𑐣𑐩𑐾 𑐎𑐵𑐮𑐶𑐡𑐵𑐳 𑐬𑑄𑐐𑐵𑐮𑐫, 𑐥𑐚𑐣𑐵𑐩𑐾 𑐃 𑐜𑐾𑐝𑑆 𑐑𑐞𑑂𑐚𑐵𑐎 𑐣𑐵𑐚𑐎 𑐩𑑄𑐔𑐶𑐟 𑐨𑐾𑐮𑑋
𑐦𑑂𑐬𑐾𑑄𑐔, 𑐀𑑄𑐐𑑂𑐬𑐾𑐖𑐷, 𑐧𑐵𑑄𑐐𑑂𑐮𑐵 𑐁 𑐩𑐿𑐠𑐶𑐮𑐷𑐎 𑐃 𑐔𑐵𑐬𑐹 𑐣𑐵𑐚𑐎 𑐥𑑀𑐳𑑂𑐚-𑐩𑐶𑐜𑐬𑑂𑐣 𑐣𑐵𑐚𑐎𑐎 𑐱𑑂𑐬𑐾𑐞𑐷𑐩𑐾 𑐐𑐵𑐣𑐮 𑐖𑐵𑐂𑐟 𑐀𑐕𑐶𑑋 𑐖𑐏𑐣 𑐳𑐿𑐩𑐸𑐀𑐮 𑐧𑐿𑐎𑐾𑐚𑐎 “𑐰𑐾𑐚𑐶𑑄𑐐 𑐦𑐶𑐬 𑐐𑑀𑐜𑑀” 𑐡𑐾𑐏𑐶 𑐎’ 𑐮𑑀𑐎 𑐳𑐨 𑐑𑐸𑐬𑐮 𑐬𑐴𑐠𑐶 𑐟𑑃 𑐴𑐸𑐣𑐎𑐵 𑐮𑑀𑐎𑐣𑐶𑐎𑐾𑑃 𑐊𑐎𑐚𑐵 𑐰𑐶𑐔𑐶𑐟𑑂𑐬 𑐀𑐣𑐸𑐨𑐰𑐳𑑃 𑐳𑐵𑐎𑑂𑐲𑐵𑐟𑑂𑐎𑐵𑐬 𑐨𑐾𑐮 𑐕𑐮𑐣𑑂𑐴𑐶𑑋 𑐋 𑐣𑐵𑐚𑐎𑐩𑐾 𑐩𑐵𑐟𑑂𑐬 𑐥𑐵𑑃𑐔𑐚𑐵 𑐥𑐵𑐟𑑂𑐬 𑐀𑐕𑐶- 𑐊𑐳𑑂𑐚𑑂𑐬𑐵𑐐𑑀𑐣, 𑐰𑑂𑐮𑐵𑐡𑐷𑐩𑐷𑐬, 𑐮𑐎𑐷, 𑐥𑑀𑐖𑑀 𑐁 𑐊𑐎𑐚𑐵 𑐕𑑁𑐜𑑆𑐵𑑋 𑐊𑐎𑐚𑐵 𑐎𑐞𑑂𑐚𑑂𑐬𑐷 𑐬𑑀𑐜𑐥𑐬 𑐳𑐵𑑃𑐗𑐩𑐾 𑐊𑐎𑐚𑐵 𑐐𑐵𑐕 𑐮𑐐 𑐊𑐳𑑂𑐚𑑂𑐬𑐵𑐐𑑀𑐣 𑐊𑐎𑐚𑐵 𑐝𑐶𑐩𑐎𑐵𑐥𑐬 𑐧𑐿𑐳𑐮 𑐀𑐕𑐶 𑐁 𑐀𑐥𑐣 𑐖𑐸𑐟𑑂𑐟𑐵 𑐡𑐸𑐣𑐹 𑐴𑐵𑐠𑐳𑑃 𑐣𑐶𑐎𑐵𑐮𑐧𑐵𑐎 𑐥𑑂𑐬𑐫𑐵𑐳 𑐎’ 𑐬𑐴𑐮 𑐀𑐕𑐶 𑐁 𑐀𑐥𑐳𑑂𑐫𑐵𑑃𑐟 𑐀𑐕𑐶, 𑐁 𑐠𑐵𑐎𑐶 𑐖𑐵𑐂𑐊𑑋 𑐰𑑂𑐮𑐵𑐡𑐷𑐩𑐷𑐬 𑐳𑑄𑐐𑐾 𑐌 𑐐𑐥𑐎 𑐥𑑂𑐬𑐵𑐬𑐩𑑂𑐨 𑐴𑑀𑐂 𑐕𑐿, 𑐊𑐩𑑂𑐴𑐬 𑐌𑐩𑑂𑐴𑐬𑐎 𑐦𑐸𑐳𑐶𑐫𑐵𑑃𑐴𑐷𑐎 𑐣𑐩𑐐𑐬 𑐐𑐥𑐱𑐥 𑐴𑑀𑐂 𑐕𑐿𑑋 𑐥𑑀𑐖𑑀 𑐁 𑐮𑐎𑐷 𑐀𑐧𑐿𑐊𑑋 𑐥𑑀𑐖𑑀 𑐧𑐸𑐗𑐵𑐂𑐊 𑐩𑐵𑐮𑐶𑐎 𑐀𑐕𑐶 𑐁 𑐮𑐎𑐷 𑐡𑐵𑐳𑑋 𑐡𑐵𑐳𑑀 𑐟𑐾𑐴𑐾𑐣 𑐖𑐎𑐬𑐵 𑐐𑐬𑑂𑐡𑐣𑐶𑐩𑐾 𑐣𑐩𑐐𑐬 𑐬𑐳𑑂𑐳𑐵 𑐥𑑀𑐖𑑀 𑐮𑐐𑐾𑐣𑐾 𑐀𑐕𑐶𑑋 𑐥𑐴𑐶𑐣𑐾 𑐮𑐎𑐷 𑐀𑐧𑐿𑐊, 𑐦𑐾𑐬 𑐬𑐳𑑂𑐳𑐵 𑐥𑐎𑐜𑑆𑐣𑐾 𑐥𑑀𑐖𑑀𑑋 𑐮𑐎𑐷 𑐧𑐜𑑆𑐎𑐵 𑐧𑐿𑐐, 𑐊𑐎𑐚𑐵 𑐦𑑀𑐮𑑂𑐜𑐶𑑄𑐐 𑐳𑑂𑐚𑐹𑐮, 𑐊𑐎𑐚𑐵 𑐥𑐶𑐎𑐣𑐶𑐎 𑐧𑐵𑐳𑑂𑐎𑐾𑐚 𑐁 𑐐𑑂𑐬𑐾𑐚𑐎𑑀𑐚 𑐄𑐑𑐣𑐾 𑐀𑐕𑐶𑑋 𑐥𑑀𑐖𑑀 𑐮𑐐 𑐔𑐵𑐧𑐸𑐎 𑐕𑐿𑑋 𑐮𑐎𑐷 𑐁𑐡𑐾𑐱𑐥𑐵𑐮𑐎 𑐀𑐕𑐶𑑋 𑐩𑐵𑐮𑐶𑐎𑐎 𑐐𑐥 𑐩𑐵𑐣𑐶 𑐦𑐾𑐬 𑐳𑐨 𑐧𑑀𑐗 𑐄𑐛𑐵 𑐎’ 𑐛𑐵𑐝𑑆 𑐨’ 𑐖𑐵𑐂𑐊𑑋 𑐊𑐳𑑂𑐚𑑂𑐬𑐵𑐐𑑀𑐣 𑐁 𑐰𑑂𑐮𑐵𑐡𑐷𑐩𑐷𑐬𑐎𑐾𑑃 𑐌𑐎𑐬 𑐧𑑀𑐗𑐵 𑐄𑐑𑐣𑐵𑐂 𑐣𑐷𑐎 𑐣𑐿 𑐮𑐐𑐿 𑐕𑐿𑑋 𑐩𑐸𑐡𑐵 𑐥𑑀𑐖𑑀 𑐖𑐏𑐣 𑐎𑐴𑐿 𑐕𑐿 𑐖𑐾 𑐌 𑐌𑐴𑐶𑐣𑐾 𑐕𑐿 𑐟𑑃 𑐊𑐳𑑂𑐚𑑂𑐬𑐵𑐐𑑀𑐣 𑐥𑑀𑐖𑑀𑐎𑐾𑑃 𑐁𑐟𑐟𑐵𑐫𑐷 𑐧𑐸𑐗𑐿 𑐕𑐿𑑋 𑐊𑐳𑑂𑐚𑑂𑐬𑐵𑐐𑑀𑐣 𑐮𑐎𑐷𑐎 𑐣𑑀𑐬 𑐥𑑀𑐕𑐿𑐊 𑐟𑐏𑐣 𑐌𑐎𑐬𑐵 𑐮𑐎𑐷 𑐩𑐸𑐎𑑂𑐎𑐵 𑐩𑐵𑐬𑐿 𑐕𑐿𑑋 𑐥𑑀𑐖𑑀 𑐎𑐴𑐿 𑐕𑐿 𑐖𑐾 𑐟𑑀𑐬𑐵 𑐎𑐴𑐮𑐶𑐫𑑁 𑐣𑐾 𑐖𑐾 𑐮𑐎𑐷𑐎𑐾𑑃 𑐀𑐣𑐔𑐶𑐣𑑂𑐴𑐵𑐬 𑐮𑑀𑐎 𑐥𑐳𑐶𑐣𑑂𑐣 𑐣𑐿 𑐕𑐿𑑋 𑐁 𑐊𑐳𑑂𑐚𑑂𑐬𑐵𑐐𑑀𑐣 𑐁 𑐰𑑂𑐮𑐵𑐡𑐷𑐩𑐷𑐬 𑐌𑐟’ 𑐎𑐷 𑐎’ 𑐬𑐴𑐮 𑐀𑐕𑐶? 𑐌 𑐡𑐸𑐣𑐹 𑐐𑑀𑐚𑐾 𑐎𑑀𑐣𑑀 𑐐𑑀𑐜𑑀 𑐣𑐵𑐩𑑂𑐣𑐵 𑐰𑑂𑐫𑐎𑑂𑐟𑐶𑐎 𑐧𑐵𑐚 𑐖𑑀𑐴𑐶 𑐬𑐴𑐮 𑐀𑐕𑐶𑑋
𑐥𑑀𑐖𑑀 𑐁 𑐮𑐎𑐷 𑐔𑐮𑐶 𑐖𑐵𑐂𑐊𑑋 𑐊𑐳𑑂𑐚𑑂𑐬𑐵𑐐𑑀𑐣 𑐁 𑐰𑑂𑐮𑐵𑐡𑐷𑐩𑐷𑐬 𑐮𑐐 𑐊𑐎𑐚𑐵 𑐕𑑁𑐜𑑆𑐵 𑐀𑐧𑐿 𑐕𑐿 𑐁 𑐎𑐴𑐿 𑐕𑐿 𑐖𑐾 𑐐𑑀𑐜𑑀 𑐁𑐂 𑐣𑐿 𑐁𑐧𑐶 𑐳𑐎𑐟𑐵, 𑐎𑐵𑐮𑑂𑐴𑐶 𑐊𑐟𑐵𑑋 𑐦𑐾𑐬 𑐊𑐩𑑂𑐴𑐬 𑐌𑐩𑑂𑐴𑐬𑐎 𑐦𑐸𑐳𑐶𑐫𑐵𑑃𑐴𑐷𑐎 𑐐𑐥𑐱𑐥 𑐴𑑀𑐂𑐊 𑐁 𑐌𑐴𑑀 𑐕𑑁𑐜𑑆𑐵 𑐔𑐮𑐶 𑐖𑐵𑐂𑐊𑑋 𑐟𑐏𑐣𑐾 𑐩𑑄𑐔𑐥𑐬 𑐳𑑃 𑐧𑐶𑐖𑐮𑐷 𑐔𑐮𑐶 𑐖𑐵𑐂 𑐕𑐿 𑐁 𑐦𑐾𑐬 𑐬𑐵𑐟𑐶 𑐨’ 𑐖𑐵𑐂 𑐕𑐿, 𑐔𑐣𑑂𑐡𑑂𑐬𑐩𑐵 𑐄𑐐𑐮 𑐕𑐿𑑋 𑐰𑑂𑐮𑐵𑐡𑐷𑐩𑐷𑐬 𑐁 𑐊𑐳𑑂𑐚𑑂𑐬𑐵𑐐𑑀𑐣𑐎 𑐐𑐥𑐱𑐥 𑐱𑐸𑐬𑐹 𑐴𑑀𑐂 𑐕𑐿𑑋 𑐦𑐸𑐳𑐶𑐫𑐵𑑃𑐴𑐷𑐎 𑐐𑐥𑐩𑐾 𑐎𑐶𑐕𑐸 𑐀𑐬𑑂𑐠𑐥𑐹𑐬𑑂𑐞 𑐐𑐥𑐱𑐥 𑐳𑐾𑐴𑑀 𑐴𑑀𑐂 𑐕𑐿𑑋 𑐡𑐸𑐣𑐹 𑐐𑑀𑐚𑐾 𑐖𑐾𑐧𑐵𑐎 𑐣𑐶𑐬𑑂𑐞𑐫 𑐎𑐬𑐿 𑐕𑐠𑐶 𑐩𑐸𑐡𑐵 𑐴𑐶𑐮𑐿 𑐣𑐿 𑐕𑐠𑐶𑑋 𑐥𑐴𑐶𑐮 𑐀𑑄𑐎𑐎 𑐥𑐬𑑂𑐡𑐵 𑐏𑐳𑐿𑐊𑑋
𑐡𑑀𑐳𑐬 𑐀𑑄𑐎, 𑐰𑐊𑐴 𑐳𑐩𑐊 𑐁 𑐳𑑂𑐠𑐵𑐣𑑋 𑐰𑑂𑐮𑐵𑐡𑐷𑐩𑐷𑐬𑐎𑐾𑑃 𑐳𑐨 𑐎𑐶𑐕𑐸 𑐩𑑀𑐣 𑐕𑐿 𑐩𑐸𑐡𑐵 𑐊𑐳𑑂𑐚𑑂𑐬𑐵𑐐𑑀𑐣 𑐧𑐶𑐳𑐬𑐶 𑐐𑐾𑐮 𑐀𑐕𑐶𑑋 𑐊𑐳𑑂𑐚𑑂𑐬𑐵𑐐𑑀𑐣 𑐎𑐴𑐿𑐊 𑐖𑐾 𑐌 𑐳𑐨 𑐎𑐶𑐕𑐸 𑐟𑐸𑐬𑐟𑑂𑐟𑐾 𑐧𑐶𑐳𑐬𑐶 𑐖𑐵𑐂𑐊 𑐧𑐵 𑐎𑐴𑐶𑐫𑑀 𑐣𑐿 𑐧𑐶𑐳𑐬𑐿𑐊𑑋 𑐌𑐎𑐬𑐵 𑐎𑐶𑐕𑐸-𑐎𑐶𑐕𑐸 𑐩𑑀𑐣𑑀 𑐥𑐜𑑆𑐿 𑐕𑐿𑑋 𑐥𑑀𑐖𑑀 𑐁 𑐮𑐎𑐷 𑐀𑐧𑐿𑐊𑑋 𑐥𑑀𑐖𑑀 𑐁𑐣𑑂𑐴𑐬 𑐨’ 𑐐𑐾𑐮 𑐀𑐕𑐶, 𑐮𑐎𑐷 𑐌𑐴𑐶𑐣𑐵 𑐧𑑀𑐗𑐵 𑐄𑐑𑐣𑐾 𑐀𑐕𑐶𑑋 𑐬𑐳𑑂𑐳𑐵 𑐳𑐾𑐴𑑀 𑐕𑐿 𑐩𑐸𑐡𑐵 𑐎𑐶𑐕𑐸 𑐕𑑀𑐚𑑋 𑐥𑑀𑐖𑑀 𑐁 𑐮𑐎𑐷 𑐏𑐳𑐶 𑐥𑐜𑑆𑐿𑐊𑑋 𑐥𑑀𑐖𑑀 𑐳𑐴𑐵𑐫𑐟𑐵 𑐮𑐾𑐮 𑐎𑐴𑐿𑐊 𑐩𑐸𑐡𑐵 𑐊𑐳𑑂𑐚𑑂𑐬𑐵𑐐𑑀𑐣 𑐁 𑐰𑑂𑐮𑐵𑐡𑐷𑐩𑐷𑐬 𑐐𑐥𑐱𑐥 𑐎𑐬𑐿𑐊𑑋
𑐊𑐳𑑂𑐚𑑂𑐬𑐵𑐐𑑀𑐣 𑐰𑑂𑐮𑐵𑐡𑐷𑐩𑐷𑐬𑐎𑐾𑑃 𑐥𑐴𑐶𑐮 𑐀𑑄𑐎 𑐖𑐾𑐎𑐵𑑃 “𑐡𑐷𑐡𑐷” 𑐎𑐴𑐿𑐊𑑋 𑐰𑑂𑐮𑐵𑐡𑐷𑐩𑐷𑐬 𑐧𑐵𑐖𑐿𑐊 𑐖𑐾 “𑐴𑐩𑐬𑐵 𑐳𑐨𑐎𑐾𑑃 𑐦𑐸𑐳𑐶𑐫𑐵𑑃𑐴𑐷𑐎 𑐐𑐥𑐱𑐥𑐩𑐾 𑐳𑐩𑐫 𑐣𑐿 𑐧𑐬𑑂𑐧𑐵𑐡 𑐎𑐬𑐧𑐵𑐎 𑐔𑐵𑐴𑐷𑑋“ 𑐥𑑀𑐖𑑀𑐎 “𑐳𑐴𑐵𑐫𑐟𑐵”𑐎 𑐁𑐬𑑂𑐟𑐣𑐵𑐡 𑐣𑐶𑐫𑐟 𑐀𑑄𑐟𑐬𑐵𑐮𑐥𑐬 𑐧𑐾𑐬-𑐧𑐾𑐬 𑐴𑑀𑐂 𑐕𑐿𑑋 𑐩𑐸𑐡𑐵 𑐟𑐂𑐥𑐬 𑐊𑐳𑑂𑐚𑑂𑐬𑐵𑐐𑑀𑐣 𑐁 𑐰𑑂𑐮𑐵𑐡𑐷𑐩𑐷𑐬 𑐢𑑂𑐫𑐵𑐣 𑐣𑐿 𑐡𑐿𑐊𑑋 𑐥𑑀𑐖𑑀 𑐁𑐧 𑐳𑐴𑐵𑐫𑐟𑐵 𑐮𑐾𑐮 𑐳𑐊 𑐦𑑂𑐬𑐿𑑄𑐎 𑐦𑐾𑐬 𑐡𑐹 𑐳𑐊 𑐦𑑂𑐬𑐿𑑄𑐎𑐎 𑐮𑐵𑐮𑐔 𑐡𑐿𑐊𑑋 𑐰𑑂𑐮𑐵𑐡𑐷𑐩𑐷𑐬 𑐌𑐎𑐬𑐵 𑐄𑐛𑐧𑐿𑐮𑐾 𑐖𑐵𑐂𑐊, 𑐥𑑂𑐬𑐫𑐵𑐳𑐩𑐾 𑐀𑐥𑐣𑑀 𑐏𑐳𑐶 𑐥𑐜𑑆𑐿𑐊 𑐁 𑐳𑐴𑐵𑐫𑐟𑐵𑐎 𑐥𑐸𑐎𑐵𑐬 𑐎𑐬𑐿𑐊𑑋 𑐦𑐾𑐬 𑐎𑐶𑐕𑐸 𑐐𑐥𑐱𑐥𑐎 𑐧𑐵𑐡 𑐰𑑂𑐮𑐵𑐡𑐷𑐩𑐷𑐬𑐎𑐾𑑃 𑐄𑐛𑐾𑐧𑐵𑐎 𑐥𑑂𑐬𑐫𑐵𑐳𑐩𑐾 𑐊𑐳𑑂𑐚𑑂𑐬𑐵𑐐𑑀𑐣 𑐏𑐳𑐶 𑐥𑐜𑑆𑐿𑐊𑑋 𑐰𑑂𑐮𑐵𑐡𑐷𑐩𑐷𑐬 𑐥𑑀𑐖𑑀𑐎𑐾𑑃 𑐩𑐵𑐬𑐿𑐊, 𑐥𑑀𑐖𑑀 𑐑𑐸𑐳𑐎𑐸𑐣𑐶𑐫𑐵 𑐡𑐿𑐊𑑋 𑐟𑐏𑐣 𑐰𑑂𑐮𑐵𑐡𑐷𑐩𑐷𑐬 𑐌𑐎𑐬𑐵 𑐟𑐵𑐎𑐿𑐊, 𑐎𑐴𑐿𑐊- 𑐁𑐧𑐶 𑐖𑑀, 𑐟𑑀𑐬𑐵 𑐣𑑀𑐎𑐳𑐵𑐣 𑐣𑐿 𑐥𑐴𑐸𑑃𑐔𑐾𑐧𑑁𑑋
𑐊𑐳𑑂𑐚𑑂𑐬𑐵𑐐𑑀𑐣 𑐁 𑐰𑑂𑐮𑐵𑐡𑐷𑐩𑐷𑐬 𑐄𑐛𑐧𑐵𑐎 𑐥𑑂𑐬𑐫𑐵𑐳 𑐎𑐬𑐧𑐵𑐎 𑐳𑑀𑐔𑐿𑐊 𑐁 𑐄𑐛𑐶 𑐖𑐵𑐂𑐊𑑋 𑐊𑐳𑑂𑐚𑑂𑐬𑐵𑐐𑑀𑐣 𑐎𑐴𑐿𑐊- 𑐄𑐛𑐣𑐵𑐂 𑐧𑐔𑑂𑐔𑐵𑐎 𑐏𑐾𑐮 𑐳𑐣 𑐴𑐮𑑂𑐮𑐸𑐎 𑐀𑐕𑐶 𑐁 𑐰𑑂𑐮𑐵𑐡𑐷𑐩𑐷𑐬 𑐧𑐖𑐿𑐊- 𑐃 𑐩𑐵𑐟𑑂𑐬 𑐁𑐟𑑂𑐩𑐱𑐎𑑂𑐟𑐶𑐎 𑐥𑑂𑐬𑐱𑑂𑐣 𑐀𑐕𑐶𑑋 𑐥𑑀𑐖𑑀 𑐳𑐴𑐵𑐫𑐟𑐵 𑐮𑐾𑐮 𑐎𑐴𑐿𑐊𑑋 𑐡𑐸𑐣𑐹 𑐥𑑀𑐖𑑀𑐎𑐾𑑃 𑐄𑐛𑐧𑐿𑐊, 𑐦𑐾𑐬 𑐕𑑀𑐜𑑆𑐿𑐊, 𑐥𑑀𑐖𑑀 𑐏𑐳𑐶 𑐥𑐜𑑆𑐿𑐊𑑋 𑐦𑐾𑐬 𑐡𑐸𑐣𑐹 𑐌𑐎𑐬𑐵 𑐄𑐛𑐧𑐿𑐊 𑐁 𑐥𑐎𑐜𑑆𑐣𑐾 𑐬𑐴𑐿𑐊𑑋 𑐎𑐶𑐕𑐸 𑐎𑐵𑐮𑐩𑐾 𑐎𑐣𑐾 𑐕𑑀𑐜𑑆𑐶 𑐎’ 𑐖𑐵𑑃𑐔𑐿𑐊 𑐩𑐸𑐡𑐵 𑐖𑐏𑐣 𑐥𑑀𑐖𑑀 𑐏𑐳’ 𑐮𑐐𑐿𑐊 𑐟𑑃 𑐥𑐎𑐜𑑆𑐶 𑐮𑐿𑐊𑑋 𑐥𑑀𑐖𑑀 𑐳𑐾𑐴𑑀 𑐧𑐸𑐗𑐵 𑐥𑐜𑑆𑐿𑐊 𑐖𑐾 𑐎𑐵𑐮𑑂𑐴𑐶𑐎 𑐑𑐚𑐣𑐵 𑐧𑐶𑐳𑐬𑐮 𑐳𑐣 𑐀𑐕𑐶𑑋 𑐌 𑐎𑐴𑐿𑐊 𑐖𑐾 𑐌 𑐊𑐎 𑐡𑐶𑐣 𑐳𑐸𑐟𑐶 𑐎’ 𑐄𑐛𑐮 𑐟𑑃 𑐀𑐥𑐣𑐵𑐎𑐾𑑃 𑐁𑐣𑑂𑐴𑐬 𑐡𑐾𑐏𑐮𑐎, 𑐌 𑐎𑐴𑐿𑐊 𑐖𑐾 𑐌𑐎𑐬𑐵 𑐮𑐐𑐿 𑐕𑐿 𑐖𑐾 𑐌 𑐀𑐏𑐣𑑀 𑐳𑐸𑐟𑐮𑐾 𑐟𑑃 𑐣𑐿 𑐀𑐕𑐶𑑋 𑐌 𑐮𑐎𑐷𑐎 𑐰𑐶𑐲𑐫𑐩𑐾 𑐥𑐹𑐕𑐿𑐊𑑋 𑐮𑐵𑐐𑐿𑐊 𑐖𑐾 𑐎𑑀𑐣𑐵 𑐌 𑐡𑐸𑐣𑐹 𑐏𑐳𑐮, 𑐳𑐾 𑐌𑐎𑐬𑐵 𑐩𑑀𑐣 𑐣𑐿 𑐕𑐿𑑋 𑐥𑑀𑐖𑑀 𑐎𑐴𑐿𑐊 𑐖𑐾 𑐮𑐎𑐷𑐎 𑐐𑐬𑑂𑐡𑐣𑐶𑐎 𑐬𑐳𑑂𑐳𑐵𑐎𑐾𑑃 𑐖𑑀𑐬𑐳𑑃 𑐏𑐷𑐔𑐹 𑐧𑐵 𑐩𑐸𑑃𑐴𑐥𑐬 𑐖𑐹𑐟𑐵𑐳𑑃 𑐩𑐵𑐬𑐹 𑐟𑑃 𑐌 𑐄𑐛𑐶 𑐖𑐵𑐊𑐟𑑋 𑐰𑑂𑐮𑐵𑐡𑐷𑐩𑐷𑐬 𑐊𑐳𑑂𑐚𑑂𑐬𑐵𑐐𑑀𑐣𑐎𑐾𑑃 𑐎𑐴𑐿𑐊 𑐖𑐾 𑐌𑐎𑐬𑐵 𑐮𑐾𑐮 𑐧𑐡𑐮𑐵 𑐮𑐾𑐧𑐵𑐎 𑐣𑐷𑐎 𑐀𑐰𑐳𑐬 𑐕𑐿𑑋 𑐊𑐳𑑂𑐚𑑂𑐬𑐵𑐐𑑀𑐣 𑐥𑐸𑐕𑐿𑐊 (𑐌𑐎𑐬 𑐳𑑂𑐩𑐺𑐟𑐶 𑐑𑐸𑐬𑐿 𑐕𑐿!) 𑐖𑐾 𑐖𑑃 𑐮𑐎𑐷 𑐀𑐥𑐣 𑐬𑐎𑑂𑐲𑐵 𑐎𑐬𑐊 𑐟𑐏𑐣? 𑐟𑐂𑐥𑐬 𑐥𑑀𑐖𑑀 𑐧𑐵𑐖𑐿𑐊 𑐖𑐾 𑐮𑐎𑐷 𑐎𑐏𑐣𑑀 𑐀𑐥𑐣 𑐬𑐎𑑂𑐲𑐵 𑐣𑐿 𑐎𑐬𑐿𑐊𑑋 𑐩𑐸𑐡𑐵 𑐊𑐳𑑂𑐚𑑂𑐬𑐵𑐐𑑀𑐣 𑐣𑐿 𑐰𑑂𑐮𑐵𑐡𑐷𑐩𑐷𑐬 𑐮𑐎𑐷𑐎𑐾𑑃 𑐥𑐊𑐬𑐳𑑃 𑐩𑐵𑐬’ 𑐮𑐐𑐿𑐊 𑐩𑐸𑐡𑐵 𑐀𑐥𑐣𑐾 𑐌𑐎𑐬𑐵 𑐔𑑀𑐚 𑐮𑐵𑐐𑐶 𑐖𑐵𑐂 𑐕𑐿𑑋 𑐑𑐚𑐣𑐵𑐎𑑂𑐬𑐩𑐳𑑃 𑐮𑐐𑐿 𑐕𑐿 𑐖𑐾 𑐥𑑀𑐖𑑀 𑐁𑐧 𑐀𑐥𑐣𑐵𑐳𑑃 𑐛𑐵𑐝𑑆 𑐨’ 𑐐𑐾𑐮 𑐀𑐕𑐶𑑋
𑐥𑑀𑐖𑑀 𑐖𑐾 𑐮𑐎𑐷𑐎𑐾𑑃 𑐎𑑀𑐣𑑀 𑐴𑐵𑐚𑐩𑐾 𑐧𑐾𑐔𑐿𑐮𑐾 𑐮’ 𑐖𑐵 𑐬𑐴𑐮 𑐀𑐕𑐶, 𑐎𑐾𑑃 𑐣𑐾 𑐎𑐵𑐮𑑂𑐴𑐶𑐎 𑐎𑐶𑐕𑐸 𑐩𑑀𑐣 𑐕𑐿 𑐁 𑐣𑐴𑐶𑐫𑐾 𑐎𑐵𑐮𑑂𑐴𑐶 𑐁𑐖𑐸𑐎 𑐎𑐶𑐕𑐸 𑐩𑑀𑐣 𑐬𑐴𑐟𑐿𑑋 𑐌 𑐮𑐎𑐷𑐎𑐾𑑃 𑐄𑐛𑐿𑐮𑐾 𑐎𑐴𑐿𑐊 𑐁 𑐮𑐎𑐷 𑐄𑐛𑐶 𑐖𑐵𑐂𑐊 𑐁 𑐀𑐥𑐣 𑐧𑑀𑐗 𑐄𑐛𑐵 𑐮𑐿𑐊𑑋 𑐥𑑀𑐖𑑀 𑐀𑐥𑐣 𑐔𑐵𑐧𑐸𑐎 𑐩𑐵𑑄𑐐𑐿𑐊𑑋 𑐮𑐎𑐷 𑐳𑐨 𑐧𑑀𑐗 𑐬𑐵𑐏𑐿𑐊, 𑐁 𑐔𑐵𑐧𑐸𑐎 𑐥𑑀𑐖𑑀𑐎 𑐴𑐵𑐠𑐩𑐾 𑐡’ 𑐎’ 𑐳𑐨 𑐧𑑀𑐗 𑐄𑐛𑐵 𑐮𑐿𑐊𑑋 𑐥𑑀𑐖𑑀 𑐬𑐳𑑂𑐳𑐵 𑐩𑐵𑑄𑐐𑐿𑐊, 𑐮𑐎𑐷 𑐳𑐨 𑐧𑑀𑐗 𑐬𑐵𑐏𑐶 𑐬𑐳𑑂𑐳𑐵 𑐥𑑀𑐖𑑀𑐎𑐾𑑃 𑐥𑐎𑐜𑑆𑐵 𑐎’ 𑐳𑐨 𑐧𑑀𑐗 𑐄𑐛𑐵 𑐮𑐿𑐊!
𑐮𑐎𑐷 𑐁 𑐥𑑀𑐖𑑀 𑐔𑐮𑐶 𑐖𑐵𑐂𑐊𑑋 𑐌 𑐕𑑁𑑄𑐜𑑆𑐵 𑐀𑐧𑐿𑐊𑑋 𑐌 𑐰𑑂𑐮𑐵𑐡𑐷𑐩𑐷𑐬𑐎𑐾𑑃 𑐀𑐮𑑂𑐧𑐬𑑂𑐚 𑐎𑐴𑐶 𑐳𑐩𑑂𑐧𑑀𑐢𑐶𑐟 𑐎𑐬𑐿𑐊𑑋 𑐰𑑂𑐮𑐵𑐡𑐷𑐩𑐷𑐬 𑐥𑐸𑐕𑐿 𑐕𑐿 𑐖𑐾 𑐎𑐷 𑐌 𑐌𑐎𑐬𑐵 𑐣𑐿 𑐔𑐶𑐣𑑂𑐴𑐮𑐎, 𑐎𑐷 𑐌 𑐎𑐵𑐮𑑂𑐴𑐶 𑐣𑐿 𑐁𑐊𑐮 𑐕𑐮𑑋 𑐕𑑁𑐜𑑆𑐵 𑐎𑐴𑐿𑐊 𑐖𑐾 𑐁𑐂 𑐌 𑐥𑐴𑐶𑐮 𑐧𑐾𑐬 𑐁𑐊𑐮 𑐀𑐕𑐶𑑋 𑐳𑑄𑐡𑐾𑐱 𑐰𑐊𑐴 𑐕𑐿, 𑐐𑑀𑐜𑑀 𑐁𑐂 𑐣𑐿 𑐁𑐊𑐟 𑐩𑐸𑐡𑐵 𑐎𑐵𑐮𑑂𑐴𑐶 𑐀𑐰𑐱𑑂𑐫 𑐁𑐊𑐟𑑋 𑐰𑑂𑐮𑐵𑐡𑐷𑐩𑐷𑐬 𑐥𑐸𑐕𑐿𑐊 𑐖𑐾 “𑐐𑑀𑐜𑑀” 𑐎𑐬𑐿𑐊 𑐎𑐷? 𑐟𑑃 𑐕𑑁𑐜𑑆𑐵 𑐎𑐴𑐿𑐊 𑐖𑐾 𑐐𑑀𑐜𑑀 𑐎𑐶𑐕𑐸 𑐣𑐿 𑐎𑐬𑐿𑐊𑑋 𑐰𑑂𑐮𑐵𑐡𑐷𑐩𑐷𑐬 𑐥𑐸𑐕𑐿𑐊 𑐖𑐾 𑐕𑑁𑐜𑑆𑐵𑐎 𑐨𑐵𑐊 𑐎𑐾𑐴𑐣 𑐕𑐿𑑋 𑐟𑑃 𑐄𑐟𑑂𑐟𑐬 𑐨𑐾𑐚𑐿 𑐕𑐿 , 𑐌 𑐡𑐸𑐏𑐶𑐟 𑐕𑐿𑑋 𑐰𑑂𑐮𑐵𑐡𑐷𑐩𑐷𑐬 𑐥𑐸𑐕𑐿𑐊 𑐖𑐾 𑐎𑐷 𑐎𑐵𑐮𑑂𑐴𑐶 𑐌𑐎𑐬 𑐨𑐵𑐊 𑐁𑐊𑐮 𑐕𑐮𑐿- 𑐟𑑃 𑐳𑐾 𑐕𑑁𑐜𑑆𑐵𑐎𑐾𑑃 𑐣𑐿 𑐧𑐸𑐗𑐮 𑐕𑐿𑑋 𑐕𑑁𑐜𑑆𑐵 𑐄𑐟𑑂𑐟𑐬 𑐡𑐿𑐟 𑐎𑐴𑐿𑐊 𑐖𑐾 𑐐𑑀𑐜𑑀𑐎𑐾𑑃 𑐡𑐵𑐝𑑆𑐷 𑐕𑐿 𑐁 𑐌 𑐎𑐵𑐬𑐷 𑐣𑐿 𑐐𑑀𑐬 𑐕𑐿𑑋 𑐕𑑁𑐜𑑆𑐵 (𑐥𑐴𑐶𑐮 𑐀𑑄𑐎 𑐖𑐎𑐵𑑃) 𑐥𑐸𑐕𑐿𑐊 𑐖𑐾 𑐌 𑐐𑑀𑐜𑑀𑐎𑐾𑑃 𑐎𑐷 𑐖𑐵 𑐎’ 𑐎𑐴𑐟𑐿𑑋 𑐰𑑂𑐮𑐵𑐡𑐷𑐩𑐷𑐬 𑐎𑐴𑐿𑐊- 𑐖𑐵 𑐎’ 𑐎𑐴𑐹 𑐖𑐾 𑐟𑑀𑐬𑐵 𑐴𑐩𑐬𑐵 𑐳𑐨𑐳𑑃 𑐨𑐾𑑃𑐚 𑐨𑐾𑐮𑐄𑑋 𑐰𑑂𑐮𑐵𑐡𑐷𑐩𑐷𑐬 𑐕𑑁𑐜𑑆𑐵𑐥𑐬 𑐕𑐜𑑆𑐥𑐿𑐊 𑐩𑐸𑐡𑐵 𑐌 𑐥𑐜𑑆𑐵 𑐖𑐵𑐂𑐊𑑋 𑐳𑐹𑐬𑑂𑐫𑐵𑐳𑑂𑐟 𑐴𑑀𑐂 𑐕𑐿𑑋 𑐔𑐣𑑂𑐡𑑂𑐬𑐩𑐵 𑐡𑐾𑐏𑐵 𑐥𑐜𑑆𑐿 𑐕𑐿𑑋
𑐊𑐳𑑂𑐚𑑂𑐬𑐵𑐐𑑀𑐣 𑐎𑐴𑐿𑐊 𑐖𑐾 𑐖𑑃 𑐡𑐸𑐣𑐹 𑐐𑑀𑐚𑐾 𑐀𑐮𑐐 𑐨’ 𑐖𑐵𑐊 𑐟𑑃 𑐃 𑐡𑐸𑐣𑐹 𑐮𑐾𑐮 𑐣𑐷𑐎 𑐴𑐾𑐟𑐿𑑋 𑐖𑑃 𑐎𑐵𑐮𑑂𑐴𑐶 𑐐𑑀𑐜𑑀 𑐣𑐿 𑐊𑐟𑐿 𑐟𑑃 𑐌 𑐡𑐸𑐣𑐹 𑐐𑑀𑐚𑐾 𑐬𑐳𑑂𑐳𑐵𑐳𑑃 𑐮𑐚𑐎𑐶 𑐖𑐵𑐊𑐟 (𑐰𑑂𑐮𑐵𑐡𑐷𑐩𑐷𑐬 𑐎𑐴𑐿𑐊) 𑐁 𑐖𑑃 𑐊𑐟𑐿 𑐟𑑃 𑐧𑐔𑐶 𑐖𑐵𑐊𑐟𑑋 𑐰𑑂𑐮𑐵𑐡𑐷𑐩𑐷𑐬 𑐮𑐎𑐷𑐎 𑐴𑐿𑐚𑐩𑐾 𑐟𑐵𑐎𑐿𑐊, 𑐴𑐶𑐮𑐧𑐿𑐊, 𑐦𑐾𑐬 𑐥𑐴𑐶𑐬𑐿𑐊𑑋 𑐡𑐸𑐣𑐹 𑐖𑐾𑐧𑐵𑐎 𑐣𑐶𑐬𑑂𑐞𑐫 𑐎𑐬𑐿𑐊 𑐩𑐸𑐡𑐵 𑐎𑐶𑐫𑑀 𑐣𑐿 𑐴𑐶𑐮𑐿𑐊𑑋 𑐥𑐬𑑂𑐡𑐵 𑐏𑐳𑐿𑐟 𑐀𑐕𑐶𑑋
............
𑐴𑐿𑐬𑑀𑐮𑑂𑐜 𑐥𑐶𑑄𑐚𑐬𑐎 𑐟𑐷𑐣 𑐀𑑄𑐎𑐷𑐫 𑐣𑐵𑐚𑐎 “𑐡 𑐧𑐬𑑂𑐠𑐜𑐾 𑐥𑐵𑐬𑑂𑐚𑐷”
𑐥𑐷𑐚𑐾, 𑐩𑐾𑐐, 𑐳𑑂𑐚𑐿𑐣𑐮𑐾, 𑐮𑐸𑐮𑐸, 𑐐𑑀𑐮𑑂𑐜𑐧𑐬𑑂𑐐 𑐁 𑐩𑐿𑐎𑐎𑐵𑐣 𑐊𑐎𑐬 𑐥𑐵𑐟𑑂𑐬 𑐕𑐠𑐶𑑋
𑐥𑐴𑐶𑐮 𑐀𑑄𑐎- 𑐩𑐾𑐐 𑐥𑐷𑐚𑐾𑐎𑐾𑑃 𑐖𑐮𑐏𑐿 𑐡𑐿𑐊, 𑐥𑐸𑐕𑐿𑐊 𑐖𑐾 𑐳𑑂𑐚𑐾𑐣𑐮𑐷 𑐄𑐛𑐮𑐿 𑐁𑐎𑐶 𑐣𑐿𑑋 𑐳𑑂𑐚𑐾𑐣𑐮𑐷 𑐀𑐧𑐿𑐊, 𑐌𑐎𑐬𑑀 𑐩𑐾𑐐 𑐖𑐮𑐏𑐿 𑐡𑐿𑐊𑑋 𑐥𑐷𑐚𑐾 𑐎𑐵𑐖𑐥𑐬 𑐔𑐮𑐶 𑐖𑐵𑐂𑐊𑑋 𑐩𑐾𑐐 𑐁 𑐳𑑂𑐚𑐿𑐣𑐮𑐾𑐩𑐾 𑐀𑑄𑐟𑐬𑑄𑐐 𑐐𑐥 𑐴𑑀𑐂𑐊, 𑐴𑑃𑐳𑐷 𑐩𑐖𑐵𑐎 𑐴𑑀𑐂𑐊𑑋 𑐥𑐷𑐚𑐾 𑐩𑐾𑐐𑐳𑑃 𑐎𑐴𑐣𑐾 𑐬𑐴𑐿 𑐖𑐾 𑐡𑐹 𑐐𑑀𑐚𑐾 𑐊𑐟𑐿 𑐁 𑐎𑐶𑐕𑐸 𑐡𑐶𑐣 𑐌𑐎𑐬𑐵 𑐑𑐬𑐩𑐾 𑐬𑐴𑐟𑐿𑑋 𑐌𑐎𑐬 𑐑𑐬 𑐳𑐹𑐔𑐷 (𑐧𑑀𑐬𑑂𑐜𑐶𑑄𑐐 𑐴𑐵𑐄𑐳)𑐩𑐾 𑐕𑐿𑑋 𑐳𑑂𑐚𑐿𑐣𑐮𑐷 𑐃 𑐳𑐸𑐣𑐶 𑐥𑐹𑐕-𑐥𑐵𑐕 𑐎𑐬𑐿 𑐕𑐿, 𑐌 𑐔𑐶𑑄𑐟𑐶𑐟 𑐨’ 𑐖𑐵𑐂𑐊𑑋 𑐳𑑂𑐚𑐿𑐣𑐮𑐷 𑐎𑐴𑐿𑐊 𑐖𑐾 𑐌𑐎𑐬𑐵 𑐥𑐾𑐬𑐶𑐳𑐩𑐾 𑐣𑐵𑐂𑐚 𑐎𑑂𑐮𑐧𑐩𑐾 𑐥𑐶𑐫𑐵𑐣𑑀 𑐧𑐖𑐾𑐧𑐵𑐎 𑐣𑑀𑐎𑐬𑐷𑐎 𑐁𑐦𑐬 𑐁𑐊𑐮 𑐕𑐿𑑋 𑐦𑐾𑐬 𑐊𑐠𑐾𑑄𑐳, 𑐎𑐶𑑄𑐣𑑂𑐳𑐚𑐾𑐣𑐚𑐶𑐣𑑀𑐥𑐮, 𑐖𑐵𑐐𑑂𑐬𑐾𑐧, 𑐰𑑂𑐮𑐵𑐡𑐷𑐰𑑀𑐳𑑂𑐚𑐎 𑐳𑐾𑐴𑑀𑑋 𑐃 𑐳𑐩𑑂𑐥𑐹𑐬𑑂𑐞 𑐰𑐶𑐱𑑂𑐰𑐎 𑐡𑐬𑑂𑐱𑐣𑐧𑐮𑐵 𑐣𑑀𑐎𑐬𑐷 𑐀𑐕𑐶𑑋 𑐥𑐸𑐕𑐮𑐵𑐥𑐬 𑐌 𑐎𑐴𑐿𑐊 𑐖𑐾 𑐌 𑐳𑑄𑐥𑐹𑐬𑑂𑐞 𑐰𑐶𑐱𑑂𑐰, 𑐳𑑄𑐥𑐹𑐬𑑂𑐞 𑐡𑐾𑐱𑐩𑐾 𑐥𑐶𑐫𑐵𑐣𑑀 𑐧𑐖𑐾𑐣𑐾 𑐀𑐕𑐶𑑋 𑐊𑐎 𑐧𑐾𑐬 𑐌 𑐎𑑄𑐳𑐬𑑂𑐚 𑐳𑐾𑐴𑑀 𑐎𑐾𑐣𑐾 𑐬𑐴𑐊𑑋 𑐦𑐾𑐬 𑐌 𑐎𑐴𑐿𑐊 𑐖𑐾 𑐥𑐴𑐶𑐮 𑐎𑑄𑐳𑐬𑑂𑐚 𑐩𑐾 𑐌 𑐳𑑂𑐠𑐵𑐣𑐎 𑐥𑐟𑐵 𑐴𑐬𑐵 𑐡𑐾𑐮𑐎 𑐁 𑐣𑐿 𑐥𑐴𑐸𑑃𑐔𑐶 𑐳𑐎𑐮𑑋 𑐡𑑀𑐳𑐬 𑐎𑑄𑐳𑐬𑑂𑐚𑐩𑐾 𑐖𑐏𑐣 𑐌 𑐥𑐴𑐸𑑃𑐔𑐮 𑐟𑑃 𑐳𑑂𑐠𑐮𑐥𑐬 𑐟𑐵𑐮𑐵 𑐮𑐵𑐐𑐮 𑐬𑐴𑐿𑑋 𑐩𑐾𑐐𑐎 𑐂𑐔𑑂𑐕𑐵 𑐣𑐿 𑐕𑐿 𑐖𑐾 𑐳𑑂𑐚𑐾𑐣𑐮𑐷 𑐎𑐟𑑁 𑐖𑐵𑐊𑑋
𑐳𑑂𑐚𑐾𑐣𑐮𑐷𑐎𑐾𑑃 𑐮𑐵𑐐𑐿 𑐕𑐿 𑐖𑐾 𑐌 𑐡𑐸𑐣𑐹 𑐐𑑀𑐚𑐾 𑐎𑐎𑐬𑑀 𑐏𑑀𑐖𑐩𑐾 𑐀𑐕𑐶𑑋 𑐮𑐸𑐮𑐸𑐎 𑐀𑐧𑐵𑐖 𑐀𑐧𑐿𑐊𑑋 𑐩𑐾𑐐 𑐏𑐬𑐷𑐡𑐵𑐬𑐷𑐎 𑐗𑑀𑐬𑐵 𑐮’ 𑐎’ 𑐧𑐴𑐬𑐵 𑐖𑐵𑐂𑐊, 𑐎𑐶𑐫𑑀 𑐌𑐎𑐬𑐵𑐳𑑃 𑐩𑐶𑐳𑐾𑐖 𑐧𑑀𑐮𑑂𑐳 𑐳𑐩𑑂𑐧𑑀𑐢𑐶𑐟 𑐎’ 𑐐𑐥 𑐎𑐬𑐿 𑐕𑐿𑑋 𑐮𑐸𑐮𑐸 𑐀𑐧𑐿𑐊 𑐁 𑐳𑑂𑐚𑐿𑐣𑐮𑐷𑐳𑑃 𑐐𑐥 𑐎𑐬𑐿𑐊𑑋 𑐮𑐸𑐮𑐸 𑐧𑐴𑐬𑐵𑐂𑐊 𑐟𑑃 𑐐𑑀𑐮𑑂𑐜𑐧𑐬𑑂𑐐 𑐁 𑐩𑐿𑐎𑐎𑐾𑐣 𑐀𑐧𑐿𑐊𑑋 𑐩𑐿𑐎𑐎𑐾𑐣 𑐐𑑀𑐮𑑂𑐜𑐧𑐬𑑂𑐐𑐎𑐾𑑃 𑐣𑐿𑐚 𑐎𑐴𑐶 𑐳𑐩𑑂𑐧𑑀𑐢𑐶𑐟 𑐎𑐬𑐿𑐊𑑋 𑐳𑑂𑐚𑐿𑐣𑐮𑐷 𑐔𑑀𑐬𑐵 𑐎’ 𑐥𑐴𑐶𑐣𑐴𑐶𑐫𑐾 𑐧𑐴𑐬𑐵 𑐖𑐵𑐂𑐊𑑋 𑐩𑐾𑐐 𑐀𑐧𑐿𑐊, 𑐐𑑀𑐮𑑂𑐜𑐧𑐬𑑂𑐐 𑐌𑐎𑐬𑐵 𑐩𑐶𑐳𑐾𑐖 𑐧𑑀𑐮𑑂𑐳 𑐎𑐴𑐶 𑐳𑐩𑑂𑐧𑑀𑐢𑐶𑐟 𑐎𑐬𑐿𑐊 𑐁 𑐀𑐥𑐣𑐵𑐎𑐾𑑃 𑐐𑑀𑐮𑑂𑐜𑐧𑐬𑑂𑐐 𑐁 𑐳𑑄𑐐𑐷𑐎𑐾𑑃 𑐩𑐿𑐎𑐎𑐾𑐣 𑐎𑐴𑐶 𑐥𑐬𑐶𑐔𑐫 𑐡𑐿𑐊𑑋 𑐐𑐥𑐱𑐥𑐎 𑐎𑑂𑐬𑐩𑐩𑐾 𑐐𑑀𑐮𑑂𑐜𑐧𑐬𑑂𑐐 𑐥𑐸𑐕𑐿 𑐕𑐿 𑐖𑐾 𑐌𑐂 𑐬𑐴𑐣𑐶𑐴𑐵𑐬𑐎 𑐣𑐵𑐩 𑐎𑐷 𑐕𑐿 𑐁 𑐌 𑐎𑐷 𑐎𑐬𑐿𑐊𑑋 𑐩𑐾𑐐 𑐎𑐴𑐿𑐊 𑐖𑐾 𑐌𑐎𑐬 𑐣𑐵𑐩 𑐳𑑂𑐚𑐿𑐣𑐮𑐾 𑐰𑐾𑐧𑐬 𑐕𑐿 𑐁 𑐌 𑐊𑐎 𑐧𑐾𑐬 𑐎𑑄𑐳𑐬𑑂𑐚 𑐡𑐾𑐮𑐎 𑐩𑐸𑐡𑐵 𑐎𑐾𑐫𑐬𑐚𑐾𑐎𑐬𑐎 𑐐𑐮𑐟𑐷𑐳𑑃 𑐬𑐵𑐟𑐶𑐩𑐾 𑐌 𑐌𑐟𑐿 𑐧𑐣𑑂𑐡 𑐬𑐴𑐶 𑐐𑐾𑐮 𑐁 𑐨𑑀𑐬 𑐢𑐬𑐶 𑐧𑐣𑑂𑐡 𑐬𑐴𑐮𑑋 𑐁 𑐦𑐾𑐬 “𑐚𑐶𑐥” 𑐮’ 𑐎’ 𑐚𑑂𑐬𑐾𑐣 𑐥𑐎𑐜𑑆𑐶 𑐊𑐟’ 𑐁𑐧𑐶 𑐐𑐾𑐮𑑋 𑐟𑐏𑐣𑐾 𑐩𑐾𑐐 𑐎𑐴𑐿𑐊 𑐖𑐾 𑐁𑐂 𑐌𑐎𑐬 “𑐧𑐬𑑂𑐠𑐜𑐾” 𑐕𑐶𑐋𑑋 𑐁 𑐦𑐾𑐬 “𑐧𑐬𑑂𑐠𑐜𑐾 𑐥𑐵𑐬𑑂𑐚𑐷” 𑐣𑐶𑐬𑑂𑐢𑐵𑐬𑐶𑐟 𑐴𑑀𑐂 𑐕𑐿 9 𑐧𑐖𑐾𑑋 𑐮𑐸𑐮𑐸𑐎𑐾𑑃 𑐳𑐾𑐴𑑀 𑐧𑐾𑐬𑐹 𑐥𑐴𑐬 𑐣𑑀𑐟𑐶 𑐡𑐾𑐮 𑐖𑐾𑐟𑐿𑑋 𑐟𑐷𑐣𑐹 𑐧𑐴𑐬𑐵𑐂𑐊 𑐁 𑐳𑑂𑐚𑐿𑐣𑐮𑐷 𑐏𑐶𑐜𑑆𑐎𑐷𑐳𑑃 𑐟𑐵𑐎𑐿𑐊𑑋 𑐩𑐾𑐐 𑐀𑐧𑐿𑐊𑑋 𑐳𑑂𑐚𑐿𑐣𑐮𑐷 𑐌𑐂 𑐡𑐸𑐣𑐹𑐳𑑃 𑐁𑐱𑑄𑐎𑐶𑐟 𑐀𑐕𑐶𑑋 𑐣𑐵𑐩 𑐥𑐸𑐕𑐿𑐊 𑐟𑑃 𑐩𑐾𑐐 𑐣𑐵𑐩 𑐧𑐶𑐳𑐬𑐶 𑐖𑐵𑐂𑐊 𑐁 𑐌𑐎𑐬𑐵 𑐐𑑀𑐮𑑂𑐜.. 𑐩𑑀𑐣 𑐥𑐜𑑆𑐿 𑐕𑐿 𑐟𑑃 𑐳𑑂𑐚𑐿𑐣𑐮𑐷 𑐩𑑀𑐣 𑐥𑐵𑐜𑑆𑐿 𑐕𑐿- 𑐐𑑀𑐮𑑂𑐜𑐧𑐬𑑂𑐐𑑋 𑐩𑐾𑐐 𑐥𑐸𑐕𑐿𑐊 𑐖𑐾 𑐎𑐷 𑐳𑑂𑐚𑐾𑐣𑐮𑐷 𑐌𑐎𑐬𑐵 𑐔𑐶𑐣𑑂𑐴𑐿𑐊 𑐟𑑃 𑐳𑑂𑐚𑐿𑐣𑐮𑐷 𑐐𑐸𑐩𑑂𑐩 𑐬𑐴𑐿𑐊𑑋 𑐦𑐾𑐬 𑐳𑑂𑐚𑐿𑐣𑐮𑐷 𑐎𑐴𑐿𑐊 𑐖𑐾 𑐁𑐂 𑐌𑐎𑐬 𑐧𑐬𑑂𑐠𑐜𑐾 𑐣𑐿 𑐕𑐶𑐋𑑋 𑐩𑐾𑐐 𑐌𑐎𑐬𑐵 𑐮𑐾𑐮 𑐧𑐔𑑂𑐔𑐵𑐎 𑐜𑑂𑐬𑐩 𑐄𑐥𑐴𑐵𑐬𑐩𑐾 𑐀𑐣𑐣𑐾 𑐀𑐕𑐶 𑐁 𑐟𑐎𑐬 𑐧𑐡𑐮𑐵𑐩𑐾 𑐌 𑐳𑑂𑐚𑐿𑐣𑐮𑐷𑐳𑑃 𑐔𑐸𑐩𑑂𑐩𑐵 𑐩𑐵𑑄𑐐𑐿𑐊𑑋
𑐀𑑄𑐎 2 𑐩𑐾 𑐳𑑂𑐚𑐿𑐣𑐮𑐷 𑐁 𑐩𑐿𑐎𑑂𑐎𑐵𑐣𑐎 𑐐𑐥𑐱𑐥 𑐨’ 𑐬𑐴𑐮 𑐕𑐿𑑋 𑐳𑑂𑐚𑐿𑐣𑐮𑐷 𑐧𑐵𑐴𑐬 𑐖𑐵𑐊 𑐔𑐵𑐴𑐿𑐊𑑋 𑐌 𑐩𑐿𑐎𑑂𑐎𑐵𑐣𑐎𑐾𑑃 𑐎𑐴𑐿 𑐕𑐿 𑐖𑐾 𑐃 𑐧𑑀𑐬𑑂𑐜𑐶𑑄𑐐 𑐴𑐵𑐄𑐳 𑐣𑐿 𑐕𑐷, 𑐣𑐴𑐶𑐫𑐾 𑐎𑐴𑐶𑐫𑑀 𑐬𑐴𑐿𑑋 𑐥𑐷𑐚𑐾 𑐁 𑐐𑑀𑐮𑑂𑐜𑐧𑐬𑑂𑐐 𑐀𑐧𑐿𑐊𑑋 𑐐𑑀𑐮𑑂𑐜𑐧𑐬𑑂𑐐 𑐥𑐷𑐚𑐾𑐎𑐾𑑃 𑐩𑐶𑐳𑑂𑐚𑐬 𑐧𑑀𑐮𑑂𑐳 𑐎𑐴𑐶 𑐳𑐩𑑂𑐧𑑀𑐢𑐶𑐟 𑐎𑐬𑐿𑐊𑑋 𑐥𑐷𑐚𑐾𑐎 𑐐𑐾𑐮𑐵𑐎 𑐧𑐵𑐡 𑐳𑑂𑐚𑐿𑐣𑐮𑐷 𑐎𑐴𑐿𑐊 𑐖𑐾 𑐋 𑐑𑐬𑐎 𑐮𑑀𑐎𑐎 𑐳𑐸𑑄𑐑𑐧𑐵𑐎 𑐱𑐎𑑂𑐟𑐶 𑐔𑐮𑐶 𑐐𑐾𑐮 𑐕𑐿 𑐟𑐾𑑃 𑐌 𑐐𑑀𑐮𑑂𑐜𑐧𑐬𑑂𑐐 𑐁 𑐩𑐿𑐎𑑂𑐎𑐵𑐣𑐎 𑐏𑐟𑐬𑐵 𑐣𑐿 𑐔𑐷𑐣𑑂𑐴𑐶 𑐥𑐵𑐧𑐶 𑐬𑐴𑐮 𑐕𑐠𑐶, 𑐴𑐸𑐣𑐎𑐵 𑐳𑐨𑐎 𑐥𑑂𑐬𑐟𑐶 𑐌𑐎𑐬 (𑐳𑑂𑐚𑐿𑐣𑐮𑐷𑐎) 𑐖𑐶𑐩𑑂𑐩𑐾𑐰𑐵𑐬𑐷 𑐕𑐿𑑋
𑐩𑐿𑐎𑑂𑐎𑐵𑐣 𑐌𑐎𑐬𑐵𑐳𑑃 𑐔𑐱𑑂𑐩𑐵 𑐕𑐷𑐣𑐶 𑐮𑐿𑐊𑑋 𑐩𑐿𑐎𑑂𑐎𑐵𑐣 𑐁 𑐐𑑀𑐮𑑂𑐜𑐧𑐬𑑂𑐐 𑐌𑐎𑐬𑐵𑐳𑑃 𑐥𑐸𑐕𑐿𑐊 𑐖𑐾 𑐌 𑐎𑐶𑐊 𑐀𑐥𑐣 𑐥𑐟𑑂𑐣𑐷𑐎 𑐴𑐟𑑂𑐫𑐵 𑐎𑐾𑐮𑐎𑑋 𑐌 𑐣𑐵𑐩 𑐧𑐡𑐮𑐣𑐾 𑐀𑐕𑐶 𑐁 𑐔𑐬𑐶𑐟𑑂𑐬𑐴𑐷𑐣 𑐀𑐕𑐶, 𑐳𑑂𑐟𑑂𑐬𑐷𑐎𑐾𑑃 𑐡𑐹𑐲𑐶𑐟 𑐎𑐬𑐿𑐊𑑋
𑐗𑐐𑐜𑑆𑐵 𑐱𑐸𑐬𑐹 𑐴𑑀𑐂 𑐕𑐿𑑋 𑐩𑐸𑐡𑐵 𑐗𑐐𑐜𑑆𑐵 𑐬𑐸𑐎𑐮𑐵𑐎 𑐧𑐵𑐡 (𑐥𑑂𑐬𑐵𑐫𑑅 𑐩𑐾𑐐𑐎𑐾𑑃 𑐣𑐿 𑐧𑐸𑐗𑐮 𑐕𑐿) 𑐩𑐾𑐐 𑐥𑐵𑐬𑑂𑐚𑐷 𑐜𑑂𑐬𑐾𑐳𑐩𑐾 𑐀𑐧𑐿𑐊𑑋 𑐳𑐵𑐩𑐵𑐣𑑂𑐫 𑐐𑐥 𑐴𑑀𑐂 𑐕𑐿𑑋
𑐮𑐸𑐮𑐸 𑐀𑐧𑐿𑐊, 𑐐𑑀𑐮𑑂𑐜𑐧𑐬𑑂𑐐 𑐌𑐎𑐬𑐵 𑐎𑑀𑐬𑐵𑐩𑐾 𑐧𑐿𑐳𑐧𑐿𑐊𑑋 𑐮𑐸𑐮𑐸𑐎 𑐥𑐸𑐕𑐮𑐵𑐥𑐬 𑐖𑐾 𑐌𑐎𑐬𑐵 𑐟𑑃 𑐴𑑀𑐂 𑐕𑐮𑐿 𑐖𑐾 𑐌 “𑐣𑐿𑐚” 𑐕𑐷, 𑐐𑑀𑐮𑑂𑐜𑐧𑐬𑑂𑐐 𑐎𑐴𑐿 𑐕𑐿 𑐖𑐾 𑐌𑐎𑐬 𑐥𑐟𑑂𑐣𑐷 𑐌𑐎𑐬𑐵 “𑐳𑐶𑐩𑐾” 𑐎𑐴𑐶 𑐧𑐖𑐧𑐿 𑐕𑐿𑑋
𑐥𑐵𑐬𑑂𑐚𑐷𑐩𑐾 𑐏𑐾𑐮 𑐱𑐸𑐬𑐹 𑐴𑑀𑐂𑐊, 𑐁𑑃𑐏𑐶𑐩𑐾 𑐥𑐚𑑂𑐚𑐷 𑐧𑐵𑐣𑑂𑐴𑐶 𑐎’𑑋 𑐩𑐶𑐳𑐾𑐖 𑐧𑑀𑐮𑑂𑐳𑐎𑐾𑑃 𑐮𑐸𑐮𑐸 𑐳𑑂𑐎𑐵𑐬𑑂𑐦𑐳𑑃 𑐁𑑃𑐏𑐶 𑐧𑐵𑐣𑑂𑐴𑐿𑐊𑑋 𑐌 𑐖𑐎𑐬𑐵 𑐕𑐹 𑐡𑐾𑐟 𑐟𑐎𑐬𑐵 𑐁𑑃𑐏𑐶𑐥𑐬 𑐥𑐚𑑂𑐚𑐷 𑐧𑐵𑐣𑑂𑐴𑐮 𑐖𑐵𑐊𑐟𑑋 𑐌 𑐩𑐿𑐎𑑂𑐎𑐾𑐣𑐎𑐾𑑃 𑐕𑐸𑐧𑐿𑐊𑑋 𑐦𑐾𑐬 𑐳𑑂𑐚𑐿𑐣𑐮𑐷 𑐕𑐸𑐁𑐂𑐊𑑋 𑐌𑐎𑐬 𑐔𑐱𑑂𑐩𑐵 𑐮𑐾𑐮 𑐖𑐵𑐂 𑐕𑐿𑑋 𑐳𑑂𑐚𑐾𑐣𑐮𑐷𑐎𑐾𑑃 𑐥𑐚𑑂𑐚𑐷 𑐧𑐵𑐣𑑂𑐴𑐮 𑐖𑐵𑐂 𑐕𑐿𑑋 𑐩𑐿𑐎𑑂𑐎𑐾𑐣 𑐳𑑂𑐚𑐾𑐣𑐮𑐷𑐎 𑐔𑐱𑑂𑐩𑐵 𑐟𑑀𑐜𑑆𑐶 𑐡𑐿𑐊𑑋 𑐩𑐿𑐎𑑂𑐎𑐾𑐣 𑐜𑑂𑐬𑐩𑐎𑐾𑑃 𑐳𑑂𑐚𑐾𑐣𑐮𑐷𑐎 𑐬𑐳𑑂𑐟𑐵𑐩𑐾 𑐬𑐵𑐏𑐿𑐊, 𑐌 𑐏𑐳𑐶 𑐥𑐜𑑆𑐿𑐊 𑐁 𑐩𑐾𑐐𑐎 𑐐𑐬𑑂𑐡𑐣𑐶 𑐡𑐧𑐧’ 𑐔𑐵𑐴𑐿𑐊, 𑐩𑐿𑐎𑑂𑐎𑐾𑐣 𑐁 𑐐𑑀𑐮𑑂𑐜𑐧𑐬𑑂𑐐 𑐧𑐔𑐧𑐿 𑐕𑐿𑑋
𑐀𑐣𑑂𑐴𑐵𑐬 𑐥𑐳𑐬𑐿𑐊𑑋
𑐳𑑂𑐚𑐿𑐣𑐮𑐷𑐎𑐾𑑃 𑐀𑐧𑐿𑐟 𑐡𑐾𑐏𑐶 𑐮𑐸𑐮𑐸 𑐧𑐾𑐴𑑀𑐱 𑐨’ 𑐖𑐵𑐂𑐊𑑋 𑐳𑑂𑐚𑐿𑐣𑐮𑐾 𑐮𑐸𑐮𑐸𑐎𑐾𑑃 𑐚𑐾𑐧𑐸𑐮𑐥𑐬 𑐬𑐵𑐏𑐿𑐊𑑋 𑐩𑐿𑐎𑑂𑐎𑐵𑐣𑐎𑐾𑑃 𑐚𑐶𑐬𑑂𑐔 𑐨𑐾𑐚𑐿 𑐕𑐿𑑋 𑐌 𑐚𑐾𑐧𑐸𑐮 𑐁 𑐳𑑂𑐚𑐿𑐣𑐮𑐷𑐥𑐬 𑐚𑐶𑐬𑑂𑐔 𑐧𑐵𑐜𑑆𑐿𑐊𑑋
𑐀𑑄𑐎 3: 𑐥𑐷𑐚𑐾 𑐁 𑐩𑐾𑐐𑐩𑐾 𑐐𑐥 𑐴𑑀𑐂 𑐕𑐿𑑋 𑐩𑐾𑐐 𑐳𑑂𑐚𑐿𑐣𑐮𑐷𑐎 𑐰𑐶𑐲𑐫𑐩𑐾 𑐥𑐷𑐚𑐾𑐳𑑃 𑐥𑐸𑐕𑐿𑐊𑑋 𑐮𑐸𑐮𑐸 𑐀𑐧𑐿𑐊, 𑐐𑑀𑐮𑑂𑐜𑐧𑐬𑑂𑐐𑐳𑑃 𑐥𑐸𑐕𑐿𑐊 𑐖𑐾 𑐌𑐎𑐬 𑐥𑐶𑐟𑐵 𑐧𑐵 𑐊𑐜𑐷 (𑐌𑐎𑐬 𑐥𑐴𑐶𑐮 𑐥𑑂𑐬𑐾𑐩𑐷) 𑐎𑐷 𑐳𑑀𑐔𑐟 𑐖𑑃 𑐌 𑐃 𑐳𑐸𑐣𑐟𑑋 𑐌 𑐎𑐴𑐿𑐊 𑐖𑐾 𑐐𑑀𑐮𑑂𑐜𑐧𑐬𑑂𑐐 𑐀𑐥𑐣 𑐡𑐸𑐲𑑂𑐚 𑐥𑐶𑐫𑐵𑐳 𑐟𑐺𑐥𑑂𑐟 𑐎𑐾𑐮𑐎, 𑐌 𑐮𑐸𑐮𑐸𑐎𑐾𑑃 𑐳𑐾 𑐳𑐨 𑐳𑐶𑐏𑐾𑐮𑐎 𑐖𑐾 𑐊𑐎𑐚𑐵 𑐫𑐸𑐰𑐟𑐷 𑐟𑐷𑐣 𑐧𑐾𑐬 𑐧𑐶𑐫𑐵𑐴𑐮 𑐖𑐾𑐧𑐵𑐎 𑐧𑐵𑐡𑐾 𑐳𑐷𑐏𑐟𑑋 𑐐𑑀𑐮𑑂𑐜𑐧𑐬𑑂𑐐 𑐎𑐴𑐿𑐊 𑐖𑐾 𑐌 𑐃 𑐎𑐾𑐮𑐎 𑐎𑐵𑐬𑐞 𑐮𑐸𑐮𑐸 𑐌𑐎𑐬𑐵 𑐃 𑐎𑐬’ 𑐡𑐾𑐮𑐎𑑋
𑐮𑐸𑐮𑐸 𑐖𑐵𑐂𑐊𑑋
𑐩𑐾𑐐𑐎 𑐀𑐣𑐸𑐥𑐳𑑂𑐠𑐶𑐟𑐶𑐩𑐾 𑐐𑑀𑐮𑑂𑐜𑐧𑐬𑑂𑐐 𑐁 𑐩𑐿𑐎𑑂𑐎𑐵𑐣 𑐳𑑂𑐚𑐾𑐣𑐮𑐷𑐎𑐾𑑃 𑐮’ 𑐖𑐵𑐂𑐊𑑋 𑐥𑐷𑐚𑐾 𑐌𑐎𑐬𑐵 𑐕𑑀𑐜𑑆𑐿𑐮𑐾 𑐎𑐴𑐿𑐊𑑋 𑐐𑑀𑐮𑑂𑐜𑐧𑐬𑑂𑐐 𑐁 𑐩𑐿𑐎𑑂𑐎𑐵𑐣 𑐥𑐷𑐚𑐾𑐎𑐾𑑃 𑐳𑐾𑐴𑑀 𑐳𑑄𑐐𑐩𑐾 𑐔𑐮𑐿𑐮𑐾 𑐎𑐴𑐿𑐊, 𑐎𑐵𑐬𑐩𑐾 𑐖𑐐𑐴 𑐕𑐿𑑋 𑐥𑐷𑐚𑐾 𑐳𑑂𑐠𑐶𑐬 𑐬𑐴𑐿𑐊𑑋 𑐥𑐷𑐚𑐾 𑐀𑐳𑐐𑐬𑐾 𑐬𑐴𑐶 𑐖𑐵𑐂𑐊, 𑐩𑐾𑐐 𑐀𑐧𑐿𑐊𑑋 𑐥𑐸𑐕𑐿𑐊, 𑐌 𑐳𑐨 𑐐𑐾𑐮? 𑐥𑐷𑐚𑐾 𑐎𑐴𑐿𑐊- 𑐴𑑃𑑋 𑐳𑑂𑐚𑐾𑐣𑐮𑐷𑐎 𑐰𑐶𑐲𑐫𑐩𑐾 𑐩𑐾𑐐 𑐥𑐸𑐕𑐿𑐊- 𑐌 𑐳𑐸𑐟𑐮𑐾 𑐀𑐕𑐶? 𑐥𑐷𑐚𑐾 𑐎𑐴𑐿𑐊- 𑐌 𑐳𑐸𑐟𑐮 𑐀𑐕𑐶𑑋
-𑐳𑐸𑐟’ 𑐡𑐶𑐫𑑁𑑋
𑐩𑐾𑐐 𑐥𑐸𑐕𑐿𑐊- 𑐎𑐷 𑐃 𑐣𑐷𑐎 𑐥𑐵𑐬𑑂𑐚𑐷 𑐣𑐿 𑐕𑐮 𑐟𑑃 𑐥𑐷𑐚𑐾 𑐎𑐴𑐿𑐊- 𑐌 𑐧𑐵𑐡𑐩𑐾 𑐁𑐊𑐮𑑋
𑐥𑐬𑑂𑐡𑐵 𑐏𑐳𑐿𑐊𑑋
.......
𑐧𑐵𑐡𑐮 𑐳𑐬𑐎𑐵𑐬𑐎 “𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟”
“𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟” 𑐩𑐾 𑐮𑐾𑐏𑐎, 𑐎𑐵𑐎𑐷, 𑐩𑐵𑐣𑐳𑐷, 𑐀𑐩𑐮, 𑐰𑐶𑐩𑐮, 𑐎𑐩𑐮, 𑐂𑐣𑑂𑐡𑑂𑐬𑐖𑐷𑐟 𑐁 𑐂𑐣𑑂𑐡𑑂𑐬𑐖𑐷𑐟𑐎 𑐥𑐟𑑂𑐣𑐷 ( 𑐣𑐵𑐚𑐎𑐩𑐾 𑐧𑐵𑐡𑐩𑐾) 𑐡𑑀𑐳𑐬 𑐩𑐵𑐣𑐳𑐷 𑐥𑐵𑐟𑑂𑐬 𑐀𑐕𑐶𑑋
𑐀𑑄𑐎 1- 𑐮𑐾𑐏𑐎 𑐊𑐎𑐚𑐵 𑐣𑐵𑐚𑐎𑐎 𑐏𑑀𑐖𑐩𑐾 𑐀𑐕𑐶𑑋 𑐌𑐎𑐬 𑐎𑐵𑐎𑐷 𑐌𑐎𑐬 𑐏𑐾𑐣𑐵𑐂-𑐥𑐶𑐣𑐵𑐂 𑐕𑑀𑐜𑑆𑐶 𑐮𑐶𑐏𑐿𑐟 𑐬𑐴𑐧𑐵𑐥𑐬 𑐟𑐩𑐳𑐵𑐊𑐮 𑐕𑐿𑑋 𑐩𑐵𑐣𑐳𑐷 𑐥𑐸𑐕𑐿𑐊 𑐖𑐾 𑐌 𑐥𑐝𑑆𑐟 𑐖𑐾 𑐎𑐶𑐕𑐸 𑐌 𑐮𑐶𑐏𑐮𑐎𑑋 𑐮𑐾𑐏𑐎 𑐎𑐴𑐿𑐊, 𑐌 𑐎𑐶𑐕𑐸 𑐣𑐿 𑐮𑐶𑐏𑐮𑐎𑑋 𑐩𑐵𑐣𑐳𑐷 𑐌𑐎𑐬𑐵 𑐥𑑂𑐬𑐫𑐵𑐳 𑐎𑐬𑐿𑐮𑐾 𑐎𑐴𑐿 𑐕𑐿𑑋 𑐮𑐾𑐏𑐎 𑐡𑐬𑑂𑐱𑐎𑐩𑐾𑐳𑑃 𑐔𑐵𑐬𑐶𑐚𑐵 𑐧𑐵𑐡𑐩𑐾 𑐁𑐧𑐿𑐧𑐮𑐵𑐎𑐾𑑃 𑐳𑑂𑐚𑐾𑐖𑐥𑐬 𑐧𑐖𑐧𑐿𑐊, 𑐀𑐩𑐮, 𑐰𑐶𑐩𑐮, 𑐎𑐩𑐮𑑋 𑐔𑐵𑐬𑐶𑐩 𑐀𑐥𑐣 𑐣𑐵𑐩 𑐣𑐶𑐬𑑂𑐩𑐮 𑐎𑐸𑐩𑐵𑐬 𑐎𑐴𑐿𑐊𑑋 𑐮𑐾𑐏𑐎 𑐎𑐴𑐿𑐊- 𑐃 𑐣𑐿 𑐨’ 𑐳𑐎𑐿 𑐕𑐿, 𑐀𑐥𑐣 𑐀𑐳𑐮𑐷 𑐣𑐵𑐩 𑐧𑐟𑐵𑐄𑑋 𑐌 𑐎𑐴𑐿𑐊- 𑐂𑐣𑑂𑐡𑑂𑐬𑐖𑐷𑐟 𑐬𑐵𑐫𑑋 𑐀𑐩𑐮, 𑐰𑐶𑐩𑐮, 𑐎𑐩𑐮 𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟𑑋 𑐩𑐵𑐣𑐳𑐷 (𑐀𑐳𑐮𑐷 𑐣𑐵𑐩 𑐡𑑀𑐳𑐬 𑐩𑐸𑐡𑐵 𑐮𑐾𑐏𑐎 𑐎𑐴𑐿𑐊 𑐩𑐵𑐣𑐳𑐷𑐫𑐾) 𑐌𑐎𑐬 𑐩𑐩𑐶𑐫𑑁𑐟 𑐧𑐴𑐶𑐣 𑐕𑐶𑐋𑑋 𑐌 𑐌𑐎𑐬𑐵𑐳𑑃 𑐥𑑂𑐬𑐾𑐩 𑐎𑐬𑐿𑐊, 𑐥𑐬𑐩𑑂𑐥𑐬𑐵 𑐟𑑀𑐜𑑆’ 𑐔𑐵𑐴𑐿𑐊
𑐀𑑄𑐎 2: 𑐧𑐵𑐡𑐩𑐾 𑐌𑐎𑐬𑐵 𑐮𑐵𑐐𑐿 𑐕𑐿 𑐖𑐾 𑐎𑐷 𑐖𑑃 𑐃 𑐥𑑂𑐬𑐾𑐩 𑐳𑐦𑐮 𑐨𑐂𑐫𑑀 𑐖𑐾𑐟𑐿 𑐟𑑃 𑐌𑐎𑐬𑐵 𑐄𑐟𑑂𑐟𑐬 𑐨𑐾𑐚𑐟𑐿? 𑐣𑐿 𑐣𑐾𑑋 𑐌 𑐮𑑄𑐡𑐣 𑐳𑐾𑐴𑑀 𑐖𑐵𑐊𑐟𑑋 𑐩𑐺𑐟𑑂𑐫𑐸 𑐔𑐵𑐴𑐿𑐊, 𑐣𑐿 𑐎’ 𑐥𑐵𑐧𑐿𑐊𑑋 𑐮𑐾𑐏𑐎 𑐡𑑂𑐰𑐵𑐬𑐵 𑐣𑐵𑐩𑐶𑐟 𑐂𑐣𑑂𑐡𑑂𑐬𑐖𑐷𑐟𑐎 𑐩𑐵𑐣𑐳𑐷 𑐀𑐰𑐶𑐰𑐵𑐴𑐶𑐟 𑐀𑐕𑐶, 𑐴𑐖𑐵𑐬𑐷𑐧𑐵𑐐𑐩𑐾 𑐥𑐝𑑆𑐧𑐿𑐊𑑋
𑐩𑐸𑐡𑐵 𑐀𑐩𑐮, 𑐰𑐶𑐩𑐮, 𑐎𑐩𑐮𑐎 𑐰𑐶𑐥𑐬𑐷𑐟 𑐂𑐣𑑂𑐡𑑂𑐬𑐖𑐷𑐟 𑐮𑐷𑐏𑐥𑐬 𑐣𑐿 𑐔𑐮𑐿𑐊𑑋 𑐀𑐮𑐐 𑐎𑐶𑐕𑐸 𑐎𑐬’ 𑐔𑐵𑐴𑐿𑐊𑑋 𑐎𑐵𑐎𑐵, 𑐖𑐎𑐬𑐵 𑐌 𑐩𑐵𑐊 𑐎𑐴𑐿𑐊, 𑐏𑐵𑐂𑐮𑐾 𑐎𑐴𑐿 𑐕𑐿 𑐁 𑐩𑐵𑐣𑐳𑐷 𑐮𑐶𑐏𑐿𑐮𑐾𑑋 𑐩𑐸𑐡𑐵 𑐖𑐏𑐣 𑐊𑐎 𑐧𑐾𑐬 𑐩𑐵𑐣𑐳𑐷 𑐮𑐾𑐏𑐎𑐎𑐾𑑃 𑐏𑐵𑐂𑐮𑐾 𑐎𑐴𑐶 𑐡𑐿𑐊 𑐟𑑃 𑐮𑐾𑐏𑐎 𑐡𑐸𑐏𑐷 𑐨’ 𑐖𑐵𑐂𑐊, 𑐣𑐿, 𑐀𑐴𑐹𑑃? 𑐣𑐿𑑋
𑐩𑐸𑐡𑐵 𑐦𑐾𑐬 𑐩𑐵𑐣𑐳𑐷𑐎𑐾𑑃 𑐐𑐮𑐟𑐷𑐎 𑐨𑐵𑐣 𑐴𑑀𑐂 𑐕𑐿, 𑐌 𑐌𑐎𑐬 𑐮𑐾𑐏𑐣𑐎 𑐰𑐶𑐲𑐫𑐩𑐾 𑐥𑐸𑐕𑐿𑐊𑑋 𑐮𑐾𑐏𑐎 𑐔𑐶𑑄𑐟𑐶𑐟 𑐀𑐕𑐶, 𑐃 𑐂𑐣𑑂𑐡𑑂𑐬𑐖𑐷𑐟 𑐰𑐵𑐳𑑂𑐟𑐰𑐶𑐎𑐟𑐵𑐎𑐾𑑃 𑐣𑐿 𑐩𑐵𑐣𑐿𑐊, 𑐎𑑀𑐣𑑀 𑐥𑑂𑐬𑐟𑐶𑐧𑐡𑑂𑐢𑐟𑐵 𑐌𑐎𑐬𑐵𑐩𑐾 𑐣𑐿 𑐕𑐿𑑋 𑐩𑐸𑐡𑐵 𑐩𑐵𑐣𑐳𑐷 𑐳𑐾 𑐣𑐿 𑐩𑐵𑐣𑐿𑐊𑑋
𑐌 𑐳𑐥𑐣𑐵 𑐟𑑃 𑐡𑐾𑐏𑐿𑐊 𑐣𑐾𑑋
𑐂𑐣𑑂𑐡𑑂𑐬𑐖𑐷𑐟 𑐮𑑄𑐡𑐣𑐳𑑃 𑐎𑑀𑐮𑐎𑐵𑐟𑐵 𑐑𑐸𑐬𑐿𑐊, 𑐊𑐎𑐚𑐵 𑐡𑑀𑐳𑐬 𑐳𑑂𑐟𑑂𑐬𑐷𑐳𑑃 𑐧𑐶𑐫𑐵𑐴 𑐎𑐬𑐿𑐊, 𑐌𑐎𑐬𑑀 𑐣𑐵𑐩 𑐩𑐵𑐣𑐳𑐷 𑐕𑐶𑐋 (𑐂𑐣𑑂𑐡𑑂𑐬𑐖𑐷𑐟 𑐊𑐎𑐬𑐵 𑐩𑐵𑐣𑐳𑐷 𑐎𑐴𑐿𑐊, 𑐥𑐴𑐶𑐮𑐸𑐎𑐵 𑐩𑐵𑐣𑐳𑐷 𑐖𑐾𑐎𑐬𑐵 𑐮𑐾𑐏𑐎 𑐩𑐵𑐣𑐳𑐷 𑐎𑐴𑐿𑐊 𑐌 𑐂𑐣𑑂𑐡𑑂𑐬𑐖𑐷𑐟𑐎 𑐩𑐩𑐶𑐫𑑁𑐟 𑐕𑐶𑐋, 𑐖𑐎𑐬𑐵𑐳𑑃 𑐂𑐣𑑂𑐡𑑂𑐬𑐖𑐷𑐟 𑐥𑑂𑐬𑐾𑐩 𑐎𑐬𑐿𑐊 𑐩𑐸𑐡𑐵 𑐌 𑐨𑐵𑐊𑐎 𑐬𑐶𑐱𑑂𑐟𑐵𑐳𑑃 𑐌𑐎𑐬𑐵𑐳𑑃 𑐧𑐶𑐫𑐵𑐴 𑐣𑐿 𑐎𑐬𑐿𑐊 𑐖𑐾 𑐮𑑀𑐎 𑐎𑐷 𑐎𑐴𑐟𑐿, 𑐁 𑐂𑐣𑑂𑐡𑑂𑐬𑐖𑐷𑐟 𑐮𑐾𑐏𑐎𑐎𑐾𑑃 𑐎𑐴𑐿𑐟 𑐬𑐴𑐿𑐊 𑐖𑐾 𑐌𑐎𑐬 𑐣𑐵𑐩 𑐩𑐵𑐣𑐳𑐷 𑐣𑐿 𑐕𑐶𑐋𑑋 )
𑐂𑐣𑑂𑐡𑑂𑐬𑐖𑐷𑐟 𑐧𑐸𑐗’ 𑐮𑐐𑐿𑐊 (𑐩𑐵𑐣𑐳𑐷𑐎𑐾𑑃 𑐌 𑐎𑐴𑐿𑐊) 𑐖𑐾 𑐰𑑂𑐫𑐎𑑂𑐟𑐶𑐎 𑐨𑐶𑐣𑑂𑐣𑐟𑐵𑐎 𑐩𑐵𑐟𑑂𑐬 𑐨𑑂𑐬𑐩 𑐀𑐕𑐶𑑋 𑐳𑑂𑐰𑐥𑑂𑐣 𑐳𑑂𑐰𑐥𑑂𑐣 𑐀𑐕𑐶 𑐌 𑐰𑐵𑐳𑑂𑐟𑐰𑐶𑐎𑐟𑐵 𑐣𑐿 𑐧𑐣𑐶 𑐳𑐎𑐿𑐊𑑋 𑐩𑐵𑐣𑐳𑐷, 𑐩𑐵𑐣𑐳𑐷, 𑐩𑐵𑐣𑐳𑐷, 𑐳𑐨 𑐩𑐵𑐣𑐳𑐷, 𑐖𑐾𑐣𑐵 𑐀𑐩𑐮, 𑐰𑐶𑐩𑐮, 𑐎𑐩𑐮𑑋 𑐮𑐾𑐏𑐎 𑐥𑐹𑐕𑐿𑐊 𑐟𑑃 𑐂𑐣𑑂𑐡𑑂𑐬𑐖𑐷𑐟 𑐎𑐴𑐿𑐊- 𑐀𑐩𑐮, 𑐰𑐶𑐩𑐮, 𑐎𑐩𑐮 𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟 (𑐳𑐾𑐴𑑀!)𑑋
𑐮𑐾𑐏𑐎𑐎 𑐫𑐵𑐟𑑂𑐬𑐵𑐎 𑐎𑑀𑐣𑑀 𑐮𑐎𑑂𑐲𑑂𑐫 𑐣𑐿, 𑐎𑑀𑐣𑑀 𑐄𑐡𑑂𑐡𑐾𑐱𑑂𑐫 𑐣𑐿, 𑐦𑐸𑐳𑐶𑐫𑐵𑑃𑐴𑐷𑐎 𑐫𑐵𑐟𑑂𑐬𑐵 𑐖𑐎𑐬 𑐎𑑀𑐣𑑀 𑐎𑐵𑐬𑐞 𑐣𑐿𑑋 𑐮𑐾𑐏𑐎 𑐂𑐣𑑂𑐡𑑂𑐬𑐖𑐷𑐟𑐎𑐾𑑃 𑐎𑐴𑐿𑐊, 𑐴𑐩𑐬𑐵 𑐳𑐨𑐎𑐾𑑃 𑐖𑐷𑐧𑐵𑐎 𑐀𑐕𑐶, 𑐔𑐮𑐧𑐵𑐎 𑐀𑐕𑐶, 𑐎𑑀𑐣𑑀 𑐢𑐬𑑂𑐩𑐳𑑂𑐠𑐮 𑐣𑐿 𑐟𑐿𑐫𑑀 𑐟𑐷𑐬𑑂𑐠𑐫𑐵𑐟𑑂𑐬𑐵 𑐎𑐬𑐧𑐵𑐎 𑐀𑐕𑐶𑑋
𑐄𑐡𑐫 𑐣𑐵𑐬𑐵𑐫𑐞 𑐳𑐶𑑄𑐴 ‘𑐣𑐔𑐶𑐎𑐾𑐟𑐵’𑐎 “𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱”
𑐥𑑂𑐬𑐠𑐩 𑐎𑐮𑑂𑐮𑑀𑐮: 𑐃 𑐣𑐵𑐚𑐎 𑐖𑑂𑐫𑑀𑐟𑐶𑐬𑐷𑐱𑑂𑐰𑐬𑐎 𑐥𑐬𑐩𑑂𑐥𑐬𑐵𑐩𑐾 𑐎𑐮𑑂𑐮𑑀𑐮𑐩𑐾 (𑐴𑐸𑐣𑐎𑐬 𑐰𑐬𑑂𑐞 𑐬𑐟𑑂𑐣𑐵𑐎𑐬 𑐎𑐮𑑂𑐮𑑀𑐮𑐩𑐾 𑐰𑐶𑐨𑐎𑑂𑐟 𑐀𑐕𑐶 𑐖𑐾 𑐣𑐵𑐚𑐎 𑐣𑐴𑐶 𑐕𑐷, 𑐢𑐹𑐬𑑂𑐟-𑐳𑐩𑐵𑐐𑐩 𑐖𑐾 𑐖𑑂𑐫𑑀𑐟𑐶𑐬𑐷𑐱𑑂𑐰𑐬 𑐮𑐶𑐏𑐶𑐟 𑐣𑐵𑐚𑐎 𑐀𑐕𑐶- 𑐀𑑄𑐎𑐩𑐾 𑐰𑐶𑐨𑐎𑑂𑐟 𑐀𑐕𑐶) 𑐰𑐶𑐨𑐵𑐖𑐶𑐟 𑐀𑐕𑐶𑑋 𑐔𑐵𑐬𑐶 𑐎𑐮𑑂𑐮𑑀𑐮𑐎 𑐰𑐶𑐨𑐵𑐖𑐣𑐎 𑐥𑑂𑐬𑐠𑐩 𑐎𑐮𑑂𑐮𑑀𑐮 𑐳𑑂𑐰𑐬𑑂𑐐 (𑐰𑐵 𑐣𑐬𑐎) 𑐎𑐾𑐬 𑐡𑑂𑐰𑐵𑐬𑐥𑐬 𑐁𑐬𑐩𑑂𑐨 𑐴𑑀𑐂𑐟 𑐀𑐕𑐶𑑋 𑐌𑐟𑐊 𑐧𑐴𑐸𑐟 𑐬𑐵𑐳 𑐩𑐸𑐂𑐮 𑐮𑑀𑐎 𑐡𑑂𑐰𑐵𑐬𑐎 𑐨𑐷𑐟𑐬 𑐥𑑂𑐬𑐰𑐾𑐱𑐎 𑐮𑐾𑐮 𑐥𑑄𑐎𑑂𑐟𑐶𑐧𑐡𑑂𑐢 𑐕𑐠𑐶𑑋 𑐎𑑂𑐫𑑀 𑐥𑐠 𑐡𑐸𑐬𑑂𑐑𑐚𑐣𑐵𑐩𑐾 𑐱𑐶𑐎𑐵𑐬 𑐨𑐾𑐮 𑐧𑐵𑐖𑐵𑐬𑐷 𑐕𑐠𑐶 𑐟𑑃 𑐳𑑄𑐐𑐩𑐾 𑐫𑐸𑐡𑑂𑐡𑐩𑐾 𑐩𑐺𑐟 𑐨𑐾𑐮 𑐳𑐿𑐣𑐶𑐎 𑐁 𑐔𑑀𑐬𑐶 𑐎𑐬𑐊 𑐎𑐵𑐮 𑐩𑐵𑐬𑐮 𑐐𑐾𑐮 𑐔𑑀𑐬, 𑐄𑐔𑑂𑐔𑐎𑑂𑐎𑐵 𑐁 𑐥𑐶𑐎𑐶𑐚𑐩𑐵𑐬 𑐳𑐾𑐴𑑀 𑐕𑐠𑐶𑑋 𑐖𑑂𑐫𑑀𑐟𑐶𑐬𑐷𑐱𑑂𑐰𑐬𑐎 𑐢𑐹𑐬𑑂𑐟𑐳𑐩𑐵𑐐𑐩𑐩𑐾 𑐖𑐾 𑐀𑐟𑐶 𑐁𑐢𑐸𑐣𑐶𑐎 𑐀𑐧𑑂𑐳𑐬𑑂𑐜𑐶𑐚𑐷 𑐀𑐕𑐶 𑐳𑐾 𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱 𑐩𑐾 𑐳𑐾𑐴𑑀 𑐡𑐾𑐏𑐧𑐵𑐩𑐾 𑐀𑐧𑐿𑐟 𑐀𑐕𑐶𑑋 𑐥𑑂𑐬𑐠𑐩 𑐎𑐮𑑂𑐮𑑀𑐮𑐩𑐾 𑐖𑐾 𑐧𑐵𑐖𑐵𑐬𑐷 𑐕𑐠𑐶 𑐳𑐾, 𑐥𑑄𑐎𑑂𑐟𑐶 𑐟𑑀𑐜𑑆𑐶 𑐁𑐐𑐵𑑃 𑐧𑐝𑑆𑐮𑐵 𑐄𑐟𑑂𑐟𑐬, 𑐔𑑀𑐬 𑐁 𑐄𑐔𑐎𑑂𑐎𑐵 𑐡𑐸𑐣𑐹 𑐐𑑀𑐚𑐾𑐎𑐾𑑃, 𑐎𑐶𑐮𑐬 𑐥𑐎𑐜𑑆𑐶 𑐥𑐸𑐣𑑅 𑐴𑐸𑐣𑐎𑐬 𑐳𑐨𑐎 𑐩𑐹𑐮 𑐳𑑂𑐠𑐵𑐣𑐥𑐬 𑐡𑐊 𑐀𑐧𑐿𑐟 𑐕𑐠𑐶𑑋 𑐄𑐔𑐎𑑂𑐎𑐵 𑐖𑐾 𑐧𑐵𑐡𑐩𑐾 𑐥𑐟𑐵 𑐔𑐮𑐿𑐟 𑐀𑐕𑐶 𑐖𑐾 𑐐𑐸𑐞𑑂𑐜𑐵-𑐡𑐵𑐡𑐵 𑐠𑐶𑐎 𑐩𑐸𑐡𑐵 𑐧𑐵𑐖𑐵𑐬𑐷 𑐮𑐐 𑐳𑐘𑑂𑐔-𑐩𑐘𑑂𑐔 𑐬𑐴𑐿𑐟 𑐀𑐕𑐶, 𑐴𑐸𑐣𑐎𑐵𑐳𑑃 𑐀𑑄𑐐𑐵 𑐕𑑀𑐜𑑆𑐧𑐵𑐎 𑐮𑐾𑐮 𑐎𑐴𑐿𑐟 𑐀𑐕𑐶𑑋 𑐩𑐸𑐡𑐵 𑐖𑐏𑐣 𑐥𑐶𑐎𑐾𑐚𑐩𑐵𑐬 𑐧𑐵𑐖𑐵𑐬𑐷 𑐡𑐶𑐳𑐳𑑃 𑐔𑑀𑐬𑐎 𑐰𑐶𑐥𑐎𑑂𑐲𑐩𑐾 𑐧𑐖𑐿𑐟 𑐀𑐕𑐶 𑐟𑐏𑐣 𑐄𑐔𑐎𑑂𑐎𑐵 𑐔𑐎𑑂𑐎𑐹 𑐣𑐶𑐎𑐵𑐮𑐶 𑐀𑐥𑐣 𑐀𑐳𑐮 𑐬𑐹𑐥𑐩𑐾 𑐁𑐧𑐶 𑐖𑐵𑐂𑐟 𑐀𑐕𑐶 𑐁 𑐥𑐶𑐎𑐾𑐚𑐩𑐵𑐬𑐥𑐬 𑐩𑐵𑐬𑐶-𑐩𑐵𑐬𑐶 𑐎𑐊 𑐄𑐛𑐿𑐟 𑐀𑐕𑐶𑑋 𑐩𑐸𑐡𑐵 𑐖𑐏𑐣 𑐔𑑀𑐬 𑐎𑐴𑐿𑐟 𑐕𑐣𑐶 𑐖𑐾 𑐃 𑐳𑐾𑐴𑑀 𑐀𑐥𑐣𑐾 𑐧𑐶𑐬𑐵𑐡𑐬𑐷𑐎 𑐀𑐕𑐶 𑐖𑐾 𑐕𑑀𑐚-𑐕𑐷𑐣 𑐥𑐶𑐎𑐾𑐚𑐩𑐵𑐬 𑐩𑐵𑐟𑑂𑐬 𑐧𑐣𑐶 𑐳𑐎𑐮, 𑐌𑐎𑐬 𑐖𑐎𑐵𑑃 𑐩𑐵𑑃𑐖𑐮 𑐔𑑀𑐬 𑐣𑐴𑐶, 𑐁 𑐄𑐔𑐎𑑂𑐎𑐵 𑐖𑐾𑐎𑐵𑑃 𑐐𑐸𑐞𑑂𑐜𑐵-𑐧𑐡𑐩𑐵𑐱 𑐧𑐣𑐧𑐵𑐎 𑐟𑑃 𑐳𑑀𑐔𑐶𑐌 𑐣𑐘𑐶 𑐳𑐎𑐮, 𑐟𑐏𑐣 𑐄𑐔𑐎𑑂𑐎𑐵 𑐩𑐴𑐬𑐵𑐖 𑐔𑑀𑐬𑐎 𑐥𑐵𑐕𑐵𑑃 𑐥𑐜𑑆𑐶 𑐖𑐵𑐂𑐟 𑐕𑐠𑐶, 𑐖𑐾 𑐧𑐡𑐩𑐵𑐱 𑐎𑐎𑐬𑐵 𑐎𑐴𑐮𑑃𑐴𑑋 𑐁𑐧 𑐥𑐶𑐎𑐾𑐚𑐩𑐵𑐬 𑐩𑑁𑐎𑐵 𑐡𑐾𑐏𑐶 𑐥𑐎𑑂𑐲 𑐧𑐡𑐮𑐿𑐟 𑐀𑐕𑐶 𑐁 𑐄𑐔𑐎𑑂𑐎𑐵𑐎𑐾𑑃 𑐎𑐴𑐿𑐟 𑐕𑐣𑑂𑐴𑐶 𑐖𑐾 𑐀𑐴𑐵𑑃𑐎𑐾𑑃 𑐣𑐴𑐶 𑐴𑐩𑐬𑐵 𑐎𑐴𑐮𑐎𑑋 𑐳𑑄𑐐𑐾 𑐃𑐴𑑀 𑐎𑐴𑐿𑐟 𑐀𑐕𑐶 𑐖𑐾 𑐔𑑀𑐬𑐶 𑐟𑑃 𑐃 𑐟𑐾𑐴𑐣 𑐎𑐬𑐊 𑐖𑐣𑐿𑐟 𑐀𑐕𑐶, 𑐖𑐾 𑐐𑐶𑐬𑐴𑐠𑐎 𑐧𑐾𑐚𑐵 𑐁 𑐎𑐸𑐎𑐸𑐬 𑐳𑐨 𑐔𑑀𑐬𑐶 𑐎𑐬𑐿𑐟 𑐎𑐵𑐮 𑐥𑐷𑐚𑐿𑐟-𑐥𑐷𑐚𑐿𑐟 𑐊𑐟𑑇 𑐥𑐛𑐵 𑐡𑐾𑐮𑐎𑐊 𑐁 𑐴𑐩𑐬 𑐏𑐶𑐢𑐵𑑄𑐱 𑐎𑐬𑐿𑐟 𑐀𑐕𑐶, 𑐧𑐜𑑆𑐎𑐵 𑐔𑑀𑐬 𑐨𑐾𑐮𑐵 𑐴𑑃𑑋 𑐨𑐡𑑂𑐬 𑐰𑑂𑐫𑐎𑑂𑐟𑐶 𑐔𑑀𑐬𑐎 𑐧𑐐𑐾𑐧𑐵𑐣𑐷 𑐡𑐾𑐏𑐶 𑐃 𑐰𑐶𑐱𑑂𑐰𑐵𑐳 𑐣𑐴𑐶 𑐎𑐊 𑐥𑐧𑐿𑐟 𑐕𑐠𑐶 𑐖𑐾 𑐌 𑐔𑑀𑐬 𑐠𑐶𑐎𑐵𑐴𑑋 𑐟𑐵𑐴𑐶𑐥𑐬 𑐥𑐶𑐎𑐾𑐚𑐩𑐵𑐬, 𑐔𑑀𑐬 𑐩𑐴𑐵𑐬𑐵𑐖𑐎𑐾𑑃 𑐁𑐬 𑐎𑐶𑐔𑐎𑐶𑐔𑐧𑐿𑐟 𑐕𑐣𑑂𑐴𑐶𑑋 𑐟𑐏𑐣 𑐌 𑐔𑑀𑐬 𑐩𑐴𑐬𑐵𑐖 𑐊𑐴𑐶 𑐐𑐥𑐥𑐬 𑐡𑐸𑐏 𑐥𑑂𑐬𑐎𑐚 𑐎𑐬𑐿𑐟 𑐕𑐠𑐶 𑐖𑐾 𑐣𑐴𑐶 𑐟𑑃 𑐌𑐴𑐶 𑐬𑐵𑐟𑐶 𑐊𑐴𑐶 𑐥𑐶𑐎𑐾𑐚𑐩𑐵𑐬𑐎𑐾𑑃 𑐔𑑀𑐬𑐶𑐥𑐬 𑐮𑐊 𑐖𑐊𑐟𑐠𑐶 𑐁 𑐣𑐾 𑐌 𑐴𑐸𑐣𑐎𑐵 𑐥𑐶𑐚𑐿𑐟 𑐡𑐾𑐏𑐶 𑐳𑐎𑐿𑐟𑑋 𑐊𑐩𑑂𑐴𑐬 𑐧𑐖𑐵𑐬𑐷 𑐖𑐾 𑐥𑐴𑐶𑐣𑐾 𑐔𑑀𑐬 𑐁 𑐄𑐔𑑂𑐎𑑂𑐎𑐵𑐎𑐾𑑃 𑐎𑐶𑐮𑐬 𑐥𑐎𑐜𑑆𑐶 𑐑𑐶𑐳𑐶𑐫𑐵 𑐔𑐸𑐎𑐮 𑐕𑐮𑐵𑐴, 𑐐𑐸𑐩𑑂𑐩 𑐨𑐾𑐮 𑐳𑐨𑐚𑐵 𑐳𑐸𑐣𑐿𑐟 𑐕𑐠𑐶 𑐁 𑐡𑐸𑐏 𑐥𑑂𑐬𑐎𑐚 𑐎𑐬𑐿𑐟 𑐕𑐠𑐶 𑐖𑐾 𑐊𑐎𑐬𑐵 𑐳𑐨𑐎 𑐳𑑄𑐐 𑐳𑑂𑐰𑐬𑑂𑐐𑐩𑐾 𑐬𑐴𑐧, 𑐟𑑃 𑐳𑑂𑐰𑐬𑑂𑐐 𑐎𑐾𑐴𑐣 𑐴𑑀𑐊𑐟 𑐳𑐾 𑐣𑐴𑐶 𑐖𑐵𑐣𑐶𑑋 𑐁𑐧 𑐧𑐖𑐵𑐬𑐷 𑐩𑐴𑐬𑐵𑐖 𑐐𑐷𑐟𑐎 𑐊𑐎𑐚𑐵 𑐚𑐸𑐎𑐜𑑆𑐷 𑐊𑐴𑐶 𑐰𑐶𑐲𑐫𑐥𑐬 𑐥𑐝𑑆𑐿𑐟 𑐕𑐠𑐶𑑋 𑐖𑐾𑐣𑐵 𑐢𑐹𑐬𑑂𑐟𑐳𑐩𑐵𑐐𑐩𑐩𑐾 𑐐𑐷𑐟 𑐀𑐕𑐶 𑐟𑐴𑐶𑐣𑐵 𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱 𑐩𑐾 𑐳𑐾𑐴𑑀, 𑐃 𑐊𑐴𑐶 𑐳𑑂𑐠𑐮𑐥𑐬 𑐥𑑂𑐬𑐵𑐬𑐩𑑂𑐨 𑐴𑑀𑐂𑐟 𑐀𑐕𑐶 𑐖𑐾 𑐊𑐴𑐶 𑐣𑐵𑐚𑐎𑐎𑐾𑑃 𑐳𑑄𑐐𑐷𑐟𑐎 𑐧𑐣𑐵 𑐡𑐿𑐟 𑐀𑐕𑐶𑑋 𑐌𑐩𑑂𑐴𑐬 𑐥𑐶𑐎𑐾𑐚𑐩𑐵𑐬𑐖𑐷 𑐳𑐨𑐎 𑐥𑐶𑐎𑐾𑐚 𑐎𑐵𑐚𑐶 𑐮𑐿𑐟 𑐕𑐠𑐶 𑐁 𑐧𑐚𑐸𑐁 𑐳𑐵𑐦 𑐎𑐊 𑐡𑐿𑐟 𑐕𑐠𑐶𑑋 𑐁𑐧 𑐦𑐾𑐬 𑐐𑐷𑐟𑐩𑐫 𑐦𑐎𑐜𑑆𑐵 𑐱𑐸𑐬𑐹 𑐨𑐊 𑐖𑐵𑐂𑐟 𑐀𑐕𑐶 𑐩𑐸𑐡𑐵 𑐟𑐏𑐣𑐾 𑐊𑐎𑐚𑐵 𑐩𑐺𑐟 𑐬𑐡𑑂𑐡𑐷𑐧𑐮𑐵 𑐳𑐨𑐎 𑐟𑑄𑐡𑑂𑐬𑐵𑐎𑐾𑑃 𑐟𑑀𑐜𑑆𑐶 𑐡𑐿𑐟 𑐕𑐠𑐶, 𑐃 𑐎𑐴𑐶 𑐖𑐾 𑐫𑐩𑐵𑐮𑐫𑐎 𑐧𑐣𑑂𑐡 𑐡𑐬𑐧𑐖𑑂𑐖𑐵𑐎 𑐌𑐴𑐶 𑐥𑐵𑐬, 𑐃 𑐧𑐚𑐸𑐁 𑐁 𑐥𑐵𑐂-𑐎𑑁𑐜𑑆𑐷 𑐎𑑀𑐣𑑀 𑐎𑐵𑐖𑐎 𑐣𑐴𑐶 𑐀𑐕𑐶𑑋 𑐁𑐧 𑐡𑐸𑐣𑐹 𑐩𑐺𑐟 𑐨𑐡𑑂𑐬 𑐰𑑂𑐫𑐎𑑂𑐟𑐶 𑐳𑐾𑐴𑑀 𑐧𑐖𑐿𑐟 𑐕𑐠𑐶, 𑐖𑐾 𑐴𑑃 𑐡𑑀𑐳𑐬 𑐡𑐾𑐳𑐩𑐾 𑐡𑑀𑐳𑐬 𑐡𑐾𑐳𑐎 𑐳𑐶𑐎𑑂𑐎𑐵 𑐎𑐴𑐵𑑃 𑐔𑐮𑐿𑐟 𑐀𑐕𑐶𑑋 𑐁𑐧 𑐊𑐎𑐚𑐵 𑐬𑐩𑐞𑐷𑐩𑑀𑐴𑐣 𑐣𑐵𑐩𑑂𑐣𑐵 𑐩𑐺𑐟 𑐬𑐳𑐶𑐎 𑐨𑐡𑑂𑐬 𑐰𑑂𑐫𑐎𑑂𑐟𑐶𑐎 𑐡𑑀𑐳𑐬 𑐡𑐾𑐳𑐎 𑐳𑐶𑐎𑑂𑐎𑐵 𑐣𑐴𑐶 𑐔𑐮𑐧𑐵𑐎 𑐰𑐶𑐲𑐫𑐩𑐾 𑐚𑐷𑐥 𑐡𑐿𑐟 𑐕𑐠𑐶, 𑐖𑐾 𑐴𑑃 𑐃 𑐟𑑃 𑐌𑐴𑐶𑐣𑐵 𑐀𑐕𑐶 𑐖𑐾𑐣𑐵 𑐥𑑂𑐬𑐾𑐫𑐳𑐷𑐎 𑐡𑑀𑐳𑐬𑐎 𑐥𑐟𑑂𑐣𑐷 𑐧𑐣𑐧𑑋 𑐁𑐧 𑐊𑐴𑐶 𑐐𑐥𑐥𑐬 𑐑𑐩𑐬𑑂𑐠𑐣 𑐱𑐸𑐬𑐹 𑐨𑐊 𑐖𑐵𑐂𑐟 𑐀𑐕𑐶𑑋 𑐟𑐏𑐣 𑐬𑐩𑐞𑐷 𑐩𑑀𑐴𑐣 𑐐𑐥𑐎 𑐬𑐸𑐏𑐶 𑐑𑐸𑐩𑐵 𑐡𑐿𑐟 𑐕𑐠𑐶 𑐖𑐾 𑐡𑐬𑐧𑐖𑑂𑐖𑐵𑐎 𑐨𑐷𑐟𑐬 𑐬𑐩𑑂𑐨𑐵-𑐩𑐾𑐣𑐎𑐵 𑐳𑐨 𑐴𑐾𑐟𑐷𑐴𑑋 𑐨𑐶𑐏𑐩𑑄𑐐𑐣𑐷 𑐖𑐾 𑐟𑐵𑐰𑐟 𑐀𑐥𑐣 𑐎𑑀𑐬𑐵𑐩𑐾 𑐮𑐾𑐮 𑐊𑐎𑐚𑐵 𑐥𑐸𑐟𑐬𑐵𑐎𑐾𑑃 𑐡𑑀𑐳𑐬𑐵𑐎 𑐴𑐵𑐠𑐩𑐾 𑐡𑐊 𑐧𑐴𑐳𑐩𑐾 𑐱𑐵𑐩𑐶𑐮 𑐨𑑇 𑐐𑐾𑐮 𑐕𑐠𑐶, 𑐃𑐬𑑂𑐲𑑂𑐫𑐵𑐰𑐱 𑐬𑐩𑑂𑐨𑐵-𑐩𑐾𑐣𑐎𑐵𑐎𑐾𑑃 𑐩𑐸𑑃𑐴𑐗𑐜𑑆𑐎𑐷 𑐂𑐟𑑂𑐫𑐵𑐡𑐶 𑐎𑐴𑐿𑐟 𑐕𑐠𑐶𑑋 𑐩𑐸𑐡𑐵 𑐥𑐶𑐎𑐾𑐚𑐩𑐵𑐬 𑐎𑐴𑐿𑐟 𑐀𑐕𑐶 𑐖𑐾 𑐨𑐷𑐟𑐬𑐩𑐾 𑐳𑐸𑐏 𑐣𑐴𑐶 𑐡𑐸𑐏𑑀 𑐨𑐊 𑐳𑐎𑐿𑐟 𑐀𑐕𑐶𑑋 𑐊𑐴𑐶𑐥𑐬 𑐧𑐷𑐩𑐵 𑐧𑐵𑐧𑐹 𑐀𑐥𑐣 𑐎𑐵𑐬𑑂𑐫𑐎 𑐳𑑂𑐎𑑀𑐥 𑐡𑐾𑐏𑐶 𑐥𑑂𑐬𑐳𑐣𑑂𑐣 𑐨𑐊 𑐖𑐵𑐂𑐟 𑐕𑐠𑐶𑑋 𑐁𑐧 𑐥𑐶𑐎𑐾𑐚𑐩𑐵𑐬 𑐂𑐣𑑂𑐡𑑂𑐬𑐎 𑐰𑐖𑑂𑐬 𑐥𑐬 𑐬𑐸𑐥𑐿𑐫𑑂𑐫𑐵𑐎 𑐧𑑀𑐮𑐷 𑐱𑐸𑐬𑐹 𑐎𑐬𑐿𑐟 𑐀𑐕𑐶𑑋 𑐊𑐴𑐶 𑐧𑐾𑐬 𑐧𑐖𑐵𑐬𑐷 𑐟𑐣𑑂𑐡𑑂𑐬𑐵 𑐨𑑄𑐐 𑐎𑐬𑐿𑐟 𑐀𑐕𑐶 𑐁 𑐡𑐸𑐣𑐹 𑐨𑐡𑑂𑐬 𑐰𑑂𑐫𑐎𑑂𑐟𑐶 𑐴𑐸𑐣𑐎𑐬 𑐳𑐩𑐬𑑂𑐠𑐣 𑐎𑐬𑐿𑐟 𑐎𑐴𑐿𑐟 𑐀𑐕𑐶, 𑐖𑐾 𑐃 𑐀𑐡𑑂𑐨𑐸𑐟 𑐣𑐷𑐮𑐵𑐩𑐷 𑐀𑐕𑐶, 𑐖𑐾 𑐎𑐬𑐧𑐵 𑐬𑐴𑐮 𑐀𑐕𑐶 𑐳𑐾 𑐥𑐶𑐎𑐾𑐚𑐩𑐵𑐬 𑐁 𑐌𑐴𑐶𑐩𑐾 𑐱𑐵𑐩𑐶𑐮 𑐀𑐕𑐶 𑐔𑑀𑐬 𑐁 𑐨𑐶𑐏𑐩𑑄𑐐𑐣𑐷, 𑐥𑐴𑐶𑐮𑐾-𑐥𑐴𑐶𑐮 𑐳𑐸𑐣𑐮 𑐀𑐕𑐶 𑐁 𑐦𑐾𑐬 𑐳𑑄𑐐𑐷𑐟𑐩𑐫 𑐦𑐎𑐜𑑆𑐵 𑐳𑐨 𑐱𑐸𑐬𑐹 𑐨𑐊 𑐖𑐵𑐂𑐟 𑐀𑐕𑐶𑑋 𑐩𑐸𑐡𑐵 𑐟𑐏𑐣𑐾 𑐣𑑄𑐡𑐷-𑐨𑐺𑑄𑐐𑐷 𑐱𑐵𑐳𑑂𑐟𑑂𑐬𑐷𑐫 𑐳𑑄𑐐𑐷𑐟𑐥𑐬 𑐣𑐔𑐿𑐟 𑐥𑑂𑐬𑐰𑐾𑐱 𑐎𑐬𑐿𑐟 𑐕𑐠𑐶𑑋 𑐁𑐧 𑐣𑑄𑐡𑐷-𑐨𑐺𑑄𑐐𑐷𑐎 𑐃 𑐥𑐸𑐕𑐮𑐵𑐥𑐬 𑐖𑐾 𑐡𑐬𑐧𑐖𑑂𑐖𑐵𑐎 𑐨𑐷𑐟𑐬 𑐎𑐷 𑐀𑐕𑐶, 𑐳𑐨 𑐐𑑀𑐚𑐾 𑐀𑐥𑐣𑐵-𑐀𑐥𑐣𑐵 𑐴𑐶𑐳𑐵𑐧𑐳𑑃 𑐳𑑂𑐰𑐬𑑂𑐐-𑐣𑐬𑐎 𑐁 𑐀𑐎𑐵𑐳-𑐥𑐟𑐵𑐮 𑐎𑐴𑐿𑐟 𑐕𑐠𑐶𑑋 𑐩𑐸𑐡𑐵 𑐣𑑄𑐡𑐷-𑐨𑐺𑑄𑐐𑐷 𑐎𑐴𑐿𑐟 𑐕𑐠𑐶 𑐖𑐾 𑐳𑐨 𑐐𑑀𑐚𑐾 𑐳𑐟𑑂𑐫 𑐎𑐴𑐿𑐟 𑐕𑐷 𑐁 𑐎𑑂𑐫𑑀 𑐐𑑀𑐚𑐾 𑐥𑐹𑐬𑑂𑐞 𑐳𑐟𑑂𑐫 𑐣𑐴𑐶 𑐧𑐖𑐮𑐴𑐸𑑃𑑋 𑐦𑐾𑐬 𑐧𑐖𑐿𑐟-𑐧𑐖𑐿𑐟 𑐌 𑐎𑐴𑐊 𑐮𑐐𑐿𑐟 𑐕𑐠𑐶, 𑐎𑑂𑐫𑑀 𑐔𑑀𑐬𑐶 𑐎𑐵𑐮 𑐩𑐵𑐬𑐮 𑐐𑐾𑐮𑐵𑐴 (𑐔𑑀𑐬 𑐃 𑐳𑐸𑐣𑐶 𑐨𑐵𑐐𑐊 𑐮𑐐𑐿𑐟 𑐕𑐠𑐶 𑐟𑑃 𑐡𑐸-𑐟𑐷𑐣 𑐐𑑀𑐚𑐾 𑐥𑐎𑐜𑑆𑐶 𑐳𑑀𑐗𑐵𑑃 𑐮𑐊 𑐀𑐣𑐿𑐟 𑐕𑐣𑑂𑐴𑐶!) 𑐟𑑃 𑐎𑑂𑐫𑑀 𑐊𑐎𑑂𑐳𑐷𑐜𑐾𑐣𑑂𑐚𑐳𑑃, 𑐁 𑐊𑐴𑐶 𑐟𑐬𑐴𑐾𑑃 𑐳𑐨𑐚𑐵 𑐐𑐣𑐧𑐊 𑐮𑐐𑐿𑐟 𑐕𑐠𑐶, 𑐩𑐸𑐡𑐵 𑐧𑐷𑐩𑐵-𑐧𑐵𑐧𑐹 𑐎𑑀𑐣𑐵 𑐧𑐶𑐣 𑐩𑐺𑐟𑑂𑐫𑐸𑐎 𑐊𑐟𑐊 𑐁𑐫𑐮 𑐕𑐠𑐶 𑐳𑐾 𑐴𑐸𑐣𑐎𑐴𑐸 𑐮𑑀𑐎𑐣𑐶𑐎𑐾𑑃 𑐣𑐴𑐶 𑐧𑐸𑐗𑐮 𑐕𑐣𑑂𑐴𑐶 ! 𑐧𑐷𑐩𑐵 𑐧𑐵𑐧𑐹 𑐎𑐴𑐿𑐟 𑐕𑐠𑐶 𑐖𑐾 𑐌 𑐣𑐰 𑐩𑐵𑐬𑑂𑐎𑐾𑐚𑐎 𑐀𑐣𑑂𑐰𑐾𑐲𑐞𑐩𑐾 𑐁𑐊𑐮 𑐕𑐠𑐶 ! 𑐳𑐾 𑐧𑐶𑐣 𑐩𑐬𑐮 𑐳𑐾𑐴𑑀 𑐊𑐎 𑐐𑑀𑐚𑐾 𑐌𑐟𑐊 𑐕𑐠𑐶 ! 𑐨𑐺𑑄𑐐𑐷 𑐣𑑄𑐡𑐷𑐎𑐾𑑃 𑐝𑑆𑐾𑐬 𑐬𑐵𑐳 𑐧𑐷𑐩𑐵 𑐎𑐩𑑂𑐥𑐣𑐷𑐎 𑐁𑐐𑐩𑐣𑐳𑑃 𑐁𑐊𑐮 𑐎𑐩𑑂𑐥𑐷𑐚𑐶𑐱𑐣𑐎 𑐰𑐶𑐲𑐫𑐩𑐾 𑐧𑐸𑐗𑐧𑐿𑐟 𑐕𑐠𑐶 ! 𑐊𑐩𑑂𑐴𑐬 𑐥𑑂𑐬𑐾𑐩𑐷-𑐥𑑂𑐬𑐾𑐩𑐶𑐎𑐵𑐩𑐾 𑐑𑑀𑑄𑐑𑐵𑐄𑐖 𑐱𑐸𑐬𑐹 𑐴𑑀𑐂𑐟 𑐕𑐣𑑂𑐴𑐶, 𑐎𑐵𑐬𑐞 𑐥𑑂𑐬𑐾𑐩𑐷 𑐁𑐧 𑐑𑐸𑐬𑐶 𑐖𑐵𑐊 𑐔𑐵𑐴𑐿𑐟 𑐕𑐠𑐶𑑋 𑐬𑐩𑐞𑐷 𑐩𑑀𑐴𑐣 𑐥𑑂𑐬𑐾𑐩𑐷𑐎 𑐐𑐩𑐣𑐳𑑃 𑐥𑑂𑐬𑐳𑐣𑑂𑐣 𑐴𑑀𑐂𑐟 𑐕𑐠𑐶 𑐖𑐾 𑐥𑑂𑐬𑐾𑐩𑐶𑐎𑐵 𑐁𑐧 𑐀𑐳𑐐𑐬𑐾 𑐬𑐴𑐟𑐷𑐴 𑐁 𑐴𑐸𑐣𑐎𑐵 𑐮𑐾𑐮 𑐩𑑁𑐎𑐵 𑐕𑐣𑑂𑐴𑐶𑑋 𑐩𑐸𑐡𑐵 𑐨𑐺𑑄𑐐𑐷 𑐃 𑐎𑐴𑐶 𑐖𑐾 𑐊𑐟𑐊𑐳𑑃 𑐐𑐾𑐣𑐵𑐂 𑐟𑑃 𑐳𑑄𑐨𑐰 𑐣𑐴𑐶 𑐩𑐸𑐡𑐵 𑐃 𑐨𑑇 𑐳𑐎𑐿𑐟 𑐀𑐕𑐶 𑐖𑐾 𑐡𑐸𑐣𑐹 𑐖𑑀𑐜𑑆𑐷 𑐩𑐵𑐫-𑐧𑐵𑐥 (!) 𑐎𑐾𑑃 𑐊𑐎𑑂𑐳𑐷𑐜𑐾𑐣𑑂𑐚 𑐎𑐬𑐧𑐵𑐊 𑐊𑐟𑐴𑐶 𑐧𑐖𑐧𑐵 𑐮𑐾𑐮 𑐖𑐵𑐊𑑋 𑐩𑐸𑐡𑐵 𑐀𑐥𑐣𑐵 𑐮𑐾𑐮 𑐩𑐵𑐊-𑐧𑐵𑐥𑐎 𑐧𑐮𑐶 𑐮𑐾𑐮 𑐥𑑂𑐬𑐾𑐩𑐷-𑐥𑑂𑐬𑐾𑐩𑐶𑐎𑐵 𑐟𑐿𑐫𑐵𑐬 𑐣𑐴𑐶 𑐕𑐠𑐶𑑋 𑐟𑐏𑐣 𑐣𑑄𑐡𑐷 𑐨𑐺𑑄𑐐𑐷 𑐡𑐸𑐣𑐹 𑐐𑑀𑐚𑐾𑐎 𑐰𑐶𑐰𑐵𑐴 𑐐𑐵𑐖𑐵-𑐧𑐵𑐖𑐵𑐎 𑐳𑑄𑐐 𑐎𑐬𑐵 𑐡𑐿𑐟 𑐕𑐠𑐶 𑐁 𑐎𑐣𑑂𑐫𑐵𑐡𑐵𑐣 𑐎𑐬𑐿𑐟 𑐕𑐠𑐶 𑐧𑐖𑐵𑐬𑐷𑑋
𑐡𑑀𑐳𑐬 𑐎𑐮𑑂𑐮𑑀𑐮: 𑐡𑑀𑐳𑐬 𑐎𑐮𑑂𑐮𑑀𑐮𑐎 𑐁𑐬𑐩𑑂𑐨 𑐴𑑀𑐂𑐟 𑐀𑐕𑐶 𑐊𑐴𑐶 𑐁𑐨𑐵𑐳𑐳𑑃, 𑐖𑐾 𑐎𑑂𑐫𑑀 𑐣𑐾𑐟𑐵 𑐩𑐬𑐮𑐵𑐎 𑐧𑐵𑐡 𑐁𑐧𑐊𑐧𑐮𑐵 𑐕𑐠𑐶, 𑐴𑐸𑐣𑐎𑐬 𑐡𑐸𑐣𑐹 𑐀𑐣𑐸𑐔𑐬 𑐩𑐺𑐟 𑐨𑐊 𑐁𑐧𑐶 𑐔𑐸𑐎𑐮 𑐕𑐠𑐶 𑐁 𑐣𑐾𑐟𑐵𑐖𑐷𑐎 𑐀𑐊𑐧𑐵𑐎 𑐳𑐨 𑐎𑑂𑐫𑑀 𑐥𑑂𑐬𑐟𑐷𑐎𑑂𑐲𑐵 𑐎𑐊 𑐬𑐴𑐮 𑐕𑐠𑐶, 𑐡𑐸𑐣𑐹 𑐀𑐣𑐸𑐔𑐬 𑐕𑑀𑐚-𑐩𑑀𑐚 𑐨𑐵𑐲𑐞 𑐡𑐊 𑐣𑐾𑐟𑐵𑐖𑐷𑐎 𑐰𑐶𑐮𑐩𑑂𑐧𑐳𑑃 𑐀𑐊𑐧𑐵𑐎 (𑐩𑐺𑐟𑑂𑐫𑐸𑐎 𑐧𑐵𑐡𑑀 !) 𑐎𑑂𑐲𑐟𑐶𑐥𑐹𑐬𑑂𑐟𑐶 𑐎𑐊 𑐬𑐴𑐮 𑐕𑐠𑐶, 𑐐𑐷𑐟𑐎 𑐫𑑀𑐐 𑐡𑐊𑑋 𑐊𑐎𑐚𑐵 𑐐𑐷𑐟 𑐔𑑀𑐬 𑐣𑐴𑐶 𑐧𑐸𑐗𑐿𑐟 𑐕𑐠𑐶 𑐩𑐸𑐡𑐵 𑐨𑐶𑐏𑐩𑑄𑐐𑐣𑐷 𑐁 𑐬𑐡𑑂𑐡𑐷𑐧𑐮𑐵 𑐧𑐸𑐗𑐶 𑐖𑐵𑐂𑐟 𑐕𑐠𑐶, 𑐟𑐵𑐴𑐶 𑐥𑐬 𑐧𑐴𑐳 𑐱𑐸𑐬𑐹 𑐴𑑀𑐂𑐟 𑐀𑐕𑐶𑑋 𑐔𑑀𑐬𑐎𑐾𑑃 𑐀𑐥𑐣𑐵𑐎𑐾𑑃 𑐔𑑀𑐬 𑐎𑐴𑐮𑐵𑐥𑐬 𑐁𑐥𑐟𑑂𑐟𑐶 𑐀𑐕𑐶 𑐁 𑐨𑐶𑐏𑐩𑑄𑐐𑐣𑐷𑐎𑐾𑑃 𑐌 𑐨𑐶𑐏-𑐩𑑄𑐐 𑐎𑐴𑐿𑐟 𑐀𑐕𑐶 𑐟𑑃 𑐨𑐶𑐏𑐩𑑄𑐐𑐣𑐷 𑐌𑐎𑐬𑐵 𑐬𑑀𑐎𑐶 𑐎𑐴𑐿𑐟 𑐕𑐠𑐶 𑐖𑐾 𑐌 𑐳𑐬𑐶𑐳𑐰𑐥𑐵𑐴𑐷𑐎 𑐀𑐣𑐳𑐹𑐫𑐵 𑐕𑐠𑐶, 𑐩𑐶𑐠𑐶𑐮𑐵-𑐔𑐶𑐟𑑂𑐬𑐎𑐵𑐬, 𑐩𑐸𑐡𑐵 𑐡𑐶𑐮𑑂𑐮𑐷𑐎 𑐀𑐱𑑀𑐎𑐧𑐳𑑂𑐟𑐷 𑐁𑐧𑐶 𑐧𑐸𑐗𑐮𑐣𑑂𑐴𑐶 𑐖𑐾 𑐊𑐴𑐶 𑐣𑐐𑐬𑐩𑐾 𑐎𑐮𑐵-𑐰𑐳𑑂𑐟𑐸 𑐎𑑂𑐫𑑀 𑐣𑐴𑐶 𑐎𑐶𑐣𑐿𑐟 𑐀𑐕𑐶 𑐁 𑐟𑐏𑐣 𑐔𑑁𑐧𑐚𑐶𑐫𑐵𑐎 𑐨𑐶𑐏𑐩𑑄𑐐𑐣𑐷 𑐧𑐣𑐶 𑐬𑐴𑐶 𑐐𑐾𑐮𑐷𑐴𑑋 𑐔𑑀𑐬 𑐎𑐴𑐿𑐟 𑐀𑐕𑐶 𑐖𑐾 𑐩𑐵𑐟𑑂𑐬 𑐌 𑐧𑐡𑐣𑐵𑐩 𑐕𑐠𑐶, 𑐔𑑀𑐬𑐶 𑐟𑑃 𑐳𑐨 𑐎𑐬𑐿𑐟 𑐀𑐕𑐶𑑋 𑐣𑐰 𑐧𑐵𑐟 𑐎𑑀𑐣𑑀 𑐣𑐴𑐶 𑐀𑐕𑐶, 𑐳𑐨 𑐀𑐕𑐶 𑐥𑐸𑐬𑐣𑐎𑐵𑐎 𑐔𑑀𑐬𑐶𑑋 𑐟𑐎𑐬 𑐧𑐵𑐡 𑐣𑐾𑐟𑐵𑐖𑐷 𑐥𑐴𑐸𑑃𑐔𑐶 𑐖𑐵𑐂𑐟 𑐕𑐠𑐶 𑐁 𑐮𑑀𑐎𑐎 𑐔𑑀𑐬, 𑐄𑐔𑐎𑑂𑐎𑐵 𑐁 𑐥𑐶𑐎𑐾𑐚𑐩𑐵𑐬 𑐴𑑀𑐊𑐧𑐵𑐎 𑐎𑐵𑐬𑐞 𑐳𑐩𑐵𑐖𑐎 𑐳𑑂𑐠𑐶𑐟𑐶𑐎𑐾𑑃 𑐎𑐴𑐿𑐟 𑐕𑐠𑐶𑑋 𑐟𑐏𑐣𑐾 𑐊𑐎𑐚𑐵 𑐰𑐵𑐩𑐥𑑄𑐠𑐷 𑐀𑐧𑐿𑐟 𑐕𑐠𑐶 𑐁 𑐌 𑐃 𑐡𑐾𑐏𑐶 𑐎𑑂𑐲𑐸𑐧𑑂𑐢 𑐕𑐠𑐶 𑐖𑐾 𑐣𑐾𑐟𑐵𑐖𑐷 𑐔𑑀𑐬, 𑐄𑐔𑐎𑑂𑐎𑐵 𑐁 𑐥𑐶𑐎𑐾𑐚𑐩𑐵𑐬𑐳𑑃 𑐑𑐶𑐬𑐮 𑐕𑐠𑐶𑑋 𑐩𑐸𑐡𑐵 𑐔𑑀𑐬 𑐀𑐥𑐣 𑐟𑐬𑑂𑐎 𑐮𑐊 𑐥𑐸𑐣𑑅 𑐥𑑂𑐬𑐳𑑂𑐟𑐸𑐟 𑐴𑑀𑐂𑐟 𑐀𑐕𑐶 𑐁 𑐣𑐾𑐟𑐵𑐖𑐷𑐎 𑐬𑐵𑐏𑐮 “𑐔𑑀𑐬-𑐥𑐸𑐬𑐵𑐞” 𑐣𑐵𑐩𑐎 𑐁𑐢𑐵𑐬𑐥𑐬 𑐧𑐖𑐵𑐬𑐷 𑐖𑐷 𑐐𑐷𑐟 𑐱𑐸𑐬𑐹 𑐎𑐊 𑐡𑐿𑐟 𑐕𑐠𑐶𑑋
𑐟𑐾𑐳𑐬 𑐎𑐮𑑂𑐮𑑀𑐮: 𑐁𑐧 𑐣𑐾𑐟𑐵𑐖𑐷 𑐁 𑐰𑐵𑐩𑐥𑑄𑐠𑐷𑐩𑐾 𑐐𑐛𑐧𑑄𑐢𑐣 𑐁 𑐰𑐵𑐩𑐥𑑄𑐠𑐷 𑐡𑑂𑐰𑐵𑐬𑐵 𑐳𑐬𑐎𑐵𑐬𑐎 𑐧𑐵𑐴𑐬𑐳𑑃 𑐡𑐾𑐮 𑐳𑐩𑐬𑑂𑐠𑐣𑐥𑐬 𑐔𑐬𑐔𑐵 𑐱𑐸𑐬𑐹 𑐨𑐊 𑐖𑐵𑐂𑐟 𑐀𑐕𑐶𑑋 𑐣𑐾𑐟𑐵𑐖𑐷 𑐦𑐾𑐬 𑐐𑐷𑐟𑐩𑐫 𑐴𑑀𑐂𑐟 𑐕𑐠𑐶 𑐁𑐎𑐶 𑐟𑐏𑐣𑐾 𑐳𑑂𑐚𑑄𑐚-𑐳𑐷𑐣 𑐎𑐬𑐿𑐟 𑐊𑐎𑐚𑐵 𑐩𑐸𑐂𑐮 𑐀𑐨𑐶𑐣𑐾𑐟𑐵 𑐰𑐶𑐰𑐾𑐎 𑐎𑐸𑐩𑐵𑐬𑐎 𑐀𑐊𑐮𑐵𑐳𑑃 𑐁𑐎𑐬𑑂𑐲𑐞 𑐌𑐩𑑂𑐴𑐬 𑐔𑐮𑐶 𑐖𑐵𑐂𑐟 𑐀𑐕𑐶𑑋 𑐚𑐚𑐎𑐵-𑐧𑑂𑐬𑐾𑐎𑐶𑑄𑐐 𑐣𑑂𑐫𑐹𑐖 𑐡𑐾𑐧𑐵𑐎 𑐩𑐖𑐧𑐹𑐬𑐷𑐥𑐬 𑐣𑐾𑐟𑐵𑐖𑐷 𑐰𑑂𑐫𑑄𑐐𑑂𑐫 𑐎𑐬𑐿𑐟 𑐕𑐠𑐶𑑋 𑐰𑐵𑐩𑐥𑑄𑐠𑐷 𑐡𑐹 𑐧𑐾𑐬 𑐡𑐹 𑐐𑑀𑐚 𑐐𑐥- 𑐣𑐰 𑐐𑐥 𑐎𑐴𑐶 𑐖𑐵𑐂𑐟 𑐕𑐠𑐶, 𑐊𑐎 𑐖𑐾 𑐧𑐶𑐣 𑐀𑐨𑐶𑐣𑐾𑐟𑐵 𑐧𑐣𑐣𑐾 𑐎𑑂𑐫𑑀 𑐣𑐾𑐟𑐵 𑐣𑐴𑐶 𑐧𑐣𑐶 𑐳𑐎𑐿𑐟 𑐀𑐕𑐶 𑐁 𑐡𑑀𑐳𑐬 𑐖𑐾 𑐔𑑀𑐬 𑐣𑐾𑐟𑐵 𑐣𑐴𑐶 𑐧𑐣𑐶 𑐳𑐎𑐿𑐕 (𑐃 𑐔𑑀𑐬 𑐎𑐴𑐿𑐟 𑐀𑐕𑐶) 𑐩𑐸𑐡𑐵 𑐣𑐾𑐟𑐵 𑐳𑐨 𑐟𑑃 𑐔𑑀𑐬𑐶 𑐎𑐬𑐧𑐵𑐩𑐾 𑐎𑐎𑐬𑑀𑐳𑑃 𑐥𑐵𑐕𑐵𑑃 𑐣𑐴𑐶 𑐕𑐠𑐶𑑋 𑐟𑐏𑐣𑐾 𑐊𑐎𑐚𑐵 𑐄𑐔𑑂𑐔 𑐰𑑄𑐱𑐷𑐫 𑐩𑐴𑐶𑐮𑐵 𑐀𑐧𑐿𑐟 𑐕𑐠𑐶 𑐁 𑐴𑐸𑐣𑐎𑐬 𑐥𑑂𑐬𑐱𑑂𑐣𑑀𑐟𑑂𑐟𑐬𑐎 𑐧𑐵𑐡 𑐊𑐎𑐚𑐵 𑐳𑐵𑐩𑐵𑐣𑑂𑐫 𑐎𑑂𑐫𑐹𑐎 𑐳𑑄𑐐 𑐊𑐎𑐚𑐵 𑐰𑐷.𑐁𑐂.𑐥𑐷.𑐎𑑂𑐫𑐹 𑐧𑐣𑐶 𑐖𑐵𑐂𑐟 𑐀𑐕𑐶𑑋 𑐀𑐨𑐶𑐣𑐾𑐟𑐵, 𑐣𑐾𑐟𑐵 𑐁 𑐰𑐵𑐩𑐥𑑄𑐠𑐷 𑐳𑐨 𑐰𑐷.𑐁𑐂.𑐥𑐷.𑐎𑑂𑐫𑐹𑐩𑐾 𑐛𑐵𑐝𑑆 𑐨𑑇 𑐖𑐵𑐂𑐟 𑐕𑐠𑐶 ! 𑐃 𑐥𑐸𑐕𑐮𑐵𑐥𑐬 𑐖𑐾 𑐥𑑄𑐎𑑂𑐟𑐶 𑐎𑐶𑐊𑐎 𑐧𑐣𑐮 𑐀𑐕𑐶 (?) 𑐟𑐵𑐴𑐶𑐥𑐬 𑐔𑑀𑐬-𑐥𑐶𑐎𑐾𑐚𑐩𑐵𑐬 𑐎𑐴𑐿𑐟 𑐕𑐠𑐶 𑐖𑐾 𑐴𑐸𑐣𑐎𑐵 𑐮𑑀𑐎𑐣𑐶𑐎𑐾𑑃 𑐥𑑄𑐎𑑂𑐟𑐶 𑐧𑐣𑐊𑐧𑐵𑐎 (𑐁 𑐟𑑀𑐜𑑆𑐧𑐵𑐎 𑐳𑐾𑐴𑑀) 𑐀𑐨𑑂𑐫𑐵𑐳 𑐕𑐣𑑂𑐴𑐶𑑋
𑐔𑐟𑐸𑐬𑑂𑐠 𑐎𑐮𑑂𑐮𑑀𑐮: 𑐫𑐩𑐬𑐵𑐖 𑐳𑐨𑐎 𑐏𑐵𑐟𑐵-𑐏𑐾𑐳𑐬𑐵 𑐡𑐾𑐏𑐶 𑐮𑐿𑐟 𑐕𑐠𑐶 𑐁 𑐔𑐶𑐟𑑂𑐬𑐐𑐸𑐥𑑂𑐟 𑐃 𑐬𑐴𑐳𑑂𑐫𑑀𑐡𑑂𑐑𑐵𑐚𑐣 𑐎𑐬𑐿𑐟 𑐕𑐠𑐶 𑐖𑐾 𑐊𑐎 𑐫𑐸𑐐 𑐕𑐮 𑐖𑐏𑐣 𑐳𑑀𑐗𑐵𑑃𑐎 𑐡𑐬𑐧𑐖𑑂𑐖𑐵 𑐏𑐸𑐖𑐶𑐟𑑀 𑐕𑐮 𑐁 𑐧𑐣𑑂𑐣 𑐳𑐾𑐴𑑀 𑐴𑑀𑐂𑐟 𑐕𑐮𑑋 𑐣𑑄𑐡𑐷 𑐨𑐺𑑄𑐐𑐷 𑐥𑐴𑐶𑐣𑐴𑐶 𑐳𑐹𑐔𑐶𑐟 𑐎𑐊 𑐡𑐾𑐮𑐣𑑂𑐴𑐶 𑐖𑐾 𑐳𑑀𑐗𑐵𑑃𑐎 𑐡𑐬𑐧𑐖𑑂𑐖𑐵 𑐳𑑂𑐰𑐥𑑂𑐣 𑐣𑐴𑐶, 𑐩𑐵𑐟𑑂𑐬 𑐧𑐸𑐗𑐧𑐵𑐎 𑐡𑑀𑐲 𑐕𑐮𑑋 𑐡𑐬𑐧𑐖𑑂𑐖𑐵𑐎 𑐌𑐴𑐶 𑐥𑐵𑐬 𑐎𑐷 𑐀𑐕𑐶 𑐟𑐵𑐴𑐶 𑐰𑐶𑐲𑐫𑐩𑐾 𑐳𑐨 𑐎𑑂𑐫𑑀 𑐀𑐥𑐣𑐵-𑐀𑐥𑐣𑐵 𑐴𑐶𑐳𑐵𑐧𑐳𑑃 𑐄𑐟𑑂𑐟𑐬 𑐡𑐿𑐟 𑐕𑐠𑐶𑑋 𑐔𑐶𑐟𑑂𑐬𑐐𑐸𑐥𑑂𑐟 𑐎𑐴𑐿𑐟 𑐕𑐠𑐶 𑐖𑐾 𑐳𑐨𑐎 𑐰𑐬𑑂𑐞𑐣𑐎 𑐳𑐨 𑐰𑐳𑑂𑐟𑐸 𑐕𑐿 𑐌𑐴𑐶𑐥𑐵𑐬𑑋 𑐣𑑄𑐡𑐷-𑐨𑐺𑑄𑐐𑐷 𑐳𑐹𑐔𑐶𑐟 𑐎𑐬𑐿𑐟 𑐕𑐠𑐶 𑐖𑐾 𑐊𑐴𑐶 𑐐𑐾𑐚𑐩𑐾 𑐥𑑂𑐬𑐰𑐾𑐱 𑐣𑐶𑐲𑐾𑐢 𑐕𑐿, 𑐣𑑀 𑐊𑐞𑑂𑐚𑑂𑐬𑐷 𑐎𑐾𑐬 𑐧𑑀𑐬𑑂𑐜 𑐮𑐵𑐐𑐮 𑐕𑐿𑑋 𑐁𑐴𑐶 𑐬𑐾 𑐧𑑂𑐧𑐵! 𑐁𑐧 𑐎𑐷 𑐴𑑀𑐀𑐊 ! 𑐣𑐾𑐟𑐵𑐖𑐷𑐎𑐾𑑃 𑐥𑐛𑐵𑐌𑐮 𑐖𑐵𑐂𑐟 𑐕𑐣𑑂𑐴𑐶 𑐫𑐩𑐬𑐵𑐖𑐎 𑐳𑑀𑐗𑐵𑑃, 𑐩𑐸𑐡𑐵 𑐴𑐸𑐣𑐎𑐬 𑐳𑐬𑐳𑑂𑐰𑐟𑐷 𑐌𑐟𑐊 𑐩𑐣𑑂𑐡 𑐨𑐊 𑐖𑐵𑐂𑐟 𑐕𑐣𑑂𑐴𑐶𑑋 𑐧𑐡𑐬𑐷 𑐰𑐶𑐱𑐵𑐮 𑐩𑐶𑐱𑑂𑐬 𑐥𑑂𑐬𑐳𑐶𑐡𑑂𑐢 𑐣𑐾𑐟𑐵𑐖𑐷, 𑐎𑐾𑐬 𑐏𑐶𑑄𑐔𑐵𑐃 𑐱𑐸𑐬𑐹 𑐴𑑀𑐂𑐟 𑐕𑐣𑑂𑐴𑐶 𑐀𑐳𑐮𑐷 𑐎𑐾𑐬 𑐧𑐡𑐮𑐵 𑐳𑐬𑑂𑐚𑐶𑐦𑐶𑐎𑐾𑐚 𑐧𑐮𑐵 𑐎𑐩 𑐎𑐊 𑐮𑐶𑐏𑐵𑐌𑐮 𑐄𑐩𑐬𑐶𑐥𑐬𑑋 𑐥𑐔𑐥𑐣 𑐧𑐬𑐶𑐏 𑐁𑐫𑐸 𑐁 𑐱𑐱 𑐫𑑀𑐐 𑐎𑐴𑐿𑐟 𑐀𑐕𑐶 𑐖𑐾 𑐳𑐟𑑂𑐟𑐬𑐶 𑐳𑐾 𑐅𑐥𑐬 𑐖𑐷𑐟𑐵𑐴 𑐳𑐾 𑐌 𑐁 𑐳𑑄𑐐𑐩𑐾 𑐩𑐺𑐟 𑐔𑐵𑐬𑐹 𑐳𑐿𑐣𑐶𑐎𑐎𑐾𑑃 𑐁𑐥𑐶𑐳 𑐥𑐛𑐵 𑐡𑐾𑐮 𑐖𑐵𑐂𑐟 𑐀𑐕𑐶𑑋 𑐡𑐹𑐚𑐵 𑐳𑐿𑐣𑐶𑐎 𑐣𑐾𑐟𑐵𑐖𑐷𑐎 𑐳𑑄𑐐 𑐔𑐮𑐶 𑐖𑐵𑐂𑐟 𑐕𑐠𑐶 𑐁 𑐡𑐹 𑐚𑐵 𑐀𑐣𑐸𑐔𑐬 𑐳𑐾𑐴𑑀 𑐖𑐵𑐊 𑐔𑐵𑐴𑐿𑐟 𑐀𑐕𑐶𑑋 𑐩𑐸𑐡𑐵 𑐣𑐾𑐟𑐵𑐖𑐷𑐎 𑐀𑐣𑐸𑐔𑐬 𑐳𑐨𑐎 𑐀𑐥𑐬𑐵𑐢 𑐧𑐜𑑆 𑐨𑐵𑐬𑐷, 𑐳𑐾 𑐔𑐶𑐟𑑂𑐬𑐐𑐸𑐥𑑂𑐟𑐎 𑐁𑐡𑐾𑐱𑐥𑐬 𑐣𑑄𑐡𑐷-𑐨𑐺𑑄𑐐𑐷 𑐴𑐸𑐣𑐎𑐵 𑐮𑐊, 𑐎𑐬𑐵𑐴𑐷𑐩𑐾 𑐨𑐸𑐖𑐧𑐵𑐎 𑐮𑐾𑐮 𑐧𑐵𑐴𑐬 𑐮𑐊 𑐖𑐵𑐂𑐟 𑐕𑐠𑐶 𑐟𑑃 𑐧𑐵𑑃𑐔𑐮 𑐡𑐸𑐣𑐹 𑐳𑐿𑐣𑐶𑐎 𑐴𑐸𑐣𑐎𑐵 𑐥𑐎𑐜𑑆𑐶 𑐎𑐾𑑃 𑐮𑐊 𑐖𑐵𑐂𑐟 𑐕𑐠𑐶 𑐁 𑐣𑑄𑐡𑐷-𑐨𑐺𑑄𑐐𑐷 𑐦𑐾𑐬 𑐩𑑄𑐔𑐥𑐬 𑐑𑐸𑐬𑐶 𑐀𑐧𑐿𑐟 𑐕𑐠𑐶𑑋 𑐟𑐴𑐶𑐣𑐵 𑐟𑐬𑑂𑐎𑐎 𑐧𑐵𑐡 𑐥𑑂𑐬𑐾𑐩𑐷-𑐥𑑂𑐬𑐾𑐩𑐶𑐎𑐵, 𑐡𑐸𑐣𑐹 𑐨𑐡𑑂𑐬 𑐥𑐸𑐬𑐸𑐲 𑐁 𑐧𑐖𑐵𑐬𑐷𑐎𑐾𑑃 𑐳𑐾𑐴𑑀 𑐟𑑂𑐬𑐵𑐞 𑐨𑐾𑐚𑐿𑐟 𑐕𑐣𑑂𑐴𑐶 𑐝𑑀𑐮-𑐥𑐶𑐥𑐴𑐷𑐎 𑐳𑑄𑐐 𑐴𑐸𑐣𑐎𑐵 𑐧𑐵𑐴𑐬 𑐮𑐊 𑐐𑐾𑐮 𑐖𑐵𑐂𑐟 𑐀𑐕𑐶𑑋 𑐁𑐧 𑐣𑐣𑑂𑐡𑐷 𑐖𑐏𑐣 𑐀𑐨𑐶𑐣𑐾𑐟𑐵𑐎 𑐣𑐵𑐩 𑐰𑐶𑐰𑐾𑐎 𑐎𑐸𑐩𑐵𑐬 𑐄𑐬𑑂𑐦...𑐧𑐖𑐿𑐟 𑐕𑐠𑐶 𑐟𑑃 𑐀𑐨𑐶𑐣𑐾𑐟𑐵 𑐖𑐷 𑐬𑑀𑐎𑐶 𑐡𑐿𑐟 𑐕𑐠𑐶, 𑐖𑐾 𑐎𑐟𑐾𑐎 𑐩𑐾𑐴𑐣𑐟𑐶𑐳𑑃 𑐖𑐵𑐟𑐶 𑐴𑐸𑐣𑐎𑐬 𑐥𑐵𑐕𑐵𑑃 𑐕𑑀𑐜𑑆𑐶 𑐳𑐎𑐮 𑐀𑐕𑐶, 𑐳𑐾 𑐄𑐬𑑂𑐦 𑐟𑑃 𑐕𑑀𑐜𑑆𑐶𑐊 𑐡𑐾𑐮 𑐖𑐵𑐊𑑋 𑐰𑐵𑐩𑐥𑑄𑐠𑐷 𑐐𑑀𑐲𑑂𑐛𑐷𑐎𑐾𑑃 𑐀𑐨𑐶𑐣𑐾𑐟𑐵 𑐡𑑂𑐰𑐵𑐬𑐵 𑐩𑐡𑐟𑐶 𑐎𑐾𑐬 𑐰𑐶𑐰𑐬𑐞𑐥𑐬 𑐰𑐵𑐩𑐥𑑄𑐠𑐷 𑐥𑑂𑐬𑐟𑐶𑐰𑐵𑐡 𑐎𑐬𑐿𑐟 𑐕𑐠𑐶𑑋 𑐴𑐸𑐣𑐎𑑀 𑐥𑐛𑐵 𑐡𑐾𑐮 𑐖𑐵𑐂𑐟 𑐕𑐣𑐶𑑋 𑐰𑐵𑐩𑐥𑑄𑐠𑐷𑐎 𑐎𑐷 𑐴𑐾𑐟𑐣𑑂𑐴𑐶, 𑐴𑐸𑐣𑐎𑐬 𑐎𑐠𑐵𑐩𑐾 𑐟𑑃 𑐣𑐾 𑐳𑑂𑐰𑐬𑑂𑐐-𑐣𑐬𑑂𑐎 𑐀𑐕𑐶 𑐁 𑐣𑐾 𑐫𑐩𑐬𑐵𑐖-𑐔𑐶𑐟𑑂𑐬𑐐𑐸𑐥𑑂𑐟𑑋 𑐴𑐸𑐣𑐎𑐵 𑐀𑐥𑐣 𑐨𑐰𑐶𑐲𑑂𑐫𑐎 𑐣𑐶𑐬𑑂𑐞𑐫 𑐳𑑂𑐰𑐫𑑄 𑐎𑐬𑐧𑐵𑐎 𑐀𑐰𑐳𑐬 𑐡𑐾𑐮 𑐖𑐵𑐂𑐟 𑐕𑐣𑑂𑐴𑐶𑑋 𑐩𑐸𑐡𑐵 𑐰𑐵𑐩𑐥𑑄𑐠𑐷 𑐎𑐴𑐿𑐟 𑐕𑐠𑐶 𑐖𑐾 𑐴𑐸𑐣𑐎𑐬 𑐱𑐶𑐎𑑂𑐲𑐵 𑐁𑐣 𑐥𑑂𑐬𑐎𑐵𑐬𑐎 𑐕𑐮𑐣𑑂𑐴𑐶, 𑐩𑐸𑐡𑐵 𑐊𑐏𑐣 𑐖𑐾 𑐳𑑀𑐗𑐵𑑃 𑐑𑐚𑐶𑐟 𑐨𑐊 𑐬𑐴𑐮 𑐕𑐣𑑂𑐴𑐶 𑐟𑐵𑐴𑐶𑐥𑐬 𑐎𑑀𑐣𑐵 𑐀𑐰𑐶𑐱𑑂𑐰𑐵𑐳 𑐎𑐬𑐠𑐸? 𑐩𑐸𑐡𑐵 𑐫𑐩𑐬𑐵𑐖 𑐎𑐴𑐿𑐟 𑐕𑐠𑐶 𑐖𑐾- 𑐨𑑇 𑐳𑐎𑐿𑐟 𑐀𑐕𑐶, 𑐖𑐾 𑐀𑐴𑐵𑑃 𑐡𑐾𑐏𑐶 𑐬𑐴𑐮 𑐕𑐷 𑐳𑐾 𑐡𑐸𑑅𑐳𑑂𑐰𑐥𑑂𑐣 𑐴𑑀𑐀𑐊, 𑐖𑐟𑐊 𑐥𑐿𑐳𑐿𑐟 𑐖𑐵𑐊𑐧 𑐌𑐟𑐊 𑐮𑐶𑐏𑐮 𑐀𑐕𑐶 𑐣𑑀 𑐊𑐞𑑂𑐚𑑂𑐬𑐷𑑋 𑐁𑐧 𑐫𑐩𑐬𑐵𑐖 𑐥𑑂𑐬𑐱𑑂𑐣 𑐥𑐸𑐕𑐿𑐟 𑐕𑐠𑐶 𑐖𑐾 𑐰𑐶𑐲𑐩 𑐎𑐾, 𑐩𑐣𑐸𑐎𑑂𑐏 𑐁𑐎𑐶 𑐥𑑂𑐬𑐎𑐺𑐟𑐶 ? 𑐰𑐵𑐩𑐥𑑄𑐠𑐷 𑐎𑐴𑐿𑐟 𑐕𑐠𑐶 𑐖𑐾 𑐡𑐸𑐣𑐹, 𑐩𑐸𑐡𑐵 𑐥𑑂𑐬𑐎𑐺𑐟𑐶𑐩𑐾 𑐟𑑃 𑐣𑐾𑐔𑐸𑐬𑐮 𑐖𑐳𑑂𑐚𑐶𑐳 𑐎𑐡𑐵𑐔𑐶𑐟𑑂 𑐴𑑀𑐂𑐟𑑀 𑐕𑐿 𑐩𑐸𑐡𑐵 𑐩𑐣𑐸𑐎𑑂𑐏𑐎 𑐳𑑂𑐰𑐨𑐵𑐰𑐩𑐾 𑐳𑐾 𑐐𑐸𑐣𑑂𑐖𑐵𑐂𑐱 𑐎𑐟𑐊 ? 𑐩𑐸𑐡𑐵 𑐰𑐵𑐩𑐥𑑄𑐠𑐷 𑐬𑐵𑐖𑐣𑐷𑐟𑐶 𑐊𑐎𑐬 (𑐳𑐩𑐵𑐣𑐟𑐵𑐎, 𑐳𑐸𑐢𑐵𑐬 𑐎𑐾𑐬) 𑐥𑑂𑐬𑐫𑐵𑐳 𑐎𑐬𑐿𑐟 𑐀𑐕𑐶𑑋 𑐟𑐵𑐴𑐶𑐥𑐬 𑐴𑐸𑐣𑐎𑐵 𑐳𑑄𑐐 𑐔𑑀𑐬-𑐄𑐔𑐎𑑂𑐎𑐵 𑐁 𑐥𑐶𑐎𑐾𑐚𑐩𑐵𑐬𑐎𑐾𑑃 𑐥𑐛𑐵𑐌𑐮 𑐖𑐵𑐂𑐟 𑐀𑐕𑐶, 𑐃 𑐀𑐰𑐳𑐬 𑐡𑐿𑐟 𑐖𑐾 𑐴𑐶𑐣𑐎𑐵 𑐳𑐨𑐎𑐾𑑃 𑐧𑐡𑐮𑐹𑑋 𑐔𑑀𑐬 𑐎𑐣𑐾𑐎 𑐖𑐵𑐊𑐩𑐾 𑐂𑐟𑐳𑑂𑐟𑑅 𑐎𑐬𑐿𑐟 𑐀𑐕𑐶 𑐁 𑐃 𑐖𑐶𑐖𑑂𑐘𑐵𑐳𑐵 𑐎𑐬𑐿𑐟 𑐀𑐕𑐶 𑐖𑐾 𑐴𑐩 𑐳𑐨 𑐟𑑃 𑐖𑐵𑐂𑐊 𑐬𑐴𑐮 𑐕𑐷 𑐩𑐸𑐡𑐵 𑐊𑐴𑐶𑐳𑑃 𑐁𑐐𑐵𑑃 ? 𑐣𑑄𑐡𑐷-𑐔𑐶𑐟𑑂𑐬𑐐𑐸𑐥𑑂𑐟-𑐫𑐩𑐬𑐵𑐖 𑐳𑐩𑐰𑐾𑐟 𑐳𑑂𑐰𑐬𑐩𑐾 𑐎𑐴𑐿𑐟 𑐕𑐠𑐶- 𑐣𑑀 𑐊𑐞𑑂𑐚𑑂𑐬𑐷𑑋 𑐨𑐺𑑄𑐐𑐷 𑐟𑐏𑐣𑐾 𑐀𑐧𑐿𑐟 𑐕𑐠𑐶, 𑐀𑐨𑐶𑐣𑐾𑐟𑐵𑐎𑐾𑑃 𑐕𑑀𑐜𑑆𑐣𑐾𑑋 𑐫𑐩𑐬𑐵𑐖 𑐎𑐴𑐿𑐟 𑐕𑐠𑐶 - 𑐩𑐵 𑐥𑑂𑐬𑐰𑐶𑐱𑑋 𑐨𑐺𑑄𑐐𑐷 𑐣𑐷𑐔𑐵𑑃𑐩𑐾 𑐴𑑀𑐂𑐟 𑐔𑐬𑐔𑐵𑐎 𑐐𑐥 𑐎𑐴𑐿𑐟 𑐀𑐕𑐶, 𑐖𑐾 𑐊𑐟𑐸𑐎𑑂𑐎𑐵 𑐣𑐶𑐀𑐩 𑐧𑐡𑐮𑐮 𑐖𑐊𑐧𑐵𑐎 𑐁 𑐎𑐟𑐾𑐎 𑐐𑑀𑐚𑐾𑐎𑐾𑑃 𑐥𑐺𑐠𑑂𑐰𑐷𑐥𑐬 𑐑𑐸𑐬𑐊 𑐡𑐾𑐮 𑐖𑐊𑐧𑐵𑐎 𑐔𑐬𑐔𑐵 𑐳𑐬𑑂𑐰𑐟𑑂𑐬 𑐨𑐊 𑐬𑐴𑐮 𑐀𑐕𑐶𑑋 𑐫𑐩𑐡𑐹𑐟 𑐳𑐨 𑐀𑐣𑐾𑐬𑐾 𑐎𑐜𑑆𑐵𑐴 𑐮𑐐 𑐛𑐵𑐝𑑆 𑐕𑐠𑐶 𑐎𑑂𑐫𑑀 𑐨𑐸𑐖𑐊 𑐮𑐾𑐮 𑐎𑐴𑐵𑑃 𑐨𑐾𑐚𑐮 𑐕𑐣𑑂𑐴𑐶 (𑐩𑐵𑐟𑑂𑐬 𑐡𑐹 𑐚𑐵 𑐀𑐣𑐸𑐔𑐬 𑐕𑑀𑐜𑑆𑐶)𑑋 𑐁𑐧 𑐎𑑂𑐫𑑀 𑐣𑐴𑐶 𑐁𑐧𑐊 𑐧𑐮𑐵 𑐧𑐔𑐮 𑐀𑐕𑐶, 𑐳𑐾 𑐳𑐨 𑐎𑐴𑐿𑐟 𑐕𑐠𑐶𑑋 𑐔𑐶𑐟𑑂𑐬𑐐𑐸𑐥𑑂𑐟 𑐀𑐥𑐣 𑐣𑐩𑐴𑐬 𑐡𑐵𑐝𑑆𑐷 𑐁 𑐫𑐩𑐬𑐵𑐖 𑐀𑐥𑐣 𑐩𑐸𑐎𑐸𑐚 𑐄𑐟𑐵𑐬𑐶 𑐮𑐿𑐟 𑐕𑐠𑐶 𑐁 𑐳𑑂𑐰𑐵𑐨𑐵𑐰𑐶𑐎 𑐩𑐣𑐸𑐎𑑂𑐏 𑐬𑐹𑐥𑐩𑐾 𑐁𑐧𑐶 𑐖𑐵𑐂𑐟 𑐕𑐠𑐶! 𑐩𑐸𑐡𑐵 𑐔𑐶𑐟𑑂𑐬𑐐𑐸𑐥𑑂𑐟𑐎 𑐩𑐾𑐎𑐥 𑐧𑐮𑐵 𑐣𑐩𑐴𑐬 𑐡𑐵𑐝𑑆𑐷 𑐡𑐾𑐏𑐶 𑐨𑐶𑐏𑐩𑑄𑐐𑐣𑐷 𑐖𑐾 𑐌𑐟𑐊 𑐕𑐮𑐷𑐴, 𑐴𑑃𑐳𑐶 𑐡𑐿𑐟 𑐕𑐠𑐶𑑋 𑐨𑐺𑑄𑐐𑐷 𑐄𑐡𑑂𑐑𑐵𑐚𑐣 𑐎𑐬𑐿𑐟 𑐕𑐠𑐶 𑐖𑐾 𑐨𑐶𑐏𑐩𑑄𑐐𑐣𑐷 𑐴𑐸𑐣𑐎𑐾 𑐳𑐨 𑐖𑐾𑐎𑐵𑑃 𑐎𑐮𑐵𑐎𑐵𑐬 𑐕𑐠𑐶 ! 𑐎𑑀𑐣 𑐀𑐨𑐶𑐣𑐫 ! 𑐟𑐎𑐬 𑐰𑐶𑐰𑐬𑐞 𑐩𑐸𑐴𑐧𑑂𑐧𑐟 𑐁 𑐐𑐸𑐡𑐐𑐸𑐡𑐷𑐥𑐬 𑐏𑐟𑐩 𑐴𑑀𑐂𑐟 𑐀𑐕𑐶, 𑐟𑑃 𑐨𑐶𑐏𑐩𑑄𑐐𑐣𑐷 𑐎𑐴𑐿𑐟 𑐕𑐠𑐶 𑐖𑐾 𑐣𑐴𑐶 𑐊𑐴𑐶 𑐟𑐬𑐴𑐎 𑐀𑐨𑐶𑐣𑐫 𑐟𑑃 𑐌𑐟𑐊 (𑐡𑐾𑐏𑐵 𑐎𑐊) 𑐨𑑇 𑐬𑐴𑐮 𑐀𑐕𑐶𑑋 𑐌𑐟𑑂𑐟𑑇 𑐬𑐩𑐞𑐷 𑐩𑑀𑐴𑐣 𑐁 𑐄𑐔𑑂𑐔𑐰𑑄𑐱𑐷𑐫 𑐩𑐴𑐶𑐮𑐵 𑐣𑐶𑐨𑐵𑐎 𑐬𑑀𑐩𑐵𑑄𑐳 𑐔𑐮𑐶 𑐬𑐴𑐮 𑐀𑐕𑐶𑑋 𑐩𑐸𑐡𑐵 𑐣𑐶𑐨𑐵𑐖𑐷 𑐟𑑃 𑐧𑐖𑐶𑐟𑐾 𑐣𑐴𑐶 𑐕𑐠𑐶𑑋 𑐨𑐶𑐏𑐩𑑄𑐐𑐣𑐷 𑐫𑐩𑐬𑐵𑐖𑐳𑑃 𑐎𑐴𑐿𑐟 𑐕𑐠𑐶 𑐖𑐾 𑐌 𑐟𑐏𑐣𑐾 𑐧𑐖𑐟𑐷𑐴 𑐖𑐏𑐣 𑐊𑐴𑐶 𑐡𑐬𑐧𑐖𑑂𑐖𑐵𑐎 𑐟𑐵𑐮𑐵𑐎 𑐔𑐵𑐨𑐷 𑐴𑐸𑐣𑐎𑐵 𑐨𑐾𑐚𑐟𑐣𑑂𑐴𑐶, 𑐧𑐸𑐗𑐟𑐷𑐴 𑐖𑐾 𑐀𑐥𑐳𑐬𑐵 𑐧𑐣𑐧𑐵𑐩𑐾 𑐫𑐩𑐬𑐵𑐖 𑐩𑐡𑐟𑐶 𑐡𑐊 𑐳𑐎𑐿𑐟 𑐕𑐠𑐶, 𑐃 𑐬𑐩𑐞𑐷𑐎 𑐴𑐺𑐡𑐫 𑐠𑐶𑐎 𑐊𑐟𑐴𑐸 𑐣𑑀 𑐊𑐞𑑂𑐚𑑂𑐬𑐷 ! 𑐫𑐩𑐬𑐵𑐖 𑐏𑐏𑐳𑐿𑐟 𑐕𑐠𑐶, 𑐟𑑃 𑐔𑐶𑐟𑑂𑐬𑐐𑐸𑐥𑑂𑐟 𑐧𑐸𑐗𑐶 𑐖𑐵𑐂𑐟 𑐕𑐠𑐶 𑐖𑐾 𑐫𑐩𑐬𑐵𑐖 “𑐥𑑄𑐔𑐱𑐬”𑐳𑑃 𑐐𑑂𑐬𑐳𑐶𑐟 𑐨𑐊 𑐐𑐾𑐮 𑐕𑐠𑐶 ! 𑐔𑐶𑐟𑑂𑐬𑐐𑐸𑐥𑑂𑐟𑐎 𑐎𑐴𑐮𑐵 𑐄𑐟𑑂𑐟𑐬 𑐳𑐨 𑐎𑑂𑐫𑑀 𑐊𑐎 𑐎𑐵𑐟 𑐮𑐊 𑐖𑐵𑐌𑐮 𑐖𑐵𑐂𑐟 𑐕𑐠𑐶 𑐩𑐵𑐟𑑂𑐬 𑐫𑐩𑐬𑐵𑐖 𑐁 𑐣𑐶𑐨𑐵 𑐩𑑄𑐔𑐥𑐬 𑐬𑐴𑐶 𑐖𑐵𑐂𑐟 𑐕𑐠𑐶𑑋 𑐫𑐩𑐬𑐵𑐖 𑐣𑐶𑐨𑐵𑐎 𑐳𑑀𑐗𑐵𑑃- 𑐳𑐸𑐣𑐹 𑐣𑐾 𑐣𑐶𑐨𑐵... 𑐎𑐴𑐶 𑐬𑐸𑐎𑐶 𑐖𑐵𑐂𑐟 𑐕𑐠𑐶𑑋 𑐳𑐨𑐎 𑐄𑐟𑑂𑐳𑐵𑐴𑐶𑐟 𑐎𑐊𑐮𑐵𑐥𑐬 𑐫𑐩𑐬𑐵𑐖 𑐧𑐜𑑆𑐎𑐵 𑐔𑐵𑐨𑐷 𑐴𑐸𑐣𑐎𑐵 𑐡𑐿𑐟 𑐕𑐠𑐶, 𑐩𑐸𑐡𑐵 𑐣𑐶𑐨𑐵 𑐔𑐵𑐨𑐷 𑐨𑐾𑐚𑐮𑐵𑐥𑐬 𑐬𑐩𑐞𑐷 𑐩𑑀𑐴𑐣𑐎 𑐳𑑄𑐐 𑐟𑐾𑐣𑐵 𑐁𑐐𑐵𑑃 𑐧𑐝𑑆𑐿𑐟 𑐕𑐠𑐶 𑐖𑐾𑐣𑐵 𑐎𑐎𑐬𑑀 𑐀𑐣𑐎𑐵 𑐔𑐶𑐣𑑂𑐴𑐶𑐟𑐾 𑐣𑐴𑐶 𑐴𑑀𑐠𑐶 ! 𑐌 𑐔𑐵𑐨𑐷 𑐬𑐩𑐞𑐷 𑐩𑑀𑐴𑐣𑐎𑐾𑑃 𑐡𑐊 𑐡𑐿𑐟 𑐕𑐠𑐶 𑐩𑐸𑐡𑐵 𑐌 𑐟𑐵𑐮𑐵 𑐣𑐴𑐶 𑐏𑑀𑐮𑐶 𑐥𑐧𑐿𑐟 𑐕𑐠𑐶𑑋 𑐦𑐾𑐬 𑐣𑐶𑐨𑐵 𑐀𑐥𑐣𑐾 𑐥𑑂𑐬𑐫𑐵𑐳 𑐎𑐬𑐊 𑐮𑐾𑐮 𑐁𑐐𑐵𑑃 𑐧𑐝𑑆𑐿𑐟 𑐕𑐠𑐶 𑐩𑐸𑐡𑐵 𑐔𑐶𑐟𑑂𑐬𑐐𑐸𑐥𑑂𑐟 𑐎𑐴𑐿𑐟 𑐕𑐠𑐶 𑐖𑐾 𑐃 𑐩𑑀𑐣𑐎 𑐡𑐬𑐧𑐖𑑂𑐖𑐵 𑐠𑐶𑐎, 𑐌𑐣𑐵 𑐣𑐴𑐶 𑐏𑐸𑐖𑐟𑑋 𑐩𑐴𑐶𑐮𑐵 𑐛𑐎𑐊 𑐮𑐾𑐮 𑐔𑐵𑐨𑐷 𑐡𑐾𑐧𑐵𑐎 (!) 𑐐𑐥 𑐎𑐴𑐿𑐟 𑐕𑐠𑐶𑑋 𑐳𑐨 𑐎𑑂𑐫𑑀 𑐴𑑃𑐳𑐷 𑐎𑐬𑐿𑐟 𑐕𑐣𑐶 𑐖𑐾 𑐩𑑀𑐣 𑐎𑐟𑐊 𑐕𑑀𑐜𑑆𑐶 𑐀𑐊𑐮𑐴𑐸𑑃 ? 𑐟𑐵𑐴𑐶𑐥𑐬 𑐊𑐎𑐧𑐾𑐬 𑐥𑐸𑐣𑑅 𑐬𑐩𑐞𑐷 𑐩𑑀𑐴𑐣 𑐁 𑐣𑐶𑐨𑐵 𑐩𑑀𑐣 𑐳𑑄𑐖𑑀𑐐𑐶 𑐎𑐊 𑐟𑐵𑐮𑐵 𑐏𑑀𑐮𑐧𑐵𑐎 𑐀𑐳𑐦𑐮 𑐥𑑂𑐬𑐫𑐵𑐳 𑐎𑐬𑐿𑐟 𑐕𑐠𑐶𑑋 𑐣𑑄𑐡𑐷-𑐨𑐺𑑄𑐐𑐷-𑐨𑐶𑐏𑐩𑑄𑐐𑐣𑐷 𑐐𑐷𑐟 𑐐𑐵𑐧𑐊 𑐮𑐐𑐿𑐟 𑐕𑐠𑐶 𑐖𑐎𑐬 𑐟𑐵𑐟𑑂𑐥𑐬𑑂𑐫 𑐃𑐊𑐴 𑐖𑐾 𑐩𑑀𑐣𑐎 𑐟𑐵𑐮𑐵 𑐀𑐕𑐶 𑐮𑐵𑐐𑐮, 𑐩𑐸𑐡𑐵 𑐌𑐟𑐊 𑐀𑐕𑐶 𑐣𑑀 𑐊𑐞𑑂𑐚𑑂𑐬𑐷𑑋 𑐩𑐸𑐡𑐵 𑐆𑐟𑐸 𑐰𑐳𑐣𑑂𑐟𑐩𑐾 𑐥𑑂𑐬𑐾𑐩 𑐴𑑀𑐂𑐕 𑐀𑐣𑐣𑑂𑐟 𑐁 𑐎𑐬𑐾𑐖 𑐎𑐴𑐿𑐟 𑐀𑐕𑐶 𑐩𑐿𑐣𑐵-𑐩𑐿𑐣𑐵 𑑋 𑐟𑑃 𑐊𑐟𑐴𑐶 𑐣𑑀 𑐊𑐞𑑂𑐚𑑂𑐬𑐷 𑐡𑐬𑐧𑐖𑑂𑐖𑐵𑐥𑐬 𑐢𑐬𑐣𑐵 𑐡𑐾𑐮 𑐖𑐵𑐊𑑋
𑐄𑐟𑑂𑐟𑐬 𑐁𑐢𑐸𑐣𑐶𑐎 𑐨𑐵𑐰𑐥𑑂𑐬𑐢𑐵𑐣 𑐣𑐶𑐬𑐬𑑂𑐠𑐎 (𑐊𑐧𑐳𑐬𑑂𑐜) 𑐣𑐵𑐚𑐎: 𑐊𑐣 𑐊𑐚𑐾𑐞𑑂𑐜𑐾𑐣𑑂𑐚 𑐐𑑀𑐜𑑀 𑐎 𑐳𑐿𑐩𑐸𑐀𑐮 𑐧𑐾𑐎𑐿𑐚 𑐡𑑂𑐰𑐵𑐬𑐵 𑐳𑑂𑐰𑐫𑑄 𑐦𑑂𑐬𑐾𑑄𑐔𑐳𑑃 𑐀𑑄𑐐𑑂𑐬𑐾𑐖𑐷𑐩𑐾 𑐀𑐣𑐸𑐰𑐵𑐡 𑐎𑐊𑐮 𑐐𑐾𑐮 “𑐰𑐾𑐚𑐶𑑄𑐐 𑐦𑐶𑐬 𑐐𑑀𑐜𑑀” 𑐱𑐷𑐬𑑂𑐲𑐎𑐳𑑃 𑐁 𑐄𑐥𑐱𑐷𑐬𑑂𑐲𑐎 “𑐀 𑐚𑑂𑐬𑐾𑐖𑐶𑐎𑐶𑐩𑐾𑐜𑐷 𑐂𑐣 𑐚𑐹 𑐊𑐎𑑂𑐚𑑂𑐳” 𑐳𑐾𑐴𑑀 𑐖𑑀𑐜𑑆𑐮 𑐐𑐾𑐮 𑐖𑐾 𑐦𑑂𑐬𑐾𑑄𑐔 𑐳𑑄𑐳𑑂𑐎𑐬𑐞𑐩𑐾 𑐣𑐿 𑐕𑐮𑑋 𑐚𑑂𑐬𑐾𑐖𑐷𑐎𑐶𑐩𑐾𑐜𑐷 𑐩𑐵𑐣𑐾 𑐚𑑂𑐬𑐾𑐖𑐾𑐜𑐷 𑐁 𑐎𑐶𑐩𑐾𑐜𑐷𑐎 𑐩𑐶𑐱𑑂𑐬𑐞𑑋 𑐊𑐎𑐬 𑐎𑐠𑐵𑐣𑐎𑐳𑑃 𑐳𑑂𑐥𑐲𑑂𑐚 𑐨𑑇 𑐐𑐾𑐮 𑐴𑐊𑐟 𑐖𑐾 𑐊𑐎𑐬 𑐩𑐸𑐏𑑂𑐫 𑐥𑐵𑐟𑑂𑐬 “𑐐𑑀𑐜𑑀” 𑐋 𑐣𑐵𑐚𑐎𑐩𑐾 𑐕𑐿𑐴𑐾 𑐣𑐿, 𑐡𑑀𑐳𑐬 𑐌 𑐨𑐵𑐰𑐎 𑐡𑐺𑐲𑑂𑐚𑐶𑐳𑑃 𑐳𑐾𑐴𑑀 𑐣𑐵𑐚𑐎𑐎 𑐩𑐸𑐏𑑂𑐫 𑐟𑐟𑑂𑐰 𑐣𑐿 𑐕𑐿𑑋 𑐣𑐵𑐚𑐎𑐎 𑐩𑐸𑐏𑑂𑐫 𑐟𑐟𑑂𑐰 𑐕𑐿 “𑐰𑐾𑐚𑐶𑑄𑐐” 𑐩𑐵𑐣𑐾 𑐧𑐵𑐚 𑐟𑐎𑐣𑐵𑐂𑑋 𑐨𑐵𑐲𑐵, 𑐳𑑂𑐚𑐾𑐖, 𑐧𑐵𑐖𑐧, 𑐔𑐸𑐥𑑂𑐥 𑐬𑐴𑐧, 𑐔𑐮𑐧𑐵𑐎 𑐟𑐬𑐷𑐎𑐵, 𑐃 𑐳𑐨 𑐋 𑐣𑐵𑐚𑐎𑐎 𑐀𑐨𑐶𑐣𑑂𑐣 𑐀𑑄𑐐 𑐕𑐶𑐋𑑋 𑐡𑐾𑐱-𑐎𑐵𑐮𑐩𑐾 𑐨𑐵𑐐𑐿𑐧𑐮𑐵 𑐧𑐣𑐖𑐵𑐬𑐵 𑐖𑐷𑐰𑐣𑐱𑐿𑐮𑐷𑐎 𑐮𑑀𑐎 𑐳𑐨 𑐀𑐕𑐶 𑐊𑐎𑐬 𑐩𑐸𑐏𑑂𑐫 𑐥𑐵𑐟𑑂𑐬𑑋 𑐧𑐶𑐣𑐸 𑐧𑐖𑐣𑐾 𑐱𑐵𑐬𑐷𑐬𑐶𑐎 𑐨𑐵𑐰𑐳𑑃 𑐀𑐨𑐶𑐣𑐫 𑐎𑐬𑐿𑐧𑐮𑐵 “𑐩𑐵𑐂𑐩 𑐎𑐮𑐵𑐎𑐵𑐬” 𑐖𑐾𑐎𑐵𑑃 𑐋 𑐣𑐵𑐚𑐎𑐎 𑐥𑐵𑐟𑑂𑐬 𑐀𑐨𑐶𑐣𑐫 𑐎𑐬𑐿 𑐕𑐠𑐶𑑋 𑐣𑐵𑐚𑐎𑐩𑐾 𑐥𑑂𑐮𑐶𑐚 𑐁 𑐳𑑄𑐟𑐸𑐮𑐣𑐎 𑐣𑐰 𑐥𑐬𑐶𑐨𑐵𑐲𑐵 𑐃 𑐣𑐵𑐚𑐎 𑐐𑐝𑑆𑐿𑐟 𑐀𑐕𑐶𑑋 𑐁𑐢𑐸𑐣𑐶𑐎 𑐠𑐶𑐫𑐾𑐚𑐬𑐎𑐾𑑃 𑐃 𑐣𑐵𑐚𑐎 𑐣𑐰 𑐫𑐸𑐐𑐩𑐾 𑐥𑑂𑐬𑐰𑐾𑐱 𑐎𑐬𑐵𑐧𑐿𑐟 𑐀𑐕𑐶𑑋 𑐧𑑂𑐬𑐶𑐚𑐾𑐣𑐎 “𑐩𑑂𑐫𑐹𑐖𑐶𑐎 𑐴𑐶𑐮” 𑐠𑐶𑐫𑐾𑐚𑐬 𑐩𑐾 𑐳𑑄𑐐𑐷𑐟 𑐴𑐵𑐳𑑂𑐫 𑐬𑐴𑐿 𑐕𑐮𑐿 𑐖𑐂𑐩𑐾 𑐖𑐷𑐰𑐣𑐎 𑐣𑐶𑐬𑐵𑐱𑐵 “𑐎𑑂𑐬𑐶𑐳-𑐚𑐶𑐎”𑐳𑑃 𑐧𑐾𑐎𑐾𑐚 𑐁 𑐬𑐵𑐖𑐣𑐿𑐟𑐶𑐎-𑐳𑐵𑐩𑐵𑐖𑐶𑐎 𑐁𑐟𑑄𑐎 𑐴𑐿𑐬𑑀𑐮𑑂𑐜 𑐥𑐶𑐣𑑂𑐚𑐬 𑐴𑐵𑐳𑑂𑐫 𑐬𑐹𑐥𑐩𑐾 𑐡𑐾𑐏𑐧𑐿𑐟 𑐕𑐠𑐶𑑋 “𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱” 𑐳𑐾𑐴𑑀 𑐳𑑂𑐰𑐬𑑂𑐎 (𑐧𑐵 𑐣𑐬𑐎) 𑐎 𑐡𑑂𑐰𑐵𑐬𑐥𑐬 𑐁𑐬𑐩𑑂𑐨 𑐴𑑀𑐂𑐊 𑐖𑐟𑐊 𑐌𑐣𑐵 𑐟𑑃 𑐳𑐨 𑐩𑐺𑐟 𑐮𑑀𑐎 𑐥𑑄𑐎𑑂𑐟𑐶𑐧𑐡𑑂𑐢 𑐕𑐠𑐶 𑐩𑐸𑐡𑐵 𑐊𑐎𑐚𑐵 𑐖𑐷𑐰𑐶𑐟 𑐰𑑂𑐫𑐎𑑂𑐟𑐶 𑐳𑐾𑐴𑑀 𑐕𑐠𑐶!𑐄𑐔𑐎𑑂𑐎𑐵 𑐧𑐵𑐖𑐵𑐬𑐷 𑐮𑐐 𑐳𑐘𑑂𑐔-𑐩𑐘𑑂𑐔 𑐬𑐴𑐿𑐊! 𑐥𑑂𑐬𑐾𑐩𑐷-𑐥𑑂𑐬𑐾𑐩𑐶𑐎𑐵𑐎 𑐌𑐟𑐊 𑐧𑐶𑐫𑐵𑐴𑑀 𑐨𑑇 𑐖𑐵𑐂 𑐕𑐿! 𑐣𑐾𑐟𑐵𑐖𑐷 𑐩𑐺𑐟𑑂𑐫𑐸𑐎 𑐧𑐵𑐡𑑀 𑐰𑐶𑐮𑐩𑑂𑐧𑐳𑑃 𑐊𑐧𑐵 𑐮𑐾𑐮 𑐀𑐨𑐶𑐱𑐥𑑂𑐟 𑐕𑐠𑐶! 𑐰𑐵𑐩𑐥𑑄𑐠𑐷 𑐌𑐟𑑁 𑐧𑐵𑐴𑐬𑐳𑑃 𑐳𑐩𑐬𑑂𑐠𑐣 𑐡𑐿 𑐕𑐠𑐶! 𑐰𑐷.𑐁𑐂.𑐥𑐷. 𑐎𑑂𑐫𑐹 𑐳𑑃 𑐌𑐟𑑁 𑐟𑑂𑐬𑐵𑐞 𑐣𑐿 𑐨𑐾𑐚𑐿 𑐕𑐿! 𑐩𑐸𑐡𑐵 𑐖𑐂 𑐡𑐬𑐧𑐖𑑂𑐖𑐵𑐎 𑐧𑐵𑐴𑐬 𑐮𑑀𑐎 𑐥𑑄𑐎𑑂𑐟𑐶𑐧𑐡𑑂𑐢 𑐕𑐠𑐶 𑐳𑐾 𑐊𑐎 𑐫𑐸𑐐𑐩𑐾 𑐏𑐸𑐖𑐶𑐟𑑀 𑐕𑐮 𑐁 𑐧𑐣𑑂𑐣 𑐳𑐾𑐴𑑀 𑐴𑑀𑐂𑐟 𑐕𑐮, 𑐃 𑐬𑐴𑐳𑑂𑐫𑑀𑐡𑑂𑐢𑐵𑐚𑐣 𑐔𑐶𑐟𑑂𑐬𑐐𑐸𑐥𑑂𑐟 𑐎𑐬𑐿 𑐕𑐠𑐶! 𑐩𑐵𑐣𑐾 𑐁𑐧 𑐃 𑐣𑐿 𑐏𑐸𑐖𑐟 𑐟𑐏𑐣 𑐂𑐣𑑂𑐟𑐖𑐵𑐬𑐷 𑐎𑐠𑐷𑐎? 𑐣𑐣𑑂𑐡𑐷-𑐨𑐺𑑄𑐐𑐷 𑐎𑐴𑐿𑐊 𑐖𑐾 𑐳𑑀𑐗𑐵𑑃𑐎 𑐡𑐬𑐧𑐖𑑂𑐖𑐵 𑐳𑑂𑐰𑐥𑑂𑐣 𑐣𑐿, 𑐩𑐵𑐟𑑂𑐬 𑐧𑐸𑐗𑐧𑐵𑐎 𑐡𑑀𑐲 𑐕𑐮! 𑐀𑐨𑐶𑐣𑐾𑐟𑐵 𑐰𑐶𑐰𑐾𑐎 𑐎𑐸𑐩𑐵𑐬 𑐀𑐥𑐣 “𑐳𑐬𑐣𑐾𑐩” 𑐥𑐸𑐕𑐮 𑐐𑐾𑐮𑐵𑐥𑐬 𑐎𑐴𑐿 𑐕𑐠𑐶 𑐖𑐾 𑐎𑐟𑐾𑐎 𑐩𑑀𑐱𑑂𑐎𑐶𑐮𑐳𑑃 𑐟𑑃 𑐖𑐵𑐟𑐶 𑐴𑐸𑐣𑐎𑐬 𑐥𑐵𑐕𑐵𑑃 𑐕𑑀𑐜𑑆𑐮𑐎 𑐀𑐕𑐶 𑐳𑐾 𑐄𑐬𑑂𑐦 𑐟𑑃 𑐕𑑀𑐜𑑆𑐶𑐫𑐾 𑐡𑐾𑐮 𑐖𑐵𑐊𑑋 𑐰𑐵𑐩𑐥𑑄𑐠𑐷𑐎 𑐎𑐠𑐵𑐩𑐾 𑐣𑐾 𑐳𑑂𑐰𑐬𑑂𑐐-𑐣𑐬𑑂𑐎 𑐴𑑀𑐂 𑐕𑐿 𑐁 𑐣𑐴𑐶𑐫𑐾 𑐫𑐩𑐬𑐵𑐖-𑐔𑐶𑐟𑑂𑐬𑐐𑐸𑐥𑑂𑐟, 𑐩𑐸𑐡𑐵 𑐊𑐟𑐸𑐎𑑂𑐎𑐵 𑐥𑐬𑐶𑐳𑑂𑐠𑐶𑐟𑐶 𑐡𑐾𑐏𑐶 𑐎𑑇 𑐌 𑐀𑐰𑐶𑐱𑑂𑐰𑐵𑐳 𑐎𑑀𑐣𑐵 𑐎𑐬𑐠𑐸? 𑐩𑐸𑐡𑐵 𑐫𑐩𑐬𑐵𑐖𑐾 𑐴𑐸𑐣𑐎𑐵 𑐎𑐴𑐿 𑐕𑐠𑐶𑐣𑑂𑐴 𑐖𑐾 𑐃 𑐡𑐸𑑅𑐳𑑂𑐰𑐥𑑂𑐣 𑐴𑐸𑐀𑐊𑑋 𑐫𑐩𑐡𑐹𑐟 𑐳𑐨 𑐎𑐜𑑆𑐵𑐴 𑐮𑐐 𑐀𑐣𑐾𑐬𑐾 𑐛𑐵𑐝𑑆 𑐕𑐠𑐶 𑐎𑐶𑐫𑑀 𑐨𑐹𑐖𑐿𑐮𑐾 𑐨𑐾𑐚𑐶𑐟𑐾 𑐣𑐿 𑐕𑐣𑑂𑐴𑐶, 𑐔𑐶𑐟𑑂𑐬𑐐𑐸𑐥𑑂𑐟𑐎 𑐩𑐾𑐎𑐥 𑐧𑐮𑐵 𑐡𑐵𑐝𑑆𑐷 𑐡𑐾𑐏𑐶 𑐨𑐶𑐏𑐩𑑄𑐐𑐣𑐷𑐎 𑐴𑑃𑐳𑐮𑐵𑐥𑐬 𑐨𑐺𑑄𑐐𑐷 𑐎𑐴𑐿 𑐕𑐠𑐶 𑐖𑐾 𑐨𑐶𑐏𑐩𑑄𑐐𑐣𑐷 𑐳𑐾𑐴𑑀 𑐴𑐸𑐣𑐎𑐾 𑐳𑐨 𑐖𑐾𑐎𑐵𑑃 𑐎𑐮𑐵𑐎𑐵𑐬 𑐕𑐠𑐶𑑋 𑐩𑑀𑐣𑐎 𑐡𑐬𑐧𑐖𑑂𑐖𑐵 𑐩𑑀𑐣 𑐕𑑀𑐜𑑆𑐶 𑐊𑐮𑐵𑐥𑐬 𑐎𑑀𑐣𑐵 𑐏𑐸𑐖𑐟?
𑐦𑑂𑐬𑐾𑑄𑐔 𑐣𑐵𑐚𑐎 “𑐰𑐾𑐚𑐶𑑄𑐐 𑐦𑐶𑐬 𑐐𑑀𑐜𑑀”, 𑐴𑐿𑐬𑑀𑐮𑑂𑐜 𑐥𑐶𑑄𑐚𑐬𑐎 𑐀𑑄𑐐𑑂𑐬𑐾𑐖𑐷 𑐣𑐵𑐚𑐎 “𑐡 𑐧𑐬𑑂𑐠𑐜𑐾 𑐥𑐵𑐬𑑂𑐚𑐷”, 𑐧𑐵𑐡𑐮 𑐳𑐬𑐎𑐵𑐬𑐎 𑐧𑐵𑑄𑐐𑑂𑐮𑐵 𑐣𑐵𑐚𑐎 “𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟” 𑐁 𑐄𑐡𑐫 𑐣𑐵𑐬𑐵𑐫𑐞 𑐳𑐶𑑄𑐴 ‘𑐣𑐔𑐶𑐎𑐾𑐟𑐵’𑐎 𑐩𑐿𑐠𑐶𑐮𑐷 𑐣𑐵𑐚𑐎 “𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱” 𑐥𑐸𑐬𑐵𑐣 𑐣𑐵𑐚𑐎 𑐖𑐾𑐎𑐵𑑃 𑐥𑐬𑐶𑐨𑐵𑐲𑐶𑐟 𑐁𑐬𑐩𑑂𑐨 𑐁 𑐀𑐣𑑂𑐟𑐎 𑐥𑐬𑐶𑐢𑐶𑐳𑑃 𑐀𑐮𑐐 𑐀𑐕𑐶𑑋 𑐃 𑐎𑐟𑑁 𑐳𑑃 𑐱𑐸𑐬𑐹 𑐨𑑇 𑐖𑐵𑐂𑐟 𑐀𑐕𑐶, 𑐎𑐟𑑁 𑐏𑐟𑐩 𑐨𑑇 𑐖𑐵𑐂𑐟 𑐀𑐕𑐶𑑋 𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟 𑐩𑐾 𑐮𑐾𑐏𑐎 𑐥𑐵𑐟𑑂𑐬 𑐟𑐵𑐎𑐶 𑐬𑐴𑐮 𑐀𑐕𑐶, 𑐁 𑐀𑐣𑐔𑑀𑐎𑑂𑐎𑐾 𑐌 𑐡𑐬𑑂𑐱𑐎 𑐡𑐷𑐬𑑂𑐑𑐵𑐎𑐾𑑃 𑐳𑐩𑑂𑐧𑑀𑐢𑐶𑐟 𑐎𑐬𑐿𑐟 𑐔𑐵𑐬𑐶𑐚𑐵 𑐡𑐾𑐬𑐷𑐳𑑃 𑐁𑐊𑐮 𑐡𑐬𑑂𑐱𑐎𑐎𑐾𑑃 𑐩𑑄𑐔𑐥𑐬 𑐧𑐖𑐵 𑐮𑐿𑐊 𑐁 𑐌𑐎𑐬𑐵 𑐣𑐵𑐚𑐎𑐎 𑐥𑐵𑐟𑑂𑐬 𑐧𑐣𑐵 𑐡𑐿𑐊𑑋 𑐔𑐵𑐬𑐶𑐩 𑐥𑐵𑐟𑑂𑐬 𑐌𑐎𑐬𑐵 𑐥𑑂𑐬𑐶𑐫 𑐕𑐿, 𑐌 𑐣𑐶𑐬𑑂𑐩𑐮 𑐣𑐿 “𑐂𑐣𑑂𑐡𑑂𑐬𑐖𑐷𑐟” 𑐕𑐷𑑋 𑐌 𑐀𑐮𑐐 𑐀𑐕𑐶, 𑐂𑐣𑑂𑐡𑑂𑐬𑐎𑐾𑑃 𑐖𑐷𑐟𑐿𑐧𑐮𑐵 𑐋𑐟𑐶𑐴𑐵𑐳𑐶𑐎 𑐥𑐵𑐟𑑂𑐬 𑐀𑐕𑐶𑑋 𑐌 𑐀𑐩𑐮 𑐰𑐶𑐩𑐮, 𑐎𑐩𑐮 𑐖𑐾𑐎𑐵𑑃 𑐮𑐷𑐏𑐥𑐬 𑐣𑐿 𑐔𑐮𑐟𑑋 𑐩𑐸𑐡𑐵 𑐀𑐣𑑂𑐟 𑐖𑐵𑐂𑐟 𑐖𑐵𑐂𑐟 𑐂𑐣𑑂𑐡𑑂𑐬𑐖𑐷𑐟 𑐳𑐾𑐴𑑀 𑐀𑐩𑐮 𑐰𑐶𑐩𑐮, 𑐎𑐩𑐮 𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟 𑐨𑑇 𑐖𑐵𑐂𑐊𑑋
𑐴𑐿𑐬𑑀𑐮𑑂𑐜 𑐥𑐶𑐣𑑂𑐚𑐬𑐎 “𑐡 𑐧𑐬𑑂𑐠𑐜𑐾 𑐥𑐵𑐬𑑂𑐚𑐷”𑐎 𑐥𑑂𑐬𑐵𑐬𑐩𑑂𑐨𑐩𑐾 𑐟𑐾𑐴𑐾𑐣 𑐳𑐩𑐷𑐎𑑂𑐲𑐵 𑐨𑐾𑐮 𑐖𑐾 𑐴𑐸𑐣𑐎𑐬 𑐮𑐾𑐏𑐎𑐷𑐫 𑐖𑐷𑐰𑐣 𑐳𑐩𑐵𑐥𑑂𑐟 𑐴𑐸𑐀𑐊 𑐥𑐬 𑐁𑐧𑐶 𑐐𑐾𑐮𑑋 𑐩𑐸𑐡𑐵 𑐊𑐎𑐬 𑐥𑐸𑐣𑐬𑑂𑐥𑐵𑐛 𑐊𑐎𑐬𑐵 𑐎𑑂𑐮𑐵𑐳𑐶𑐎 𑐧𑐣𑐵 𑐡𑐾𑐮𑐎𑑋 𑐎𑐶𑐕𑐸 𑐬𑐴𑐳𑑂𑐫, 𑐎𑐶𑐕𑐸 𑐁𑐟𑑄𑐎𑐎𑐾𑑃 𑐌 𑐳𑐩𑑂𑐥𑐹𑐬𑑂𑐞 𑐣𑐵𑐚𑐎𑐩𑐾 𑐧𑐣𑐾𑐣𑐾 𑐬𑐴𑐮𑐵𑐴, 𑐴𑐵𑐳𑑂𑐫 𑐎𑐠𑑂𑐫𑐎𑐾𑑃 𑐁𑐬 𑐩𑐖𑐐𑐹𑐟 𑐎𑐾𑐮𑐎𑑋 𑐳𑑂𑐚𑐿𑐣𑐮𑐾 𑐎𑐷 𑐀𑐕𑐶, 𑐕𑐮 𑐧𑐵 𑐧𑐣𑑇 𑐔𑐴𑐿𑐟 𑐀𑐕𑐶? 𑐎𑐷 𑐌 𑐳𑑂𑐟𑑂𑐬𑐷𑐎𑐾𑑃 𑐡𑐹𑐲𑐶𑐟 𑐎𑐬𑐿𑐊, 𑐧𑐵 𑐌 𑐀𑐥𑐣 𑐥𑐟𑑂𑐣𑐷𑐎 𑐴𑐟𑑂𑐫𑐵 𑐎𑐾𑐮𑐎? 𑐩𑐸𑐡𑐵 𑐩𑐾𑐐 𑐟𑑃 𑐌𑐎𑐬𑐵 𑐥𑐳𑐶𑐣𑑂𑐣 𑐎𑐬𑐿 𑐕𑐿? 𑐌𑐎𑐬 𑐥𑐴𑐶𑐮 𑐁 𑐡𑑀𑐳𑐬 𑐎𑐣𑑂𑐳𑐬𑑂𑐚, 𑐎𑐾 𑐟𑐎𑐬 𑐧𑐵𑐢𑐎 𑐧𑐣𑐮𑐿? 𑐎𑐷 𑐌 𑐗𑐹𑐛 𑐧𑐖𑐿𑐊 𑐧𑐵 𑐰𑐬𑑂𑐟𑐩𑐵𑐣 𑐳𑐵𑐩𑐵𑐖𑐶𑐎 𑐁 𑐬𑐵𑐖𑐣𑐿𑐟𑐶𑐎 𑐥𑐬𑐶𑐨𑐵𑐲𑐵𑐳𑑃 𑐀𑐮𑐐 𑐰𑑂𑐫𑐰𑐴𑐵𑐬𑐎 𑐀𑐕𑐶? 𑐌 𑐩𑐾𑐐𑐎𑐾𑑃 𑐩𑑀𑐎𑑇 𑐔𑐵𑐴𑐿𑐊 𑐩𑐸𑐡𑐵 𑐟𑐿𑐫𑑀 𑐎𑐶𑐊 𑐩𑐾𑐐 𑐌𑐎𑐬𑐵 𑐥𑐳𑐶𑐣𑑂𑐣 𑐎𑐬𑐿 𑐕𑐿 𑐁 𑐳𑐵𑐩𑐵𑐖𑐶𑐎 𑐁 𑐬𑐵𑐖𑐣𑐿𑐟𑐶𑐎 𑐱𑐎𑑂𑐟𑐶 𑐌𑐎𑐬𑐵 𑐎𑐶𑐊 𑐁 𑐎𑑀𑐣𑐵 𑐄𑐛𑐵 𑐎𑑇 𑐮𑑇 𑐐𑐾𑐮 𑐖𑐵𑐂 𑐕𑐿, 𑐖𑐎𑐬 𑐳𑐶𑐥𑐵𑐴𑐷 𑐐𑑀𑐮𑑂𑐜𑐧𑐬𑑂𑐐 (𑐐𑑀𑐮𑑂𑐜𑐧𑐬𑑂𑐐𑐎 𑐮𑐸𑐮𑐸𑐎 𑐳𑑄𑐐 𑐬𑐴𑐳𑑂𑐫𑐩𑐫 𑐰𑑂𑐫𑐰𑐴𑐵𑐬) 𑐳𑑂𑐰𑐫𑑄 𑐁𑐡𑐬𑑂𑐱 𑐄𑐥𑐳𑑂𑐠𑐶𑐟 𑐣𑐿 𑐎𑑇 𑐥𑐵𑐧𑐿 𑐕𑐠𑐶𑑋
𑐳𑐸𑐣𑑂𑐣-𑐩𑐳𑐵𑐣 𑐳𑐜𑑆𑐎𑐎 𑐎𑐵𑐟𑐎 𑐩𑐵𑐚𑐶𑐎 𑐝𑐶𑐩𑐎𑐵 𑐁 𑐥𑐟𑑂𑐬𑐴𑐷𑐣 𑐣𑐐𑑂𑐣 𑐐𑐵𑐕 “𑐰𑐾𑐚𑐶𑑄𑐐 𑐦𑐶𑐬 𑐐𑑀𑐜𑑀” 𑐎 𑐳𑑂𑐚𑐾𑐖 𑐕𑐶𑐋, 𑐟𑐵𑐮𑐵 𑐮𑐵𑐐𑐮 𑐡𑐬𑐧𑐖𑑂𑐖𑐵𑐎 𑐧𑐵𑐴𑐬𑐎 𑐳𑑂𑐠𑐮/ 𑐩𑐞𑑂𑐜𑐥 “𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱”𑐎 𑐳𑑂𑐚𑐾𑐖 𑐕𑐶𑐋 𑐟𑑃 “𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟”𑐩𑐾 𑐡𑐬𑑂𑐱𑐎 𑐡𑐷𑐬𑑂𑐑𑐵, 𑐳𑐊𑐴 𑐳𑑂𑐚𑐾𑐖 𑐧𑐣𑐶 𑐖𑐵𑐂𑐊𑑋 “𑐡 𑐧𑐬𑑂𑐠𑐜𑐾 𑐥𑐵𑐬𑑂𑐚𑐷”𑐩𑐾 𑐑𑐬𑐎 𑐎𑑀𑐛𑐮𑐷 𑐳𑑂𑐚𑐾𑐖 𑐕𑐶𑐋 𑐩𑐸𑐡𑐵 𑐥𑐶𑐣𑑂𑐚𑐬 𑐊𑐎𑐬 𑐥𑐵𑐟𑑂𑐬 𑐳𑑂𑐚𑐿𑐣𑐮𑐾 𑐎𑐾𑑃 𑐜𑐾𑐬𑐷𑐜𑐵𑐎 “𑐰𑐶𑐏𑐞𑑂𑐜𑐣” 𑐥𑐡𑑂𑐢𑐟𑐶𑐳𑑃 𑐎𑐏𑐣𑑀 𑐏𑐞𑑂𑐜 𑐎𑑇 𑐡𑐿𑐟 𑐕𑐠𑐶 𑐟𑑃 𑐎𑐏𑐣𑑀 𑐦𑐾𑐬𑐳𑑃 𑐖𑑀𑐜𑑆𑐶 𑐡𑐿 𑐕𑐠𑐶𑑋 𑐮𑑀𑐎 𑐧𑐵 𑐡𑐬𑑂𑐱𑐎 𑐌𑐎𑐬𑐵𑐳𑑃 𑐃𑐬𑑂𑐲𑑂𑐫𑐵 𑐎𑐬𑑇 𑐮𑐐𑐿𑐊, 𑐏𑐣𑐾 𑐳𑐴𑐵𑐣𑐸𑐨𑐹𑐟𑐶 𑐎𑐬𑑇 𑐮𑐐𑐿𑐊 𑐏𑐣𑐾 𑐑𑐺𑐞𑐵 𑐎𑐬𑑇 𑐮𑐐𑐿𑐊, 𑐩𑐸𑐡𑐵 𑐳𑑂𑐚𑐿𑐣𑐮𑐷 𑐐𑑀𑐮𑑂𑐜𑐧𑐬𑑂𑐐 𑐁 𑐩𑐿𑐎𑑂𑐎𑐵𑐣𑐎 𑐳𑑀𑐗𑐵𑑃 𑐖𑐏𑐣 𑐣𑐶𑐬𑑂𑐧𑐮 𑐧𑐸𑐗𑐶 𑐥𑐜𑑆𑐿𑐊 𑐟𑑃 𑐡𑐬𑑂𑐱𑐎 𑐌𑐎𑐬𑐵 𑐳𑑄𑐐 𑐀𑐥𑐣𑐵𑐎𑐾𑑃 𑐡𑐾𑐏𑐿𑐊, 𑐖𑐾𑐣𑐵 𑐌 “𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟” 𑐩𑐾 𑐂𑐣𑑂𑐡𑑂𑐬𑐖𑐷𑐟 𑐳𑑄𑐐 𑐀𑐥𑐣𑐵𑐎𑐾𑑃 𑐡𑐾𑐏𑐿𑐊𑑋 “𑐰𑐾𑐚𑐶𑑄𑐐 𑐦𑐶𑐬 𑐐𑑀𑐜𑑀” 𑐩𑐾 𑐖𑐏𑐣 𑐮𑑀𑐎 𑐐𑐸𑐮𑐵𑐩 𑐳𑑄𑐐 𑐀𑐥𑐣𑐵𑐎𑐾𑑃 𑐡𑐾𑐏𑐿𑐊 𑐟𑐏𑐣𑐾 𑐳𑐴𑐵𑐣𑐸𑐨𑐹𑐟𑐶 𑐡𑐾𑐏𑐾𑐮𑐵𑐥𑐬 𑐔𑐩𑐾𑐚𑐵 𑐥𑐜𑑆𑐮𑐵𑐥𑐬 𑐌 𑐴𑐟𑐥𑑂𑐬𑐨 𑐬𑐴𑐶 𑐖𑐵𑐂𑐊𑑋 “𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱” 𑐩𑐾 𑐨𑐶𑐏𑐩𑑄𑐐𑐣𑐷 𑐃𑐬𑑂𑐲𑑂𑐫𑐵𑐰𑐱 𑐬𑐩𑑂𑐨𑐵-𑐩𑐾𑐣𑐎𑐵𑐎𑐾𑑃 𑐩𑐸𑑃𑐴𑐗𑐜𑑆𑐎𑐷 𑐎𑐴𑐿𑐊! 𑐥𑐶𑐎𑐾𑐚𑐩𑐵𑐬 𑐂𑐣𑑂𑐡𑑂𑐬𑐎 𑐰𑑂𑐬𑐖𑐥𑐬 𑐬𑐸𑐥𑐿𑐫𑑂𑐫𑐵𑐎 𑐧𑑀𑐮𑐷 𑐮𑐐𑐧𑐿𑐊𑑋 𑐣𑐣𑑂𑐡𑐷-𑐨𑐺𑑄𑐐𑐷 𑐎𑐴𑐿𑐊 𑐖𑐾 𑐳𑐨 𑐐𑑀𑐚𑐾 𑐳𑐟𑑂𑐫 𑐕𑐷 𑐩𑐸𑐡𑐵 𑐎𑑂𑐫𑑀 𑐐𑑀𑐚𑐾 𑐥𑐹𑐬𑑂𑐞 𑐳𑐟𑑂𑐫 𑐣𑐿 𑐧𑐖𑐮𑑁𑑄𑑋 “𑐊𑐰𑐩𑑂 𑐂𑐣𑑂𑐡𑑂𑐬𑐖𑐷𑐟”𑐩𑐾 𑐂𑐣𑑂𑐡𑑂𑐬𑐖𑐷𑐟𑐎 𑐴𑐵𑐮 𑐳𑐶𑐳𑐷𑐦𑐳 𑐳𑐣 𑐕𑐿𑑋 𑐱𑐵𑐥𑐶𑐟 𑐐𑑂𑐬𑐷𑐎 𑐩𑐶𑐠𑐎 𑐳𑐶𑐳𑐷𑐦𑐳, 𑐳𑑄𑐐𑐩𑐬𑐩𑐬𑐎 𑐥𑐵𑐠𑐬𑐥𑐬 𑐔𑐝𑑆𑐧𑐵𑐎 𑐮𑐾𑐮 𑐀𑐨𑐶𑐱𑐥𑑂𑐟, 𑐁 𑐖𑐏𑐣𑐾 𑐌 𑐔𑑀𑐚𑐷𑐥𑐬 𑐥𑐴𑐸𑑃𑐔𑐿𑐊 𑐁𑐎𑐶 𑐥𑐵𑐠𑐬 𑐦𑐾𑐬 𑐐𑐸𑐬𑐎𑐶 𑐎𑑇 𑐌𑐎𑐬𑐵 𑐣𑐷𑐔𑐵𑑃 𑐁𑐣𑐶 𑐡𑐿 𑐕𑐿𑑋 𑐩𑐣𑐸𑐎𑑂𑐏𑐎 𑐎𑐵𑐖 𑐁 𑐖𑐷𑐰𑐣 𑐣𑐶𑐬𑐬𑑂𑐠𑐎𑐟𑐵𑐥𑐬 𑐁𑐢𑐵𑐬𑐶𑐟 𑐀𑐕𑐶𑑋 𑐩𑐣𑐸𑐎𑑂𑐏 𑐀𑐳𑐦𑐮 𑐴𑑀𑐂𑐮𑐾 𑐀𑐨𑐶𑐱𑐥𑑂𑐟 𑐀𑐕𑐶, 𑐂𑐣𑑂𑐡𑑂𑐬𑐖𑐷𑐟 𑐖𑐾𑐎𑐵𑑃? 𑐁𑐎𑐶 “𑐣𑑀 𑐊𑐞𑑂𑐚𑑂𑐬𑐷: 𑐩𑐵 𑐥𑑂𑐬𑐰𑐶𑐱”𑐎 𑐳𑑂𑐰𑐬𑑂𑐐-𑐣𑐬𑐎, 𑐫𑐩𑐬𑐵𑐖-𑐔𑐶𑐟𑑂𑐬𑐐𑐸𑐥𑑂𑐟𑐎 𑐀𑐩𑐵𑐣𑑂𑐫𑐟𑐵 𑐡𑐾𑐏𑐮𑐵𑐴𑐵 𑐐𑐥𑐎𑐾𑑃 𑐡𑐾𑐏𑐶 𑐧𑐡𑐮𑐟? 𑐩𑐸𑐡𑐵 𑐟𑐏𑐣 𑐫𑐩𑐬𑐵𑐖𑐾 𑐎𑐴𑐿 𑐕𑐠𑐶 𑐖𑐾 𑐡𑐾𑐏𑐮𑐵𑐴𑐵 𑐐𑐥 𑐡𑐸𑑅𑐳𑑂𑐰𑐥𑑂𑐣 𑐨𑑇 𑐳𑐎𑐿𑐊? “𑐰𑐾𑐚𑐶𑑄𑐐 𑐦𑐶𑐬 𑐐𑑀𑐜𑑀” 𑐃𑐱𑑂𑐰𑐬𑐎 𑐂𑐣𑑂𑐟𑐖𑐵𑐬𑐷 𑐣𑐿 𑐕𑐶𑐋, 𑐧𑐾𑐎𑐾𑐚 𑐳𑑂𑐰𑐫𑑄 𑐎𑐴𑐿 𑐕𑐠𑐶 𑐖𑐾 𑐂𑐣𑑂𑐟𑐖𑐵𑐬𑐷 “𑐐𑐶𑐜”𑐎 𑐣𑐿 “𑐐𑑀𑐜𑑀”𑐎 𑐨𑑇 𑐬𑐴𑐮 𑐀𑐕𑐶, 𑐌𑐣𑐵 𑐎𑑂𑐬𑐶𑐳𑑂𑐚𑐶𑐫𑐾𑐣𑐶𑐚𑐷 “𑐩𑐶𑐠𑑀𑐮𑑀𑐖𑐷” 𑐀𑐕𑐶 𑐳𑐾 𑐌 𑐟𑐎𑐬 𑐥𑑂𑐬𑐫𑑀𑐐 𑐎𑐬𑐿 𑐕𑐠𑐶𑑋 𑐀𑐳𑑂𑐟𑐶𑐟𑑂𑐰𑐰𑐵𑐡𑐷 𑐰𑐶𑐔𑐵𑐬𑐢𑐵𑐬𑐵, 𑐩𑐣𑐸𑐎𑑂𑐏 𑐁 𑐧𑑂𑐬𑐴𑑂𑐩𑐵𑐞𑑂𑐜 𑐳𑐨 𑐣𑐶𑐬𑐬𑑂𑐠𑐎 𑐀𑐕𑐶, 𑐀𑐧𑐳𑐬𑑂𑐜 𑐀𑐕𑐶𑑋
No comments:
Post a Comment